រាជធានីភ្នំពេញ ៖ ស្ត្រីជាកម្មការិនីរោងចក្រកាត់ម្នាក់ត្រូវបានរថយន្តក្រុងដឹកភ្ញៀវទេសចរណ៍១គ្រឿង បើកបរក្នុងទិសដៅស្របគ្នា និងក្នុងល្បឿនលឿនជ្រុលបុកពីក្រោយ ក្នុងខណៈដែលនាងកំពុងជិះម៉ូតូ ជាមួយប្ដីចេញពីធ្វើការត្រឡប់ទៅកាន់ផ្ទះជួល។ បណ្តាលឲ្យដួលម៉ូតូ ហើយរូបនាងបានខ្ទាតចូល ក្រោមកង់រថយន្តកិនបែកក្បាលធ្លាយខួរស្លាប់ភ្លាមៗនៅនឹងកន្លែង ចំណែកបុរសជាប្តីរងរបួសស្រាល។ បន្ទាប់មករថយន្តបង្កបានអូសម៉ូតូទៅជាច្រើនម៉ែត្របណ្ដាលឲ្យបែកផ្កាភ្លើងបង្កឆាបឆេះអស់មួយកំណាត់មុខ រងការខូចខាតទាំងស្រុងតែម្ដង ហើយរថយន្តនោះក៏បានជ្រុលធ្លាក់ក្បាលចេញពីផ្លូវស្ទើរតែ ធ្លាក់ចូល ប្រឡាយថែមទៀតផង។
ឧប្បត្តិហេតុគ្រោះថ្នាក់ចរាចរនេះបានកើតឡើងកាលពីវេលាម៉ោង៥ល្ងាច ថ្ងៃទី២០ ខែវិច្ឆិកា ឆ្នាំ២០១៨ នៅលើកំណាត់ផ្លូវក្រវាត់ក្រុង(ផ្លូវ៣០ម៉ែត្រ) ស្ថិតនៅក្នុងភូមិទីទុយ សង្កាត់ព្រៃស ខណ្ឌដង្កោ រាជធានីភ្នំពេញ។ ស្ត្រីរងគ្រោះដែលត្រូវរថយន្តកិនស្លាប់នោះមានឈ្មោះ ឆកា ហៅយ៉ាន អាយុ៣១ឆ្នាំ មុខរបរកម្មករនីរោងចក្រ ស្នាក់នៅបន្ទប់ជួលម្តុំផ្សារទួលពង្រ ស្ថិយនៅក្នុងភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ។ តាមប្រភពព័ត៌មានបានឲ្យដឹងថា នៅមុនពេលកើតហេតុ ស្ត្រីរងគ្រោះបានជិះម៉ូតូ១គ្រឿង ម៉ាកហុងដាMSX ពណ៌ខ្មៅ ពាក់ស្លាកលេខ ភ្នំពេញ 1FD-4854 ជាមួយប្ដីចេញពីធ្វើការរោងចក្រត្រឡប់ទៅផ្ទះជួល ដោយធ្វើដំណើរតាមបណ្តោយផ្លូវ៣០ម៉ែត្រ ក្នុងទិសដៅពីកើតទៅលិច។
ខណៈពេលទៅដល់ត្រង់ចំណុចកើតហេតុស្រាប់តែមានរថយន្តក្រុងដឹកភ្ញៀវ ទេសចរណ៍មួយគ្រឿងពណ៌ទឹកប៊ិចពាក់ស្លាកលេខ ភ្នំពេញ 3B-5112 បានបើកបរក្នុងទិសដៅស្របទិស គ្នា យ៉ាងលឿនជ្រុលទៅបុកម៉ូតូជនរងគ្រោះពីក្រោយពេញទំហឹង។ បណ្តាលស្ត្រីជាប្រពន្ធដែលជិះពីក្រោយធ្លាក់ពីលើម៉ូតូខ្ទាតចូលក្រោមកង់រថយន្តកិនបែកក្បាលធ្លាយខួរស្លាប់យ៉ាងអាណោចអាធ័មភ្លាមៗនៅនឹងកន្លែង រីឯប្តីរងរបួសស្រាល។ ប្រភពដដែលបានបន្តទៀតថា ចំណែកម៉ូតូត្រូវបានរថយន្ត អូសជាច្រើនម៉ែត្របណ្តាលឲ្យបែកផ្កាភ្លើងបង្កការឆាបឆេះខ្ទេចមួយកំណាត់មុតែម្តង។
ហើយរថយន្តបង្កក៏បានជ្រុលធ្លាក់ក្បាលពីផ្លូវផងដែរហើយអ្នកបើកបរបានរត់គេចខ្លួនបាត់ លុះក្រោយពេលហេតុនគរបាលខណ្ឌដង្កោបានចុះដល់ទីតាំងកើតហេតុសម្រួលចរាចរមិនឲ្យមានការកកស្ទះ រួចបានទំនាក់ទំនងទៅកាន់នគរបាលការិយាល័យចរាចរផ្លូវគោក នៃស្នងការដ្ឋាននគរបាល រាជធានីភ្នំពេញ ចុះវាស់វែង និងនាំយករថយន្ត និងម៉ូតូទៅរក្សាទុករង់ចាំការដោះស្រាយនៅពេលក្រោយ៕
https://youtu.be/nJXNzdsyD0E
ចែករំលែកព័តមាននេះ