ខេត្តកោះកុង ៖ លិខិតមួយច្បាប់ពីអ្នកនេសាទសមុទ្រខ្មែរនៅខេត្តកោះកុងបានរៀបរាប់ពីមុខរបរនេសាទរបស់ខ្លួនជួបការលំបាកជួបឧបសគ្គស្ទើរដាច់បាយដោយសារតែការឈ្លានពានយ៉ាងអនាធិបតេយ្យពីទូកនេសាទសមុទ្ររបស់ថៃពេញលើផ្ទៃកោះកុងខ្មែរទៅហើយ ។
ក្នុងលិខិតរៀបរាប់ថា រាល់ៗយប់មានទូកនេសាទថៃសុទ្ធតែជាទូកធំៗទំនើបអូសគូពេញលើផ្ទៃសមុទ្រខេត្តកោះកុង ។ ពេលយប់មិនទាន់ទេ លើផ្ទៃសមុទ្រមានភ្លើងហ្វាភ្លឺចាំងចែង ប្រៀបដូចទីក្រុងទំនើបមួយអណ្តែតលើសមុទ្រ ។ លុះព្រឹកឡើងផលនេសាទត្រូវគេយកទៅបោះដុំឲ្យក្រុមហ៊ុនធំមួយ ក្នុងខេត្តកោះកុង ប្រមូលទិញយកទៅប្រទេសថៃ ។
ចំណែកទូកនេសាទខ្មែរតូចៗ គ្មានឧបករណ៍ទំនើបដូចគេទេនេសាទនៅមួយកន្លែងអត់ហ៊ានទៅជិតតំបន់ដែលទូកថៃកំពុងនេសាទអូសគូនោះទេ ។
ក្រុមអ្នកនេសាទខ្មែរត្អូញត្អែរថា ខ្មែរនេសាទត្រីក្នុងសមុទ្របានតែមួយរស់ៗប៉ុណ្ណោះធ្វើម៉េចមានទុនទិញអាទំនើបដូចទូកបរទេសទេ ម៉ោះហើយក្រនៅតែក្រ ។ ពួកគេសំណូមពឲ្យប៉ូលិសការពារព្រំដែនសមុទ្រកុំបើកដៃពេកកុំគិតតែប្រមូលប្រាក់បាតពេក និងសុំឲ្យឈប់រកស៊ីបង់ខែក្បាលទូកនេសាទថៃទៀតទៅ ។ ច្រើនឆ្នាំមកហើយល្មមឈប់ទៅ ។
បើនិយាយពីទូកនេសាទបរទេសដែលគេចោទជាទូកបរទេសថៃ និងទូកនេសាទវៀតណាម រាប់រយគូ…ខ្លះទៅមិនតិចពី៤០០ទៅ៥០០គូទេមានច្បាប់អនុញ្ញាតក្រៅខោ…ដែលប្រមូលប្រាក់ម្តងៗមានកន្លះបាវ ។
មន្ត្រីគយម្នាក់នៅខេត្តកោះកុងប្រាប់ថា មិនមែនតែគយចើងទឹកទេដែលបានពាក់ព័ន្ធ ពិតមែន មានឈ្មោះក្នុងគណកម្មការចម្រុះក្នុងនោះមានមន្ត្រីនរគបាលជើងទឹកជាមេ ដែលបើកដៃកត់ក្បាលទូកចុះបញ្ជីទទួលស្គាល់ ។
ចំណែកមន្ត្រីម្នាក់នៅរដ្ឋបាលខេត្តកោះកុងឆ្លើយថា រឿងនេះខេត្តក៏ដឹងដែរ ប៉ុន្តែធំបំផុតលើនរគបាលជើងទឹក ព្រោះគេមានសិទ្ធិក្នុងសមុទ្រ ។
យើងនឹងផ្សាយបន្តទៀត ពេលណាមានប្រតិកម្មពីម្ចាស់សមុទ្រដែលបើកទ្វារឲ្យទូកនេសាទបរទេសឈ្លានពាននេះនៅពេលក្រោយទៀត ៕
ចែករំលែកព័តមាននេះ