ខេត្តបាត់ដំបង ៖ ជនសង្ស័យពាក់ព័ន្ធនឹងបទល្មើសថ្នាំញៀនចំនួន២នាក់ ត្រូវបានសមត្ថកិច្ចឃាត់ខ្លួនជាបន្តបន្ទាប់ កាលពីយប់ថ្ងៃទី១៨ វិច្ឆិកា នៅចំណុចសួនច្បារមួយកន្លែង ក្នុងភូមិបវេល១ ឃុំបវេល ស្រុកបវេល ខណៈដែលជននេះកំពុងដោះដូរជាក់ស្ដែង ។ អធិការនគរបាលស្រុកបវេល លោកសុខ សារិន បានឲ្យដឹងថា ជនសង្ស័ួយទាំង២នាក់នោះ ម្នាក់ឈ្មោះហង្ស សាវឹង អាយុ២៣ឆ្នាំ នៅភូមិខ្នាចរមាស ឃុំខ្នាចរមាស ស្រុកបវេល និងម្នាក់ទៀតឈ្មោះសន លឿត អាយុ៣៦ឆ្នាំ នៅភូមិព្រៃសង្ហា ឃុំខ្នាចរមាស។
លោកអធិការបានប្រាប់ថា ជនសង្ស័យត្រូវបានកម្លាំងរបស់លោកចេញល្បាតពេលយប់ប្រទះឃើញកំពុងលក់ដូរគ្រឿងញៀនជាក់ស្ដែងនៅក្បែរសួនច្បារ ទើបកម្លាំងជំនាញឃាត់ខ្លួន ហើយឆែកឆេររកឃើញវត្ថុតាងមួយចំនួនដែលជននេះលាក់ទុកជាប់ខ្លួន។
បើតាមរបាយការណ៍របស់សមត្ថកិច្ចបានឲ្យដឹងថា វត្ថុតាងដែលត្រូវកម្លាំងជំនាញដកហូតបានរួមមាន ម្ស៉ៅក្រាមពណ៌.សថ្លា ដែលគេសង្ស័យជាថ្នាំញៀនប្រភេទមេតំហ្វេតាមីន ICE (ម៉ាទឹកកក) ចំនួន៣ថង់តូចនិង១ថង់ធំ ម៉ូតូ១គ្រឿង ដែលជាមធ្យោបាយសម្រាប់ជិះប្រព្រឹត្តបទល្មើសលុយចំនួន៥ម៉ឺនរៀល និងសម្ភារសម្រាប់វេចខ្ចប់មួយចំនួនផង។
ជាមួយនឹងការឃាត់ខ្លួននេះ នៅចំពោះមុខសមត្ថកិច្ច ជនសង្ស័យទាំង២នាក់បានសារភាពថា ខ្លួនពិតជាបានប្រព្រឹត្តបទល្មើសគ្រឿងញៀនបំពានច្បាប់មែន ហើយក៏បានទទូលស្គាល់ផងដែរ ចំពោះវត្ថុតាងនានាដែលសមត្ថកិច្ចបានដកហូតពីពួកខ្លួនដែរ ។ ជនសង្ស័យមិនបានបញ្ជាក់ប្រាប់ពីប្រវត្តិ នៃការប្រព្រឹត្តបទល្មើសរបស់ពួកគេទេ តែបានផ្ដល់ចម្លើយបែបស្ទាក់ស្ទើរថា ពួកគេគ្រាន់តែធ្លាប់កាន់គ្រឿងញៀនចែកចាយតិចតួចប៉ុណ្ណោះ។
យ៉ាងនេះក្ដី លោកសុខ សារិន អធិការស្រុកបវេលបាននិយាយថា បើតាមការស្រាវជ្រាវកន្លងមក ក្រុមនេះតែងតែនាំយកថ្នាំញៀនទៅលក់ដូរគ្រប់ទីកន្លែង នៅក្នុងស្រុកបវេល ហើយកម្លាំងជំនាញរបស់លោកក៏ធ្លាប់តាមដានសកម្មភាពរបស់ពួកគេដែរ រហូតដល់ពេលនេះ ទើបឈានដល់ការឃាត់ខ្លួនបានចំនួន២នាក់ជាបន្តបន្ទាប់តែម្ដង។
ចែករំលែកព័តមាននេះ