រាជធានីភ្នំពេញ ៖ គណៈរដ្ឋមន្ត្រីបានសម្រេចអនុម័តលើសេចក្តីព្រាងច្បាប់ស្តីពីបរធនបាលកិច្ចទាំងស្រុង ប៉ុន្តែបន្ថែមមួយមាត្រាថ្មីទៀត ។ នេះបើតាមអ្នកនាំពាក្យរាជរដ្ឋាភិបាល ។ លោក ផៃ ស៊ីផាន…
រាជធានីភ្នំពេញ ៖ គណៈរដ្ឋមន្ត្រីបានសម្រេចអនុម័តលើសេចក្តីព្រាងច្បាប់ស្តីពីបរធនបាលកិច្ចទាំងស្រុង ប៉ុន្តែបន្ថែមមួយមាត្រាថ្មីទៀត ។ នេះបើតាមអ្នកនាំពាក្យរាជរដ្ឋាភិបាល ។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានលើកឡើងឲ្យដឹងថា នៅថ្ងៃទី១៩ វិច្ឆិកា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអនុម័តទាំងស្រុង ប៉ុន្តែបន្ថែមមាត្រាថ្មីមួយទៀត (ជាការប្រញាប់) លើសេចក្តីព្រាងច្បាប់ «ស្តីពីបរធនបាលកិច្ច» ។ លោកបានលើកឡើងលើបណ្តាញសង្គមនៅថ្ងៃទី១៩ វិច្ឆិកាយ៉ាងដូច្នេះថា សេចក្ដីព្រាងច្បាប់ស្ដីពី «បរធនបាលកិច្ច» លើកដំបូងមានគោលបំណងគ្រប់គ្រងមូលនិធិហិរញ្ញប្បទានឥត សំណង ឬអនុបំណុលដែលផ្ដល់ដោយដៃគូអភិវឌ្ឍ ដើម្បីគាំទ្រដល់វិស័យមីក្រូហិរញ្ញវត្ថុ ហើយបច្ចុប្បន្នមូលនិធិទាំងនេះបាននឹងកំពុងគ្រប់គ្រង និងចាត់ចែងប្រើប្រាស់ដោយគ្រឹះស្ថា នធនាគារ និងមីក្រូហិរញ្ញវត្ថុមួយចំនួន ។
ប៉ុន្ដែនៅក្នុងការអភិវឌ្ឍសេដ្ឋកិច្ច និងហិរញ្ញវត្ថុវិស័យបរធនបាលកិច្ចមានវិសាលភាពទូលំទូលាយដែលមិនត្រឹមតែគ្របដណ្ដប់លើវិស័យធនាគារ និងមីក្រូហិរញ្ញវត្ថុប៉ុណ្ណោះទេ ថែមទាំងមានវិសាលភាពគ្របដណ្ដប់លើវិស័យធានារ៉ាប់រង និងសោធនវិស័យអចលនទ្រព្យ វិស័យមូលបត្រ និងវិស័យផ្សេងទៀតនៅក្នុងសេដ្ឋកិច្ច និងសង្គមផងដែរ ។ ដូច្នេះដើម្បីឱ្យវិស័យនេះអាចចូលរំចំណែកដល់ការធ្វើពិពិធកម្មក្នុងវិស័យហិរញ្ញវត្ថុនៅកម្ពុជា ឱ្យទទួលបាននូវការអភិវឌ្ឍកាន់តែឆាប់រហ័ស ស្របតាមនិន្នាការនៃការអភិវឌ្ឍវិស័យហិរញ្ញវត្ថុក្នុងតំបន់ និងសកលលោក ក្រសួងសេដ្ឋកិច្ច និងហិរញ្ញវត្ថុបានរៀបចំតាក់តែងសារជាថ្មីនូវសេចក្ដីព្រាងច្បាប់ស្ដី «បរធនបាលកិច្ច» ដែលគ្របដណ្ដប់លើបរធនបាលកិច្ចទូទៅនៅក្នុងវិស័យសេដ្ឋកិច្ច ហិរញ្ញវត្ថុ និងសង្គម ។ សេចក្ដីព្រាងច្បាប់នេះបានមកពីលទ្ធភាពនៃការចូលរួមស្រាវជ្រាវ និងប្រជុំពិភាក្សាតាមរយៈ ១- កិច្ចប្រជុំជំនាញបច្ចេកទេសនៃអគ្គនាយកដ្ឋានឧស្សាហកម្មហិរញ្ញវត្ថុចំនួន២៨ដង ។ ២-កិច្ចប្រជុំអន្ដរអគ្គនាយកដ្ឋាននៃក្រសួងសេដ្ឋកិច្ច និងហិរញ្ញវត្ថុចំនួន០៤ដង និង៣- ផ្ដល់លទ្ធភាពដល់ការតាមដាន និងគ្រប់គ្រងនូវលំហូរទុន និងប្រភពទុនលើគ្រប់វិស័យដែលកំពុងធ្វើប្រតិបត្តិការក្នុងព្រះរាជាណាចក្រកម្ពុជាសំដៅទាក់ទាញទំនុកចិត្តបន្ថែមពីដៃគូអភិវឌ្ឍនានា ។
លោកបន្តថា គុណប្រយោជន៍នៃការតាក់តែងសេចក្ដីព្រាងច្បាប់ស្ដីពី«បរធនបាលកិច្ច»មានជាអាទិ៍ ១- បង្កើនការវិនិយោគក្នុងស្រុកដែលជាប្រភពនៃការបន្ថែមចំណូលពន្ធជាតិ ២- ជំរុញការធ្វើពិពិធកម្មហិរញ្ញវត្ថុ ដើម្បីជាប្រយោជន៍ដល់ប្រជាពលរដ្ឋកម្ពុជា និង៣- ផ្ដល់លទ្ធភាពដល់ការតាមដាន និងគ្រប់គ្រងនូវលំហូរទុន និងប្រភពទុនលើគ្រប់វិស័យដែលកំពុងធ្វើប្រតិបត្តិការក្នុងព្រះរាជាណាចក្រកម្ពុជាសំដៅទាក់ទាញទំនុកចិត្តបន្ថែមពីដៃគូអភិវឌ្ឍនានា។ លោកបន្ថែមថា បន្ទាប់ពីសេចក្ដីព្រាងច្បាប់នេះត្រូវបានអនុម័ត និងចូលជាធរមានរាជរដ្ឋាភិបាលនឹងមានលទ្ធភាពគ្រប់គ្រាន់ក្នុងការគ្រប់គ្រង និងត្រួតពិនិត្យទៅលើប្រភពបរធនបាលកិច្ចទាំងអស់ដែលបានធ្វើប្រតិបត្តិការនៅព្រះរាជាណាចក្រកម្ពុជា ស្របតាមគោលបំណងដូចខាងក្រោម – បរធានបាលកិច្ចពាណិជ្ជកម្ម ត្រូវបានបង្កើតឡើងក្នុងគោលបំណងស្វែងរកប្រាក់ចំណេញ សម្រាប់ជាប្រយោជន៍ដល់អ្នកផ្ដល់វិភាគទានបរធនបាលកិច្ច ឬបុគ្គលណាមួយជាក់លាក់ដែលកំណត់ដោយអ្នកផ្ដល់វិភាគទានបរធនបាលកិច្ចដូចជា មូលនិធិសោធននិវត្តន៍, មូលនិធិអប់រំ និងមូលនិធិប្រហាក់ប្រហែលផ្សេងទៀត ។ – បរធនបាលកិច្ចសាធារណៈត្រូវបានបង្កើតឡើងក្នុងគោលបំណងសម្រាប់ជាប្រយោជន៍របស់ប្រជាពលរដ្ឋខ្មែរទូទៅដូចជា ការអភិវឌ្ឍវិស័យធានាគារ និងមីក្រូហិរញ្ញវត្ថុ និងការការពារមូលនិធិតាមលក្ខខណ្ឌផ្សេងៗរួមមាន មូលនិធិដែលបានផ្ដល់ឱ្យរាជរដ្ឋាភិបាលពីភាគីអ្នកផ្ដល់ជំនួយ ឬមូលនិធិដែលផ្ដល់ដោយរាជរដ្ឋាភិបាលទៅបរធនបាល ដើម្បីចាត់ចែង និងប្រើប្រាស់ជាប្រយោជន៍ ។ – បរធនបាលកិច្ចសង្គម ត្រូវបានបង្កើតឡើងតាមរយៈការធ្វើប្រទានកម្មទ្រព្យសម្បត្តិរបស់បរធនបាលទាយក ឱ្យទៅបរធនបាលក្នុងគោលបំណងជាប្រយោជន៍ទូទៅដល់សង្គមរួមមានវប្បធម៌ អប់រំ មនុស្សជាតិ សាសនា និងវិទ្យាសាស្ដ្រ ។ – បរធនបាលកិច្ចបុគ្គល ត្រូវបានបង្កើតឡើងតាមរយៈការធ្វើប្រទានកម្ម ឬមរតកសាសន៍ សម្រាប់ជាប្រយោជន៍របស់បរធនបាលទាយកខ្លួនឯងផ្ទាល់ ឬបុគ្គលណាមួយដែលបានកំណត់ជាក់លាក់ ដោយបរធនបាលទាយក ។
លោកលើកឡើងទៀតថា បទប្បបញ្ញតិ្ដទូទៅនៃសេចក្តីព្រាងច្បាប់នេះគឺ – គោលបំណង : ច្បាប់នេះមានគោលបំណងគ្រប់គ្រងបរធនដែលត្រូវបានបង្កើតឡើងក្នុងព្រះរាជាណាចក្រកម្ពុជា ។ – គោលដៅ ច្បាប់នេះមានគោលដៅកំណត់អំពីវិធាននីតិវិធីនៃការបង្កើតចុះបញ្ជីការគ្រ ប់គ្រង និងការត្រួតពិនិត្យបរធនបាលកិច្ច ។ – វិសាលភាព ច្បាប់នេះមានវិសាលភាពអនុវត្តចំពោះបរធនបាលកិច្ចដែលត្រូវបានបង្កើតឡើងក្នុងព្រះរាជាណាចក្រកម្ពុជា ៕
ចែករំលែកព័តមាននេះ