រាជធានីភ្នំពេញ ៖ រយៈពេលប្រមាណ៤ថ្ងៃមកហើយ ជនសង្ស័យដែលធ្វើសកម្មភាពគាស់ហាងលក់មាស ប្លាកទិននៅផ្សារសាមគ្គី ពុំត្រូវសមត្ថកិច្ចស្រាវជ្រាវចាប់ខ្លួន បាននៅឡើយនោះទេ ជាហេតុធ្វើឱ្យជនរងគ្រោះ និងក្រុមគ្រួសារកំពុងតែទន្ទឹងរង់ចាំ ។
អ្វីដែលធ្វើឱ្យមានការចាប់អារម្មណ៍នោះ ភ្លើង និងកាមេរ៉ាសុវត្ថិភាពរបស់ប្រធានផ្សារមុនបំពាក់ ហើយបានកាត់ផ្កាច់ដោយលោក ថោង ថង ប្រធានផ្សារដែលទើបតែឡើងថ្មីនោះ ពេលនេះបានបំពាក់ឡើងវិញហើយ ជាហេតុធ្វើឱ្យអាជីវករនិយាយទាំងបញ្ឈឺ និងចំអកថា «ពេលចោរលួចទើបធ្វើរបង ដល់ពេលប្រលងទើបខំរៀន» ។ ទន្ទឹមនឹងនោះ ក្រុមអាជីវករក៏វាយប្រហារធ្ងន់ៗថា ចាប់តាំងពីលោកមកកាន់ជាប្រធានផ្សារមក សេវា សន្តិសុខ ទារឡើងថ្លៃ តែគ្មានសុវត្ថិភាពដែលធ្វើឱ្យពួកគាត់មិនមានភាពកក់ក្តៅនោះទេ។
គួរបញ្ជាក់ថា ហាងលក់មាសប្លាកទិនយីហោ នាង ហាងមាស ប្លាកទិន ផ្សារសាមគ្គី ស្ថិតនៅមហាវិថីម៉ៅសេទុង ក្នុងសង្កាត់ផ្សារដេប៉ូទី៣ ខណ្ឌទួលគោក ត្រូវក្រុមចោរមួយក្រុមធ្វើសកម្មភាពកាត់សោរទ្វារ និងទូដែកប្រមូលយកគ្រឿងអលង្ការម៉ត់ គិតជាប្រាក់អស់ប្រមាណ៤០ម៉ឺនដុល្លារ ។ ហេតុការណ៍នេះបង្កឱ្យមានការភ្ញាក់ផ្អើលកាលពីម៉ោង៨និង៣០នាទីព្រឹក ថ្ងៃទី១៤ ខែវិច្ឆិកា ឆ្នាំ២០១៨ ខណៈពេលដែលម្ចាស់ធ្វើដំណើរទៅបើកហាងលក់ដូរ ។
ម្ចាស់ហាងនោះឈ្មោះ ជា ធឿន ភេទប្រុស អាយុ៤៥ឆ្នាំ និងប្រពន្ធឈ្មោះឡេង ស៊ីណែត ហៅនាង អាយុ៣៥ឆ្នាំ មានលំនៅផ្ទះលេខ១៤ ផ្លូវលេខ២៦១ សង្កាត់ទឹកល្អក់ទី១ ខណ្ឌទួលគោក។ តាមម្ចាស់ឱ្យដឹងថា នៅប្រមាណជិត៦ល្ងាច រូបគាត់រួមទាំងភរិយា ព្រមទាំងម្តាយបានរៀបចំយកគ្រឿងអង្ការដាក់ក្នុងស្បោងរួចដាក់ក្នុងទូដែកសុវត្ថិភាព រួចក៏ធ្វើដំណើរត្រឡប់ទៅផ្ទះ ។ លុះព្រឹកឡើងម៉ោងប្រមាណ៨និង៣០នាទីព្រឹក ក៏មកដល់ដូរវិញស្រាប់តែឃើញទ្វារមុខចំហ ហើយចូលទៅមើលទូរដែកត្រូវចោរកាត់សោយកគ្រឿងអលង្ការនោះ រួមមានមាស ប្លាក់ទិន ដាំត្បូង ពេជ្រ មានតម្លៃគិតជាប្រាក់ប្រមាណ៤០ម៉ឺនដុល្លារ។
ចាប់តាំងពីថ្ងៃកើតហេតុ រហូតមកដល់ថ្ងៃទី១៨ វិច្ឆិកានេះ រយៈពេល៤ថ្ងៃមកហើយ សមត្ថកិច្ចពុំទាន់កំណត់មុខសញ្ញាជនសង្ស័យ និងឃាត់ខ្លួនក្រុមជនសង្ស័យមកចាត់ការតាមច្បាប់នៅឡើយ ។
ទោះបីយ៉ាងណា សមត្ថកិច្ចខណ្ឌទួលគោក និងសមត្ថកិច្ចនគរបាលការិយាល័យ ព្រហ្មទណ្ឌកំរិតធ្ងន់កំពុងស្រាវជ្រាវយ៉ាងសកម្មតាមរយៈការឆែកឆេរកាមេរ៉ាសុវត្ថិភាព ដើម្បីឈានទៅកំណត់មុខសញ្ញាឃាត់ខ្លួនជនសង្ស័យ ។
តាមព័ត៌មានឱ្យដឹងថា នៅក្នុងសកម្មភាពគាស់ កាត់សោរទូដែកលួចនេះ ជនសង្ស័យមានគ្នាចាប់ពីរនាក់ឡើងទៅ ហើយជិះរថយន្តមួយគ្រឿងធ្វើសកម្មភាពលួចនៅអំឡុងម៉ោងប្រមាណ២រំលងអធ្រាត្រ។ ហើយតាមរយៈពេលការឆែកឆេរកាមេរ៉ាសុវត្ថិភាពនៅតាមដងផ្លូវ សមត្ថកិច្ចបានឃើញមុខជនសង្ស័យហើយ ៕
ចែករំលែកព័តមាននេះ