តាមប្រភពព័ត៌មាន Shanghaiist បានឲ្យដឹងថា គ្រូប្រុសម្នាក់នៅវិទ្យាល័យមួយក្នុងទីក្រុង Wenling បានកត់ត្រាថ្ងៃមករដូវរបស់សិស្សស្រីៗទាំងអស់នៅក្នុងថ្នាក់ ហើយបិតនៅលើជញ្ជាំងថ្នាក់ ដើម្បីឲ្យគ្រប់គ្នាបានឃើញ ។ គាត់ធ្វើបែបនេះដោយសារតែហេតុផលមួយដែលយើងមិននឹកស្មានដល់ ។
គ្រូប្រុសអាយុ៣៨ឆ្នាំ ឈ្មោះ Mo Qunli តែងតែកត់ត្រាថ្ងៃមករដូវរបស់សិស្សស្រីទាំងអស់ក្នុងថ្នាក់ អស់រយៈពេលប៉ុន្មានឆ្នាំមកនេះ ។ គាត់ធ្វើបែបនេះដោយសារតែគាត់ចង់ជួយសម្រួលដល់ការរៀនសូត្ររបស់ពួកគេនៅចំថ្ងៃដែលពួកគេមករដូវ ។
កន្លងមកលោកគ្រូ Mo បានឃើញថា សិស្សស្រីខ្លះតែងតែមិនអាចផ្តោតអារម្មណ៍រៀន ឬធ្វើលំហាត់ប្រាណបានដោយសារតែមករដូវ ។ ពួកគេមានការខ្មាស់អៀនមិនហ៊ានប្រាប់នរណាទេ ដែលជាហេតុធ្វើឲ្យមិនមានការយោគយល់ ។
ដល់ពេលនេះលោកគ្រូក៏បានអនុវត្តការកត់ត្រាទុក ហើយបិតប្រកាសនៅក្នុងថ្នាក់ ដើម្បីឲ្យសិស្សទាំងស្រីទាំងប្រុសអាចជួយមើលថែគ្នា ។ លោកគ្រូ Mo តែងតែកូរស្ករត្នោតឲ្យអ្នកមករដូវផឹកជារៀងរាល់ខែ ដើម្បីកាត់បន្ថយការឈឺចាប់ពេលថ្ងៃពិសេស ។ សិស្សប្រុសខ្លះក៏បានធ្វើតាមលោកគ្រូដែរ ។
បើទោះបីជាគោលបំណងរបស់លោកគ្រូល្អក៏ដោយក៏នៅតែមានពាក្យរិះគន់ថា ទង្វើនេះ គឺជាទង្វើរបស់ព្រាននារី ។ តែលោកគ្រូមិនអើពើនឹងពាក្យសម្តីបែបនេះឡើយដោយសារតែលោកគ្រូប្រកាន់ខ្ជាប់នូវគោលគំនិតជាឪពុកសម្រាប់សិស្សទាំងអស់គ្នា ៕
ចែករំលែកព័តមាននេះ