រាជធានីភ្នំពេញ ៖ បុរសម្នាក់ត្រូវបានប្រជាពលរដ្ឋឃាត់ខ្លួនប្រគល់អោយសមត្ថកិច្ចនាំយកទៅធ្វើត្រាប់ និងរុករកវត្ថុតានៅកន្លែងកើតហេតុ កាលពីវេលារសៀលថ្ងៃទី១៩ ខែវិឆ្ឆិកា ឆ្នាំ២០១៨ បន្ទាប់ពីធ្វើសកម្មភាពលួចតភ្លើងឆក់ត្រីនៅក្នុងស្រះមួយកន្លែង ហើយទុកចោលបណ្តាលអោយឆក់ក្មេងប្រុសអាយុ១១ឆ្នាំម្នាក់ស្លាប់។
ហេតុការណ៍ក្មេងប្រុសម្នាក់រត់លេងហើយជាន់ខ្សែភ្លើង បណ្តាលឱ្យឆក់ស្លាប់នេះបានកើតឡើងតាំងពីវេលាម៉ោង៣រសៀលថ្ងៃទី១៣ ខែវិច្ឆិកា ឆ្នាំ២០១៨ នៅក្នុងតំបន់អភិវឌ្ឍន៍ ឬស្សីកែវក្នុងភូមិ បឹងឈូក សង្កាត់គីឡូម៉ែត្រ លេខ៦ ខណ្ឌឬស្សីកែវ ។
ជនសង្ស័យដែលត្រូវឃាត់ខ្លួនឈ្មោះនុត សុផាន់ណា ភេទប្រុស អាយុ៣២ឆ្នាំ ជាជាងផ្សារដែក មានលំនៅផ្ទះលេខ២៤៧ ផ្លូវលេខ៥៩៨ ភូមិទួលពពែ សង្កាត់ទួលសង្កែ ទី២ខណ្ឌឬស្សីកែវ ។
ចំណែកជនរងគ្រោះដែលស្លាប់ឈ្មោះ ខា ស៊ីថុង ភេទប្រុស អាយុ១១ឆ្នាំ មានឪពុកឈ្មោះឥត ស៊ីថា ជាកម្មករសំណង់ និងជាអ្នកចាំដីអោយគេនៅក្បែរកន្លែងកើតហេតុ ។
តាមប្រជាពលរដ្ឋបានអោយដឹងថា នៅវេលាម៉ោងប្រមាណ៣រសៀលថ្ងៃទី១៣ ខែ វិឆ្ឆិកា មានការភ្ញាក់ផ្អើល ដោយសារតែក្មេងប្រុសរងគ្រោះបានរត់លេងក្នុងដីឡូតិ៍ក្បែរភូមិជាន់ខ្សែភ្លើង ដែលគេទុកចោល បណ្តាលឱ្យឆក់ ។
ភ្លាមៗនោះប្រជាពលរដ្ឋក៏បាននាំគ្នាជួយសង្គ្រោះ និងបញ្ជូនក្មេងប្រុសរងគ្រោះទៅកាន់មន្ទីរពេទ្យកុមារជាតិដែរ តែជាអកុសលក្មេងប្រុសរងគ្រោះបានស្លាប់បាត់ទៅហើយ ឪពុកម្តាយពុំបានដាក់ពាក្យបណ្តឹងនោះទេ ។
លុះនៅព្រឹកថ្ងៃទី១៩ ខែវិច្ឆិកា ក៍បានប្រទះឃើញជនសង្ស័យដែលធ្លាប់លួចតភ្លើងកំពុងតែអង្គុយមើលគេស្ទួចត្រីក៍ឃាត់ខ្លួនប្រគល់អោយនគរបាលតែម្តង ។
ក្រោយការឃាត់ខ្លួន ជនសង្ស័យបានសារភាពថា កាលពីវេលាម៉ោងប្រមាណ៨ព្រឹកថ្ងៃទី១៣ ខែវិច្ឆិកា ឆ្នាំ២០១៨ ខ្លួនបានលួចភ្លើងប្រជាពលរដ្ឋនៅកន្លែងកើតហេតុដើម្បីឆក់ត្រី ។ ពេលឆក់បានត្រីហើយ ក៍បានទុកចោល ហើយខ្លួនមិនដឹងថាឆក់ក្មេងនោះទេ ។ នៅពេលធ្វើដំណើរ មកលេងនៅក្បែរនោះក៍ស្រាប់តែត្រូវបានគេឃាត់ខ្លួនតែម្តង។
ជនសង្ស័យបានសារភាពអោយដឹងទៀតថា កន្លងមក ខ្លួនធ្លាប់លួចតភ្លើងដើម្បីឆក់ត្រីចំនួន២លើកមកហើយ ។
បន្ទាប់ពីឃាត់ខ្លួន ជនសង្ស័យត្រូវបាននគរបាលនាំទៅធ្វើត្រាប់និងរុករកវត្ថុតាងនៅកន្លែងកើតហេតុរកឃើញមានខ្សែភ្លើង និងដងសម្រាប់ឆក់ត្រីជាវត្ថុតាងផងដែរ ៕
ចែករំលែកព័តមាននេះ