រាជធានីភ្នំពេញ ៖ រយៈពេលប្រមាណ៤ថ្ងៃមកហើយ ចោរដែលធ្វើសកម្មភាពគាស់ហាងលក់មាស ប្លាទីននៅផ្សារសាមគ្គីអស់ជាង៤០ម៉ឺនដុល្លារនោះ ពុំទាន់ត្រូវសមត្ថកិច្ចស្រាវជ្រាវចាប់ខ្លួនបាននៅឡើយទេ ជាហេតុធ្វើឲ្យជនរងគ្រោះ និងក្រុមគ្រួសារកំពុងតែទន្ទឹងរង់ចាំ ។
អ្វីដែលធ្វើឲ្យមានការចាប់អារម្មណ៍នោះ ភ្លើងនិងកាមេរ៉ាសុវត្ថិភាពរបស់ប្រធានផ្សារមុនដែលបំពាក់ ហើយបានកាត់ផ្កាច់ ដោយលោក ថោង ថង ប្រធានផ្សារដែលទើបតែឡើងថ្មីនោះ ពេលនេះបានបំពាក់ឡើងវិញហើយ ជាហេតុធ្វើឲ្យអាជីវករនិយាយទាំងបញ្ឈឺនិងចំអកថា «ពេលចោរលួច ទើបធ្វើរបង ដល់ពេលប្រឡងទើបខំរៀន» ។
ទន្ទឹមនោះ ក្រុមអាជីវករក៏បានវាយប្រហារធ្ងន់ៗថា ចាប់តាំងពីលោក ថោង ថង មកកាន់ជាប្រធានផ្សារមកសេវា សន្តិសុខទារឡើងថ្លៃ តែគ្មានសុវត្ថិភាព ដែលធ្វើឲ្យពួកគាត់មានភាពកក់ក្តៅនោះទេ ។ ដោយឡែកវិញ បណ្តោយឲ្យអាជីវករលក់ដូរនៅតាមដងផ្លូវខាងជើងផ្សារ ហើយគិតតែពីឲ្យសន្តិសុខ ដើរប្រមូលប្រាក់ពីអា ជីវករលក់ដូរ បង្កឲ្យកកស្ទះនិងក្តៅក្រហាយពីអ្នកដំណើរ ។
គួរបញ្ជាក់ថា ហាងលក់មាស ប្លាទីន យីហោ នាង ហាងមាស ប្លាទីន មានលក់គ្រឿងអលង្ការ ធ្វើពីមាស ប្លាទីន ត្បូងគ្រប់ប្រភេទ ត្រូវបានចោរមួយក្រុមបានធ្វើសកម្មភាពកាត់សោទ្វារ និងទូដែកប្រមូលយកគ្រឿង អលង្ការហ្មត់ គិតជាប្រាក់អស់ប្រមាណ៤០ម៉ឺនដុល្លារ ។ ហេតុការណ៍នេះ បង្កឲ្យមានការភ្ញាក់ផ្អើល កាលពីវេលាម៉ោង៨ និង៣០នាទីព្រឹកថ្ងៃទី ១៤ ខែវិច្ឆិកា ខណៈពេលដែលម្ចាស់ធ្វើដំណើរទៅបើកហាងលក់ដូរ ។
ម្ចាស់ហាងដែលត្រូវចោរគាស់នោះ ឈ្មោះ ជា ធឿន ភេទប្រុស អាយុ៤៥ឆ្នាំ និងប្រពន្ធឈ្មោះ ឡេង ស៊ី
ណែត ហៅនាង អាយុ៣៥ឆ្នាំ មានលំនៅផ្ទះលេខ១៤ ផ្លូវលេខ ២៦១ សង្កាត់ទឹកល្អក់ទី១ ខណ្ឌទួលគោក ។
តាមម្ចាស់បានឲ្យសមត្ថកិច្ចដឹងថា នៅវេលាម៉ោងប្រមាណជិត៦ល្ងាច រូបគាត់រួមទាំងភរិយា ព្រមទាំងម្តាយ ក៏បានរៀបចំយកគ្រឿងអលង្ការដាក់ក្នុងស្បោង រួចយកទៅដាក់ក្នុងទូដែកសុវត្ថិភាព រួចក៏បានធ្វើដំណើរត្រឡប់ទៅផ្ទះ ។
លុះព្រឹកឡើងវេលាម៉ោងប្រមាណ៨ និង៣០នាទីព្រឹក ក៏បានធ្វើដំណើរមកដល់ហាងលក់ដូរដូចធម្មតាវិញ ស្រាប់តែឃើញទ្វាររ៉ូតមុខ ចំហ ហើយចូលទៅមើលទូដែកកែច្នៃ ត្រូវបានចោរកាត់សោយកគ្រឿងអលង្ការនោះរួមមានមាស ប្លាទីនដាំត្បូង ពេជ្រមានតម្លៃគិតជាប្រាក់ប្រមាណ៤០ម៉ឺនដុល្លារទៅបាត់ដោយសុវត្ថិ ភាព ។ ចាប់តាំងពីថ្ងៃកើតហេតុ រហូតមកដល់ថ្ងៃទី១៨ ខែវិច្ឆិកា រយៈពេល៤ថ្ងៃមកហើយ សមត្ថកិច្ចពុំទាន់បានកំណត់មុខសញ្ញាជនសង្ស័យ និងឃាត់ខ្លួនក្រុមជនសង្ស័យ មកចាត់ការតាមច្បាប់នៅឡើយ ។
ទោះបីយ៉ាងណាក្តី សមត្ថកិច្ចខណ្ឌទួលគោក និងសមត្ថកិច្ចនគរបាលការិយាល័យព្រហ្មទណ្ឌកំរិតធ្ងន់ កំពុងតែស្រាវជ្រាវយ៉ាងសកម្ម តាមរយៈការឆែកឆេរកាមេរា៉សុវត្ថិភាព ដើម្បីឈានទៅកំណត់មុខសញ្ញាឃាត់ខ្លួននៅថ្ងៃណាមួយមិនខាន ។
តាមព័ត៌មានឲ្យដឹងថា នៅក្នុងសកម្មភាពគាស់កាត់សោទូដែកលួចនេះ ចោរមានគ្នាចាប់ពីពីរនាក់ឡើងទៅ ហើយជិះរថយន្តមួយគ្រឿងធ្វើសកម្មភាពលួចនៅកំឡុងវេលាម៉ោងប្រមាណ២រំលងអធ្រាត្រ ។ តាមរយៈការឆែកឆេរកាមេរ៉ាសុវត្ថិភាពនៅតាមដងផ្លូវសមត្ថកិច្ចបានឃើញមុខជនសង្ស័យហើយ កំពុងតែតាមប្រមាញ់នៅឡើយ ៕
ចែករំលែកព័តមាននេះ