ខេត្តកណ្ដាល ៖ បុរសម្នាក់មានជំងឺប្រចាំកាយធ្ងន់ធ្ងររយៈពេលជិត១០ឆ្នាំកន្លងមកហើយ តែទោះជាខិតខំព្យាបាល យ៉ាងណាក៏មិនបានជាដែរ ដែលជាហេតុធ្វើឲ្យគាត់ខូចចិត្ត និងអស់សង្ឃឹមក្នុងជីវិតរហូតលែងចង់រស់តទៅទៀត។ បន្ទាប់មកគាត់តែងតែបានព្យាយាមធ្វើអត្តឃាតដោយចងកសម្លាប់ខ្លួនម្ដងហើយម្ដងទៀតចំនួន៣លើក ប៉ុន្តែត្រូវបានកូនៗជួយសង្គ្រោះ ទាន់បាន២លើកទើបមិនស្លាប់។ លុះដល់លើកទី៣នេះ គាត់បានដេញប្រពន្ធឲ្យ ចេញពីក្នុងផ្ទះដោយប្រាប់ថា គាត់ចង់នៅស្ងៀមស្ងាត់ម្នាក់ឯង ហើយគ្រាន់តែប្រពន្ធចេញផុតបន្តិច គាត់ក៏ចងកសម្លាប់ខ្លួនឯងបណ្ដាលឲ្យស្លាប់តាមបំណងតែម្ដង។ ហេតុការណ៍នោះបានកើតឡើងកាលពី វេលាម៉ោង១១ និង៣៥នាទីថ្ងៃត្រង់ ថ្ងៃទី១៩ ខែវិច្ឆិកា ឆ្នាំ២០១៨ នៅក្នុងភូមិគីរីថ្មី ឃុំសំរោងលើ ស្រុកអង្គស្នួល ខេត្តកណ្តាល។
បុរសរូបនោះឈ្មោះ គឹម គុម អាយុ៦៤ឆ្នាំ ជនជាតិខ្មែរ មុខរបរកសិករ រស់នៅក្នុងភូមិកើតហេតុខាងលើ។ ស្ត្រីឈ្មោះ វ៉ាន យឿង អាយុ៦៥ឆ្នាំ ជនជាតិខ្មែរ មុខរបរកសិករត្រូវជាប្រពន្ធ បានឲ្យដឹងថា ប្តីរបស់គាត់មានជំងឺប្រចាំកាយរយៈពេលប្រហែល៨ទៅ៩ឆ្នាំកន្លងមកហើយ បើទោះបីជាលេបថ្នាំ ព្យាបាលជាប្រចាំជារៀងរាល់ថ្ងៃយ៉ាងណាក៏ដោយ ក៏មិនបានជាសះស្បើយឡើយ។ ដោយសារតែពិបាកក្នុងខ្លួនផង និងមិនចង់ឲ្យលំបាកដល់ក្រុមគ្រួសារផងនោះប្ដីគាត់តែងតែគិតខ្លីលែងចង់រស់ដោយព្យាយាមធ្វើអត្តឃាតដោយចងកម្ដងហើម្ដងទៀតចំនួន៣មកហើយ។ ប៉ុន្តែកាលពីលើកទី១ និងទី២ត្រូវ បានកូនៗទៅជួយទាន់ លុះលើកទី៣នៅថ្ងៃទី១៩ ខែវិច្ឆិកា ឆ្នាំ២០១៨ ទើបចងកបានសម្រេច។
ស្ត្រីខាងលើបានបន្តទៀតថា នៅមុន ពេលកើតហេតុខណៈកូនៗមិននៅផ្ទះគាត់បាននៅក្នុងផ្ទះជាមួយប្ដី និងមិនហ៊ានទៅណាចោលឡើយព្រោះខ្លាចប្ដី សម្លាប់ខ្លួន។ ប៉ុន្តែក្រោយមកប្ដីបាន ដេញឲ្យគាត់ចេញក្រៅផ្ទះដោយប្រាប់ថាចង់នៅស្ងៀមស្ងាត់ម្នាក់ឯង ពេលនោះគាត់គិតថាអ្នកឈឺមានអារម្មណ៍ធុញថប់ពិតជាចង់នៅស្ងៀមស្ងាត់មែនហើយ គាត់ក៏បានចេញទៅអង្គុយលេងនៅមុខផ្ទះ។ លុះមួយសន្ទុះធំក្រោយមកទើបគាត់ ដើរទៅក្នុងផ្ទះវិញ ស្រាប់តែឃើញ ប្ដីចងក ដោយយកខ្សែគោចងជាប់នឹងធ្នឹមផ្ទះ។ ខណៈនោះគាត់មានការតក់ស្លុតយ៉ាងខ្លាំងរកទីបំផុតគ្មាន និងបានស្រែកហៅកូនៗ និងអ្នកជិតខាងឲ្យទៅជួយដាក់ចុះដើម្បីនាំទៅសង្គ្រោះ ប៉ុន្តែប្ដីគាត់ បានស្លាប់បាត់ទៅហើយ។
នគរបាលបានឲ្យដឹងថា ក្រោយពេលកើតហេតុ កម្លាំងនគរបាលផ្នែកពិនិត្យ និងវិភាគកន្លែងកើតហេតុនៃអធិការដ្ឋាន នគរបាលស្រុកអង្គស្នួលបានចុះទៅកាន់កន្លែងកើតហេតុ។ បន្ទាប់មក ដោយមាន ការចូលរួមពីមន្ត្រីក្រុមប្រឹក្សាឃុំសំរោងលើ លោកគ្រូពេទ្យ លោក មេភូមិនគរបាលប៉ុស្តិ៍សំរោងលើ រួមជាមួយប្រពន្ធ និងកូន ព្រមទាំងបងប្អូន សពផងបានធ្វើការពិនិត្យ កោសល្យវិច័យ ប៉ុន្តែមិនមានស្លាកស្នាមអ្វីទេ នៅលើខ្លួនសពឡើយ គឺបុរសនេះពិតជាស្លាប់ដោយសារការធ្វើ អត្តឃាត ចងកសម្លាប់ខ្លួនពិតប្រាកដមែន៕
ចែករំលែកព័តមាននេះ