ប្រទេសអាហ្សង់ទីន ៖ ក្រោយការតាមរុករកអស់ពេល១ឆ្នាំ ទីបំផុតខ្មោចនាវាមុជទឹកអាហ្សង់ទីនឈ្មោះ SAN JUAN ដែលបាត់ដានកាលពីថ្ងៃទី១៥ វិច្ឆិកា ឆ្នាំ២០១៧ ជាមួយសមាជិកក្រុមនាវិក៤៤នាក់ ពេលចេញទៅបំពេញបេសកកម្មនៅមហាសមុទ្រអាត្លង់ទិក ភាគខាងត្បូង ត្រូវបានតាមរកឃើញហើយ ត្រង់កន្លែងមួយក្នុងជម្រៅ៩០៧ម៉ែត្រ។
ឧត្ដមនាវីJOSE VILLANប្រមុខកងម៉ារីនអាហ្សង់ទីននិយាយថា តំបន់បាតសមុទ្រមានសភាពស្មុគស្មាញ ពិបាកក្នុងការតាមរកខ្មោចនាវាមុជទឹកនេះ ខណៈនាវាបរទេសនិងអាហ្សង់ទីនទាំងអស់តាមរុករកនៅតំបន់នោះ។
នាដំណាច់ឆ្នាំ២០១៧ និងដើមឆ្នាំ២០១៨ នាវារបស់ប្រទេសប្រមាណជា១០ បានចូលរួមក្នុងប្រតិបត្តិការតាមរុករក។ ខ្មោចនាវាមុជទឹកនេះតាមរកឃើញដោយក្រុមហ៊ុនឯកជនអាមេរិក OCEAN INFINITY នៅកន្លែងមួយចម្ងាយប្រមាណជា៥០០គីឡូម៉ែត្រពីឆ្នេរសមុទ្រ PATAGONIE។
ដោយពុំមានមធ្យោបាយគ្រប់គ្រាន់ អាហ្សង់ទីនបានប្រគល់ភារកិច្ចតាមរុករក ទៅឲ្យក្រុមហ៊ុននេះ ដោយសន្យាផ្ដល់រង្វាន់ចំនួន៧,៥លានដុល្លារបើបានជោគជ័យ។ អាជ្ញាធរអាហ្សង់ទីនបង្ហាញដល់បណ្ដាគ្រួសារជនរងគ្រោះ នូវរូបភាពឡាំងឡាយ នៃខ្មោចនាវាមុជទឹកនេះដែលថតបានកាលពីថ្ងៃទី១៧ វិច្ឆិកា៕
ចែករំលែកព័តមាននេះ