រាជធានីភ្នំពេញ ៖ គណៈកម្មការអប់រំ យុវជនកីឡាធម្មការ កិច្ចការសាសនា វប្បធម៌ និងទេសចរណ៍ (គ៧) បានជំរុញដល់ក្រសួងអប់រំយុវជន និងកីឡាត្រូវអនុវត្តគោលនយោបាយ អប់រំប្រជាពលរដ្ឋក៏ដូចជា សិស្សនិស្សិតឲ្យបានគ្រប់ជ្រុងជ្រោយ ។
ការជំរុញធ្វើឡើងក្នុងជំនួបពិភាក្សាលោក ហ៊ុន ម៉ានី ជាប្រធាន (គ៧) បានដឹកនាំកិច្ចប្រជុំ ជាមួយលោក ហង់ ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា និងសហការី ដើម្បីពិភាក្សាលើរបៀបវារៈចំនួន២រួមមាន (១) ការរៀបចំផែនការយុទ្ធសាស្ត្រក្នុងវិស័យអប់រំ យុវ ជនកីឡា ដើម្បីឆ្លើយតបទៅនឹងយុទ្ធសាស្ត្រចតុកោណដំណាក់កាលទី៤ និង (២) គោល នយោបាយស្តីអំពីសាលារៀនជំនាន់ថ្មី កាលពីល្ងាចថ្ងៃទី១៩ វិច្ឆិកា នៅវិមានរដ្ឋសភា ។ លោក ហ៊ុន ម៉ានី ប្រធានគណៈកម្មការទី៧ បានលើកឡើងថា ការរៀបចំគោលនយោបាយគ្រប់ជ្រុងជ្រោយឆ្លើយតបទៅនឹងយុទ្ធសាស្ត្រចតុកោណដំណាក់កាលទី៤ គឺជាកត្តាសំខាន់ ប៉ុន្តែអ្វីដែលសំខាន់បំផុតនោះ គឺលទ្ធផលជាផ្លែផ្កានៃការអនុវត្តគោលនយោបាយនោះធ្វើយ៉ាងណា ដើម្បីបំពេញសេចក្តីត្រូវការក្តីសង្ឃឹម និងភាពជឿជាក់ដល់ម្ចាស់ឆ្នោតដែលបានផ្តល់សេចក្តីទុកចិត្ត តាមរយៈការបោះឆ្នោតជូនគណបក្សប្រជាជនកម្ពុជាឱ្យដឹកនាំប្រទេសជាតិជាបន្តទៀត ។
អង្គប្រជុំបានធ្វើការកត់សម្គាល់នូវវឌ្ឍនភាពជាច្រើននៅក្នុងវិស័យអប់រំ យុវជន និងកីឡា ក្រោមការដឹកនាំរបស់លោករដ្ឋមន្ត្រី នាពេលកន្លងមកដែលក្នុងនោះរួមមានការកែទម្រង់វិស័យអប់រំ ជាលក្ខណៈប្រព័ន្ធ តាមរយៈការរៀបចំកម្មវិធីសិក្សាថ្មី កំណែទម្រង់ការប្រលង គ្រប់កម្រិត ជាពិសេសការប្រលងមធ្យមសិក្សាទុតិយភូមិ (បាក់ឌុប) ការរៀបចំបណ្តុះបណ្តាល និងការរៀបចំគន្លងអាជីពរបស់គ្រូបង្រៀន និងគំនិតផ្តួចផ្តើមបង្កើតសាលារៀនជំនាន់ថ្មី ដើម្បីឆ្លើ យតបទៅនឹងបរិបទអប់រំសម័យទំនើប និងស្របតាមអាទិភាពនៃការអភិវឌ្ឍធនធានមនុស្ស របស់រាជរដ្ឋាភិបាល ។
ប៉ុន្តែទន្ទឹមនឹងភាពជោគជ័យខាងលើ គណៈកម្មការទី៧ និងក្រសួងអប់រំ យុវជន និងកីឡា បានពិនិត្យ សិក្សា និងពិភាក្សាលើគោលនយោបាយ និងយុទ្ធសាស្ត្រ ដើម្បីបង្កើនប្រសិទ្ធភាពនៃការអនុវត្តការងាររបស់វិស័យរួមមាន១ យុទ្ធសាស្ត្រកំណែទម្រង់ការគ្រប់គ្រងវិស័យអប់រំដើម្បីលើកកម្ពស់ភាពជាពលរដ្ឋមានគុណភាពនៅកម្ពុជាដែលមានយុទ្ធសាស្ត្រគោល៤ចំណុច រួមមានកំណែទម្រង់ ការគ្រប់គ្រង ការសិក្សា កំណែទម្រង់ការគ្រប់គ្រងរដ្ឋបាល កំណែទម្រង់ ការគ្រប់គ្រងហិរញ្ញវត្ថុ និងកំណែទម្រង់ ការគ្រប់គ្រងធនធានមនុស្ស ។ ២ យុទ្ធសាស្ត្រកំណែទ ម្រង់ការអភិវឌ្ឍយុវជនដែលផ្តល់ឱកាសឱ្យយុវជនទទួលបានការអប់រំ បណ្តុះបណ្តាល ជំនាញ វិជ្ជាជីវៈ និងលើកទឹកចិត្តយុវជនឱ្យមានគំនិតច្នៃប្រឌិតលើជំនាញរបស់ខ្លួន ដើម្បីឆ្លើយតបទៅ នឹងទស្សនាទានរបស់រដ្ឋាភិបាល «យុវជនម្នាក់មានជំនាញមួយយ៉ាងតិចប្រចាំជីវិត» និង៣. យុទ្ធសាស្ត្រកំណែទម្រង់ការអភិវឌ្ឍវិស័យអប់រំកាយ និងកីឡាតាមរយៈការអភិវឌ្ឍក្របខណ្ឌច្បាប់ ការអភិវឌ្ឍកីឡាកម្រិតខ្ពស់ អភិវឌ្ឍកីឡាសម្រាប់ទាំងអស់គ្នាអភិរក្ស និងអភិវឌ្ឍ កីឡាគ្រប់ប្រភេទ និងអភិវឌ្ឍឧស្សាហកម្មកីឡា ។
លោកហ៊ុន ម៉ានី ប្រធានគណៈកម្មការទី៧ នៃរដ្ឋសភាក៏បានកត់សម្គាល់នូវការអនុវត្តគោលន យោបាយស្តីពីសាលារៀនជំនាន់ថ្មី ដែលជាការឆ្លើយតបទៅនឹងយុទ្ធសាស្ត្រចតុកោណដំណាក់កាលទី៤ ហើយក៏ជាការឆ្លើយតបទៅនឹងការអប់រំសម័យទំនើប បើទោះជាយន្តការក្នុងការ អនុវត្តគោលនយោបាយនេះនៅមិនទាន់មានភាពរលូនទាំងស្រុងក៏ដោយ ។
គណៈកម្មការទី៧ ចាត់ទុកជាវេទិកាសន្ទនាដ៏មានប្រសិទ្ធភាពមួយក្នុងការសហការកែលម្អ និងជំរុញការអនុវត្តការងារក្នុងវិស័យអប់រំ យុវជន និងកីឡា ដើម្បីបំពេញសេចក្តីត្រូវការរបស់ម្ចាស់ឆ្នោត ជាពិសេសយុវជនលោកគ្រូ អ្នកគ្រូ បុគ្គលិកអប់រំ មាតា បិតា អាណាព្យាបាលសិស្សក៏ដូចជា សង្គមជាតិទាំងមូល ។
សូមជម្រាបថា កិច្ចប្រជុំនេះត្រូវបានរៀបចំឡើងអនុលោមតាមមាត្រា៩៧នៃរដ្ឋធម្មនុញ្ញ និង ប្រការ៣៤ថ្មី នៃបទបញ្ជាផ្ទៃក្នុងរដ្ឋសភា ៕
ចែករំលែកព័តមាននេះ