ខេត្តក្រចេះ ៖ ទីតាំងសិប្បកម្មគ្រឿងសង្ហារិមពីឈើប្រណីត ដែលជ្រកក្រោមច្បាប់អាជីវកម្មមួយកន្លែងក្នុងចំណោមទីតាំងជាច្រើនកន្លែង ដែលកំពុងលួចធ្វើអាជីវកម្មនៅស្រុកសំបូរ ត្រូវបានសមត្ថកិច្ចចុះពិនិត្យនិងមានវិធានការបង្ក្រាប ។
ក្រុមមន្ត្រីនិយាយថា ទីតាំងសិប្បកម្មធំៗចំនួន៣ ដែលធ្វើអាជីវកម្មនៅក្នុងភូមិ ខាងក្រោយវត្តវិហារសសរ១០០ ក្បែរទីប្រជុំជនស្រុកសំបូរ ត្រូវបានអាជ្ញាធរមានសមត្ថកិច្ចដឹកនាំដោយលោក ជា សុភក្ត្រ ព្រះរាជអាជ្ញារងអមសាលាដំបូងខេត្ត ចុះធ្វើការត្រួតពិនិត្យនិងមានវិធានការបង្ក្រាប១ទីតាំងដែលធំជាងគេ ។
ក្រុមមន្ត្រីនិយាយទៀតថា ប្រតិបត្តិការរបស់ក្រុមសមត្ថកិច្ច ក្នុងការចុះត្រួតពិនិត្យទីតាំងសិប្បកម្មជ្រកក្រោមរូបភាពមានច្បាប់អាជីវកម្មនេះ បានធ្វើឡើងពេញមួយថ្ងៃទី១៧ ខែវិច្ឆិកា ក្នុងនោះ មានឈើប្រណីតចម្រុះចំនួនរាប់រយកំណាត់ ត្រូវបានសម្រេចរឹបអូសនាំយកមករក្សាទុកដើម្បីមានវិធានការតាមផ្លូវច្បាប់ ។
ប្រភពព័តមាននិយាយថា បើទោះបីជាទីតាំងសិប្បកម្មទាំងនេះមានច្បាប់អនុញ្ញាតក៏ពិតមែន តែឈើដែលនាំចូលសម្រាប់កែច្នៃទាំងនោះ គឺសុទ្ធសឹងជាឈើដែលមានប្រភពមកមិនស្របច្បាប់នោះទេ ។
ពលរដ្ឋនៅស្រុកសំបូរនិយាយថា ការដឹកជញ្ជូនឈើតាមទូក និងតាមរថយន្ត ម៉ូតូ សុទ្ធសឹងជាឈើប្រណីតចំនួនរាប់សិបមែ៉ត្រគូប ត្រូវបានគេដឹកជញ្ជូនចូលទៅក្នុងសិប្បកម្មធំៗមួយចំនួនខាងលើ ដើម្បីកែច្នៃ ។ពលរដ្ឋនិយាយទៀតថា នេះជាលើកទី១ហើយ ដែលសមត្ថកិច្ចមានវិធានការបង្ក្រាប ទីតាំងសិប្បកម្មដុះស្លែជ្រកក្រោមស្លាកមានអាជ្ញាប័ណ្ណនេះ ព្រោះថាទីតាំងសិប្បកម្មធំៗខាងលើ ដែលបើកធ្វើអាជីវកម្មរាប់សិប
ឆ្នាំមកហើយនោះ សមត្ថកិច្ចមិនធ្លាប់បានចុះត្រួតពិនិត្យ និងមានវិធានការបែបនេះទេ សង្ស័យជាទីតាំងឆ្នាំងបាយរបស់ស្ថាប័នពាក់ព័ន្ធវិស័យនេះ ៕
ចែករំលែកព័តមាននេះ