រាជធានីភ្នំពេញ ៖ បន្ទាប់ពីប្រតិកម្មរបស់សម្តេចតេជោភ្លាមៗនៅក្នុងជំនួបជាមួយលោក វីល្លៀម ហែត ឯកអគ្គរដ្ឋទូតអាមេរិកនារសៀលថ្ងៃទី១៩ ខែវិច្ឆិកា ឆ្នាំ២០១៨ នៅទីស្តីការក្រសួងការបរទេស និងសហប្រតិបត្តិការអន្តរជាតិ…
រាជធានីភ្នំពេញ ៖ បន្ទាប់ពីប្រតិកម្មរបស់សម្តេចតេជោភ្លាមៗនៅក្នុងជំនួបជាមួយលោក វីល្លៀម ហែត ឯកអគ្គរដ្ឋទូតអាមេរិកនារសៀលថ្ងៃទី១៩ ខែវិច្ឆិកា ឆ្នាំ២០១៨ នៅទីស្តីការក្រសួងការបរទេស និងសហប្រតិបត្តិការអន្តរជាតិ លោកឧបនាយករដ្ឋមន្ត្រីប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានថ្លែងប្រាប់ឯកឧត្តមឯកអគ្គរដ្ឋទូតអាមេរិកដែលបានចូលជួបជម្រាបលាក្នុងពេលដែលឯកឧត្តមទូតបញ្ចប់បេសកកម្មនៅកម្ពុជាថា«កម្ពុជាអនុវត្តតឹងរឹង គ្មានមូលដ្ឋានយោធាបរទេសណាមួយនៅកម្ពុជាដូចសារព័ត៌មានបរទេសសរសេរនោះទេ ហើយសម្តេចតេជោហ៊ុនសែនក៏បានលើកឡើងដែរ នៅព្រឹកថ្ងៃទី១៩ វិច្ឆិកា ឆ្នាំ២០១៨ ក្នុងពេឡប្រជុំគណៈរដ្ឋមន្ត្រី» ។
ថ្លែងប្រាប់អ្នកសារព័ត៌មានក្រោយពីជំនួបជិត១ម៉ោងរវាងលោកឧបនាយករដ្ឋមន្ត្រីប្រាប់ សុខុននិងឯកឧត្តមវីល្លៀម ហែត នាល្ងាចថ្ងៃទី១៩ ខែវិច្ឆិកា ឆ្នាំ២០១៨ លោកកេត សុផាន់ អ្នកនាំពាក្យក្រសួងការបរទេសបានបញ្ជាក់ថា លោកឧបនាយករដ្ឋមន្ត្រីបានថ្លែងកោតសសើរចំពោះការខិតប្រឹងប្រែទំនាក់ទំនងទ្វេភាគីនៃប្រទេសទាំងពីរ និងជាពិសេសជម្រុញកិច្ចសហប្រតិបត្តិការលើវិស័យសេដ្ឋកិច្ច និងជម្រុញប្រព័ន្ធអនុគ្រោះពន្ធសម្រាប់ការនាំទំនិញពីកម្ពុជាទៅអាមេរិក ។ នៅឆ្នាំនេះសង្ឃឹមថា បរិមាណទំហំពាណិដ្ឋកម្មរវាងប្រទេសទាំងពីរកើនដល់៥០០លានដុល្លារអាមេរិក ។ លោកឧបនាយករដ្ឋមន្ត្រីបានថ្លែងប្រាប់ឯកអគ្គរដ្ឋទូតអាមេរិកដែលត្រូវបញ្ចប់បេសកកម្មរូបនេះដែរថា នាពេលថ្មីៗនេះមានសារព័ត៌មានចុះផ្សាយពីមូលដ្ឋានកងទ័ពនៅកម្ពុជា និងការលើកឡើងរបស់សម្តេចតេជោថា«កម្ពុជាអនុវត្តយ៉ាងមឺងម៉ាត់ មិនអនុញ្ញាតឲ្យមានទីតាំងយោធាបរទេស ឬក៏បញ្ជូនយោធាទៅបរទេសទេ ហើយមានតែបេសកកម្មរក្សាសន្តិភាពជាមួយអង្គការសហប្រជាជាតិ ។
ឧបនាយករដ្ឋមន្ត្រីប្រាប់សុខុនបានថ្លែងថា កម្ពុជាបានត្រៀមស្វាគមន៍ចំពោះទូតថ្មីដែលនឹងមកបំពេញការងារដែលតាមការឲ្យដឹង គឺលោកបា ទ្រិច ម៉ត់ហ្វី ដែលពេលលោកកំពុងតែស្ថិតនៅក្នុងការសម្រេចរបស់ព្រឹទ្ធសភាអាមេរិក ។ តែយ៉ាងណាឯកឧត្តមនាយកមន្ត្រីបានត្រៀមសហប្រតិបត្តិការជាមួយទូតថ្មីផងដែរ ។ លោកឧបនាយករដ្ឋមន្ត្រីបានថ្លែងថា ចំណងមិត្តភាពការទូតនៃប្រទេសទាំងពីរនៅតែបន្តរីកចម្រើន ហើយរាល់ជំនួបរវាងឯកឧត្តមឧបនាយករដ្ឋមន្ត្រីជាមួយថ្នាក់ដឹកនាំអាមេរិកនៅអាមេរិក និងកន្លែងនានា គឺប្រទេសទាំងពីរតែងតែបើកចំហនៃទំនាក់ទនង ។
ជាការឆ្លើយតបឯកឧត្តមឯកអគ្គរដ្ឋទូតអាមេរិកបានថ្លែងថា នេះជាការចាកចេញរបស់ឯកឧត្តមជាលើកទីពីរ និងការចាកចេញរបស់ភរិយារបស់ឯកឧត្តមជាជនជាតិខ្មែរជាលើកទី៣ដោយក្តីអាណោះអាល័យ ។ ឯកឧត្តមទូតបញ្ជាក់ថា សូមអរគុណចំពោះឯកឧត្តមឧបនាយករដ្ឋមន្ត្រីដែលតែងតែស្វាគមន៍ និងពិភាក្សាដោយបើកចំហជាមួយលោក ។ ឯកឧត្តមឯកអគ្គរដ្ឋទូតថា«ខ្ញុំសង្ឃឹមថា ឯកឧត្តមឧបនាយករដ្ឋមន្ត្រីនឹងដឹកនាំក្រសួងការបរទេសមួយបានល្អ និងដោយបើកចំហ » ៕
ចែករំលែកព័តមាននេះ