ប្រទេសអីុស្រាអែល ៖ នាយករដ្ឋមន្ត្រីអីុស្រាអែល លោកបេនចាមីននេតាន់យ៉ាហ៊ូ កាលពីថ្ងៃទី១៨ វិច្ឆិកា ២០១៨ បានបរិហារការអំពាវនាវឲ្យមានការបោះឆ្នោតមុនកាលកំណត់ថា ជាការខ្វះការទទួលខុសត្រូវ ខណៈប្រទេសលោកកំពុងជួបប្រទះវិបត្តិនយោបាយ ដែលគំរាមកំហែងដល់រដ្ឋាភិបាលរបស់លោក។
ថ្លែងតាមទូរទស្សន៍ទៅកាន់ប្រជាជាតិ នៅឯក្រសួងការពារប្រទេសក្រុងតែលអាវីវ លោកនេតាន់យ៉ាហ៊ូ បានការពារ នយោបាយសន្តិសុខរបស់លោក ហើយអះអាងថា លោកនឹងខិតខំបញ្ចុះបញ្ចូលបណ្ដាដៃគូឲ្យស្ថិតក្នុងរដ្ឋាភិបាលចម្រុះ។ នាយករដ្ឋមន្ត្រីរូបនេះដែលបង្ហាញការប្រឆាំងជាប់របស់លោក ចំពោះការបោះឆ្នោតមុនកាលកំណត់នោះថ្លែងថា បោះឆ្នោតមុនកាលកំណត់នាពេលនេះ នឹងជាការខ្វះការទទួលខុសត្រូវ។សន្តិសុខរបស់រដ្ឋត្រូវនៅពីលើការវាយតម្លៃនានាខាងនយោបាយ។
វិបត្តិនយោបាយនៅអីុស្រាអែល ចាប់ផ្ដើមពីថ្ងៃទី១៤ វិច្ឆិកា មក ជាមួយការសុំលាលែងរបស់រដ្ឋមន្ត្រីការពារប្រទេសលោក AVIGDOR LIEBERMAN។ ក្រោយការលាលែងរបស់លោក LIEBERMAN និងការដើរចេញរបស់គណបក្សលោកគឹគណបក្សជាតិនិយមជ្រុល BEITENOU ក្រុមចម្រុះរបស់លោកនេតាន់យ៉ាហ៊ូ មានសំឡេងលើសគេត្រឹម១កៅអីប៉ុណ្ណោះក្នុងសភាដែលមាន១២០កៅអី៕
ចែករំលែកព័តមាននេះ