ខេត្តបន្ទាយមានជ័យ ៖ កម្លាំងជំនាញផ្នែកប្រឆាំងគ្រឿងញៀនដឹកនាំផ្ទាល់ដោយលោកវរសេនីយ៍ឯក ធិន ស៊ិនដេត អធិការនគរបាលក្រុងប៉ោយប៉ែតធ្វើការបង្ក្រាបជាក់ស្តែងករណីគ្រឿងញៀន ហើយឃាត់ខ្លួនជនសង្ស័យបានម្នាក់ កាលពីរសៀលថ្ងៃទី១៨ វិច្ឆិកា ២០១៨ នៅភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត។
ជនសង្ស័យឈ្មោះញង់ សៀងហៃ ភេទប្រុស អាយុ២៥ឆ្នាំ ស្នាក់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត។
ករណីបង្ក្រាបនេះសមត្ថកិច្ចបានចុះឆែកឆេរបន្ទប់ជួលលេខB02 ជាន់ទី2 កន្លែងកើតហេតុ សមត្ថកិច្ចរកឃើញថ្នាំញៀនម្សៅក្រាមពណ៌សថ្លា(ម៉ាទឹកកក)ចំនួន៨កញ្ចប់តូច, ថ្នាំគ្រាប់ពណ៌ខៀវ២កំណាត់, ជញ្ជីងសម្រាប់ថ្លឹងថ្នាំញៀន១, ដបថ្នាំកេតាមីនប្រើរួច១, ដបស៊ីសារ១, បំពង់សម្រាប់ចូកថ្នាំចំនួន៤, ពូថៅ១, ស្នាប់ដៃ១ និងឧបករណ៍សម្រាប់វេចខ្ចប់ថ្នាំញៀនមួយចំនួនទៀត។
លោកវរសេនីយ៍ឯកធិន ស៊ិនដេត អធិការនគរបាលក្រុងប៉ោយប៉ែតបានឱ្យដឹងថា ដោយអនុត្តន៍តាមបទបញ្ជាចង្អុលបង្ហាញពីលោកឧត្តមសេនីយ៍ទោ អាត់ ខែម ស្នងការនគរបាលខេត្ត និងមានសេចក្តីរាយការណ៍ពីបណ្តាញ លោកក៏ដឹកនាំកម្លាំងចុះបង្ក្រាបជាក់ស្តែងតែម្តង។
លោកបញ្ជាក់ថា តាមពិតបន្ទប់ជួលខាងលើជារបស់បក្ខពួកជនសង្ស័យ ប៉ុន្តែទំនងជាដឹងខ្លួនមុនទើបនាំគ្នារត់គេចខ្លួនអស់។
លោកអធិការបានឱ្យដឹងថា ក្រោយការសាកសួរ នឹងកសាងសំណុំរឿងបញ្ជូនជនសង្ស័យ រួមទាំងវត្ថុតាងទៅស្នងការដ្ឋាននគរបាលខេត្តដើម្បីចាត់ការបន្តតាមនីតិវិធីច្បាប់ ចំណែកបក្ខពួកជនសង្ស័យដែលរត់គេចខ្លួន សមត្ថកិច្ចកំពុងស្រាវជ្រាវតាមរកចាប់ខ្លួនហើយ៕
ចែករំលែកព័តមាននេះ