រាជធានីភ្នំពេញ ៖ អ្នកនាំពាក្យក្រសួងការពារជាតិបានលើកឡើងថា នាពេលថ្មីៗនេះសារព័ត៌មានបរទេសចំនួនបានចម្លងគ្នាផ្សព្វផ្សាយដោយគ្មានប្រភពច្បាស់លាស់ថា ប្រទេសដទៃមានបំណងប្រើប្រាស់ទឹកដីកម្ពុជាធ្វើមូលដ្ឋានយោធាសំចតនាវាចម្បាំង ហើយកម្ពុជាកំពុងស្ថិតនៅចំណុចកណ្តាលនៃអាស៊ានរវាងចិន និងអាមេរិកជាដើម ។
នេះបើតាមសេចក្តីប្រកាសព័ត៌មានរបស់ក្រសួងការពារជាតិកាលពីថ្ងៃទី១៧ ខែវិច្ឆិកា ឆ្នាំ២០១៨ ដោយក្រសួងការពារជាតិបានលើកឡើងថា នេះគ្រាន់តែជាដំណឹងក្លែងក្លាយ (Fake News) ដែលក្រុមបរទេសមួយចំនួនព្យាយាមផ្សព្វផ្សាយចោទប្រកាន់មកលើកម្ពុជាក្នុងចេតនាអាក្រក់ញុះញង់ដើម្បីបំភាន់សារធាណជនជាតិ-អន្តរជាតិ និងចេតនាបំផ្លាញឯករាជ្យភាព អព្យាក្រឹត អចិន្ត្រៃ៍របស់កម្ពុជាតែប៉ុណ្ណោះ ។
ក្រសួងការពារជាតិបានលើកឡើងថា ព្រះរាជាណាចក្រកម្ពុជា ដែលជារដ្ឋឯករាជ្យ អព្យាក្រឹត អចិន្ត្រៃយ៍ មិនចូលបក្សសម្ព័ន្ធដូចបានចែងក្នុងមាត្រា៥៣ថ្មីនៃរដ្ឋធម្មនុញ្ញ ។ រាជរដ្ឋាភិបាលកម្ពុជាបាន និងកំពុងថែរក្សា សុខសន្តិភាព ជូនប្រជាពលរដ្ឋ និងការប៉ុនប៉ងទាំងឡាយដែលអូសទាញនាំឲ្យប្រទេសធ្លាក់ចូលទៅក្នុងសង្គ្រាមជាថ្មី ដើម្បីធ្វើយ៉ាងណាបន្តការអភិវឌ្ឃជាតិឲ្យមានការរីកចម្រើនទៅមុខ ដូច្នេះហើយកម្ពុជាមិនបានចូលរួមក្នុងសង្គ្រាមត្រជាក់ណាមួយ ឬអនុញ្ញាតឲ្យបរទេសណាមួយប្រើប្រាស់ទឹកដីរបស់ធ្វើមូលដ្ឋានយោធា ដូចដែលព័ត៌មានក្លែងក្លាយទាំងនោះបានផ្សាយចោទប្រកាន់នោះទេ ។
ក្រសួងការពារជាតិសូមប្រកាសច្រានចោលទាំងស្រុងរបស់សារព័ត៌មាន ASIA Time ដែលលាបពណ៌ញុះញង់ធ្វើឲ្យប៉ះពាល់កេត្យានុភាពវិស័យយោធា និងអព្យាក្រឹតអចិន្ត្រៃយ៍របស់កម្ពុជា ហើយសូមឲ្យបញ្ឈប់ការផ្សាយដោយគ្មានប្រភពច្បាស់លាស់នេះតទៅទៀត ៕
ចែករំលែកព័តមាននេះ