ខេត្តកំពង់ស្ពឺ ៖ យុវជន២នាក់មកពីភូមិផ្សេងគ្នាបានទៅកម្សាន្តនៅកម្មវិធីបុណ្យកឋិនមួយដោយនៅទីនោះមានការចាក់ធុងបាស់សម្រាប់រាំលេងទៀតផង ហើយអ្នកទាំង២ក៏ចូលរាំដូចអ្នកផ្សេងដែរ ស្រាប់តែផ្ទុះអំពើហិង្សាដាក់គ្នាតែម្តង ។
អំពើហិង្សានេះកើតឡើងកាលពីវេលាម៉ោង២៤យប់ថ្ងៃទី១៧ ខែវិច្ឆិកា ឆ្នាំ២០១៨ នៅក្នុងបរិវេណវត្តភ្នំចាស់ ក្នុងឃុំហោងសំណុំ ស្រុកឱរ៉ាល់ ខេត្តកំពង់ស្ពឺ ។
សមត្ថកិច្ចនគរបាលស្រុកឱរ៉ាល់បានឲ្យដឹងថា ជនបង្កឈ្មោះ ម៉េន ពេជ្រ ភេទប្រុស អាយុ១៩ ឆ្នាំ រស់នៅភូមិក្រាំងគគី ឃុំហោងសំណំ ស្រុកឱរ៉ាល់ ចំណែកភាគីម្ខាងទៀត (រងគ្រោះ)ឈ្មោះ ហ៊ី ពូលីស ភេទប្រុស អាយុ២៥ឆ្នាំ រស់នៅភូមិតាំងស្រឹង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ។
បើតាមសំដីរបស់សមត្ថកិច្ចមួយរូបបានឲ្យដឹងថា មុនពេលកើតហេតុនៅវត្តភ្នំចាស់មានកម្មវិធីបុណ្យកឋិនដោយនៅទីនោះមានចាក់ធុងបាស់សម្រាប់អ្នកទៅចូលរួមរាំលេងកម្សាន្តផងដែរ ។ រវាងជនរងគ្រោះនឹងជនបង្កក៏បានចូលរាំនឹងគេដែរ ស្រាប់តែពេលរាំក៏កើតមានទំនាស់គ្នាឡើង ហើយត្រូវបានសមត្ថកិច្ចចាប់ឃាត់បំបែកចេញម្តងហើយ ។ មួយសន្ទុះក្រោយមកស្រាប់តែភាគីបង្កបានទៅយកប៉ែលស្ទុះមកវាយភាគីម្ខាងទៀត បណ្តាលឲ្យរបួសក្បាលខាងស្តាំជាទម្ងន់ ។ ហើយត្រូវបានបញ្ជូនទៅកាន់មន្ទីរពេទ្យបង្អែកស្រុក ដើម្បីសង្គ្រោះភ្លាមៗតែម្តង ។
ចំណែកភាគីបង្កសមត្ថកិច្ចយើងបានឃាត់ខ្លួនផងដែរ ។ ក្រោយឃាត់ខ្លួនជនបង្កសមត្ថកិច្ចដកហូតវត្ថុតាងរួមមានម៉ូតូ C125 ពណ៌ខ្មៅ សេរី២០១៦ ពាក់ស្លាកលេខកំពង់ស្ពឺ 1H-3263 មួយគ្រឿងនឹងប៉ែលដងឫស្សី ចំនួន០១ យកមកអធិការដ្ឋានចាត់ការតាមនីតិវិធី ។
ក្រោយឃាត់ខ្លួននៅចំពោះមុខសមត្ថកិច្ចនៅថ្ងៃទី១៨ វិច្ឆិកា ២០១៨ ជនបង្កបានឆ្លើយសារភាពថា មូលហេតុដែលរូបគេយកប៉ែលទៅវាយជនរងគ្រោះដោយសារ តែជនរងគ្រោះពេលរាំចេះតែមកជាន់ជើងគេ ហើយធ្វើមុខឌឺដាក់គេទៀតផង ទើបគេទ្រាំមិនបានក៏រត់ទៅយកប៉ែលមកវាយតែម្តង ។
ក្រោយស្តាប់ចម្លើយសារភាពរួច នៅរសៀលថ្ងៃដដែលសមត្ថកិច្ចបានកសាងសំណុំរឿងបញ្ជូនទៅកាន់ការិយាល័យជំនាញចាត់ការបន្តតាមនីតិវិធី ។
លោកវរសេនីយ៍ឯកប៊ុត ប៊ុនធឿន អធិការនគរបាលស្រុកឱរ៉ាល់បានប្រាប់ផងដែរថា
ករណីខាងលើកើតឡើង បណ្តាលមកពីការមិនចេះយោគយល់គ្នា ទើបកើតមានមានទំនាស់ពាក្យសំដីរហូតបង្កជាអពើហិង្សាបែបនេះ ។ដោយឡែកមហាជនលើកឡើងថា ទាំងនេះកើតឡើងដោយសារ តែការចង់ចាញ់ឈ្នះគ្នាហើយលទ្ធផលចុងក្រោយអ្នកចាញ់ដេកពេទ្យអ្នកឈ្នះដេកគុកបែបនេះ ៕
ចែករំលែកព័តមាននេះ