រាជធានីភ្នំពេញ ៖ សន្និសីទស្តីពីអនុសញ្ញាការហាមឃាត់គ្រាប់មីនប្រឆាំងមនុស្សនឹងប្រព្រឹត្តទៅនៅក្រុងហ្សឺណែវសប្តាហ៍ក្រោយ (២៦-៣០ វិច្ឆិកា) ។
សន្និសីទនេះ គឺជាកិច្ចប្រជុំអន្តរជាតិដ៏សំខាន់មួយដែលនឹងពិនិត្យមើលការអនុវត្តន៍នៃការហាមឃាត់ និងការបោសសម្អាតមីននៅជុំវិញពិភពលោក ។ ប្រទេសអូស្ត្រាលី និងប្រទេសកម្ពុជានឹងចូលរួមសន្និសីទនេះដែលនេះជាឱកាសយ៉ាងសំខាន់ ដើម្បីឆ្លុះបញ្ចាំងពីភាពជាដៃគូយូរអង្វែង និងជាក់ស្តែងរបស់យើង ដើម្បីបញ្ចប់គ្រាប់មីន ។ ពីការពិភាក្សាជាន់ខ្ពស់រហូតដល់ការជួយដោះមីននៅលើដីប្រទេសអូស្ត្រាលី និងប្រទេសកម្ពុជាបានធ្វើការរួមគ្នាតាំងពីអនុសញ្ញាបានចាប់ផ្តើម ដើម្បីធានាថា អនុសញ្ញានេះត្រូវបានអនុវត្តប្រកបដោយប្រសិទ្ធភាព ។
ប្រទេសអូស្ត្រាលី គឺជាអ្នកគាំទ្រដ៏យូរអង្វែងចំពោះការដោះមីននៅក្នុងប្រទេសកម្ពុជា ហើយបានចូលរួមចំណែកតាមរយៈការផ្តល់ជំនួយជាងមួយរយលានដុល្លារអូស្ត្រាលីចាប់តាំងពីពាក់កណ្តាលទសវត្សឆ្នាំ១៩៩០មក ។ ជំនួយរបស់ប្រទេសអូស្ត្រាលីបានជួយសង្គ្រោះជីវិត និងកាត់បន្ថយរបួសជាច្រើន ។ ប្រទេសអូស្ត្រាលីបានជួយសំអាតដីដែលមានគ្រាប់មីនរាប់រយគីឡូម៉ែត្រការ៉េដែលអនុញ្ញាតឱ្យប្រជាជនកម្ពុជាកាន់តែច្រើនទៀតរស់នៅដោយសុវត្ថិភាព និងកសាងជីវភាពរបស់ពួកគេឡើងវិញ ។
លោកស្រី Angela Corcoran ឯកអគ្គរដ្ឋទូតអូស្ត្រាលីបានមានប្រសាសន៍ថា «ក្នុងនាមជាអ្នកជិតខាង និងជាមិត្តរបស់ប្រជាជនកម្ពុជាអូស្ត្រាលីមានសេចក្តីរីករាយក្នុងការធ្វើជាដៃគូសំខាន់ក្នុងកិច្ចខិតខំប្រឹងប្រែងដោះមីន» ។ លោកស្រីបានបន្ថែមថា« ក្រៅពីជួយដល់ប្រជាជនដែលត្រូវការជំនួយប្រទេសអូស្ត្រាលីមានសេចក្តីសោមនស្សរីករាយដែលភាពជាដៃគូដោះមីនរបស់យើងកំពុងតែជួយប្រទេសកម្ពុជាក្នុងការអនុវត្តច្បាប់ និងបទដ្ឋានអន្តរជាតិផងដែរ ។ សកម្មភាពនេះមានសារៈសំខាន់សម្រាប់ស្ថិរភាព និងសន្តិសុខនាពេលអនាគតរបស់តំបន់ឥណ្ឌូ – ប៉ាស៊ីហ្វិករបស់យើង» ។
ឯកឧត្ដម លីធុច ទេសរដ្ឋមន្ត្រីកម្ពុជាដែលជាអនុប្រធានអាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន គឺជាអ្នកគាំទ្រយ៉ាងខ្លាំងចំពោះជំនួយរបស់ប្រទេសអូស្ត្រាលីក្នុងការដោះមីន ៕
ចែករំលែកព័តមាននេះ