រាជធានីភ្នំពេញ ៖ លោក អ៊ូច ភា អភិបាលនៃគណៈអភិបាលខេត្តតាកែវនៅព្រឹកថ្ងៃទី១៨ ខែ វិច្ឆិកា ឆ្នាំ២០១៨ នេះបានដឹកនាំមន្ត្រីរាជការក្រោមឱវាទចូលគោរព វិញ្ញាណក្ខន្ធលោកតា ប្រាជ្ញ ឈួន អធិរាជចាប៉ីដងវែងដែលបានទទួលមរណៈភាព កាលពីវេលាម៉ោង១និង៣០នាទីយប់ ថៃ្ងទី១៧ ខែវិច្ឆិកា ឆ្នាំ២០១៨ ក្នុងព្រះជន្ម៨២ឆ្នាំ ដោយរោគាពាធហើយត្រូវបានយកមកតម្កល់ទុកធ្វើបុណ្យនៅសាលាធម្មសភាវត្តបទុមវតី ស្ថិតនៅក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ ដើម្បីប្រារព្ធធើ្វបុណ្យតាមប្រពៃណីព្រះពុទ្ធសាសនា ។
នាឱកាសអញ្ជើញគោរពវិញ្ញាណក្ខន្ធលោក អ៊ូច ភា អភិបាលខេត្តតាកែវបានចូលរួមរំលែកទុក្ខដ៏ក្រៀមក្រំជាមួយក្រុមគ្រូសារសព និងសម្ដែងការសោកស្ដាយក្ដីអាលះអាល័យជាពន់ពេក ចំពោះការបាត់បង់នូវវីរៈសិល្បៈករដ៏ល្បីល្បាញលោកតា ព្រឹទ្ធភិរម្យ វោហាសាស្ត្រ ប្រាជ្ញ ឈួន ដែលជាអធិរាជចាប៉ីដងវែង និងដែលត្រូវចាត់ទុក្ខជាសម្បត្តិបេតិភណ្ខមនុស្សអរូបិដែលពិភពលោកទទួលស្គាល់ទូទាំងពិភពលោកថា គ្មានអ្នកណាម្នាក់មានទឹកដម ទឹកដៃ និងវោហាសាស្ត្រ ប៉ិនប្រសប់សម្ដែងដូចលោកតានោះឡើយ ។
ក្រៅពីចូលរួមរំលែកទុក្ខដល់ក្រុមគ្រូសារសព និងសំដែងនូវក្ដីសោកស្ដាយចំពោះការទទួលមរណៈភាពលោកតា ប្រាជ្ញ ឈួន លោកអភិបាលខេត្តតាកែវ អ៊ូច ភា ក៏បាននាំមកនូវបច្ច័យចំនួន៣លានរៀលមកចូលបុណ្យសពផងដែរ ។ លោកតា ប្រាជ្ញ ឈួន ប្រសូត្រនៅខែតុលា ឆ្នាំ១៩៣៦ ជាកូនពៅ ក្នុងគ្រួសារកសិករ ដែលមានកូនប្រាំមួយនាក់ នៅភូមិត្រពាំងកក់ ឃុំខ្វាវ ស្រុកទ្រាំង ខេត្តតាកែវ ។ លោកតាបានទទួលមរណៈភាព កាលពីអធ្រាត្រថ្ងៃទី១៧ ខែវិច្ឆិកា ឆ្នាំ២០១៨ នៅមន្ទីរពេទ្យកាល់ម៉ែត្រ ក្នុងអាយុ៨២ឆ្នាំដោយរោគាពាធ ៕
ចែករំលែកព័តមាននេះ