ខេត្តស្ទឹងត្រែង ៖ ផ្លូវក្រួសក្រហមឆ្ពោះទៅកាន់តំបន់វារីអគ្គិសនីសេសានក្រោម២ស្ថិតក្នុងឃុំភ្លុក ស្រុកសេសាន ខេត្តស្ទឹងត្រែង ត្រូវបានមន្ទីរសាធារណៈការនិងដឹកជញ្ជូនឈូសឆាយស្ថាបនាជិតរួចរាល់ហើយដើម្បីងាយស្រួលដល់ការធ្វើដំណើរទៅមក របស់ប្រជាពលរដ្ឋ។
សកម្មភាពសាងសង់ផ្លូវក្រួសក្រហមនៅឃុំភ្លុក ស្រុកសេសាន ខេត្តស្ទឹងត្រែង ថ្ងៃទី១៨ វិច្ឆិកា ឆ្នាំ២០១៨ លោក គង់ សុផល ប្រធានគ្រប់គ្រងគ្រឿងចក្រ សាងសង់ផ្លូវនេះបានលើកឡើងថា ផ្លូវដែលកំពុងអភិវឌ្ឍន៍នេះកន្លងមកគឺពុំមាននោះឡើយហើយទើបសាងសង់នាឆ្នាំ២០១៨នេះក្រោមការឯកភាពពីអាជ្ញាធរខេត្ត ដោយមូលនិធិឃុំនឹងសាលាស្រុកសេសាន។
លោកបញ្ជាក់ថាសកម្មភាពសាងសង់ផ្លូវថ្មីនេះក្រុមការងារគ្រោងបញ្ចប់នៅដើមខែធ្នូខាងមុខនេះដើម្បីផ្តល់លទ្ធភាពឲ្យប្រជាពលរដ្ឋរស់នៅតាមជួរដងទន្លេមេគង្គកាត់បន្ថយ ការប្រើប្រាស់ទូកកាណូតហើយប្រជាពលរដ្ឋភូមិស្រែគរក៏អាចចេញចូលបានតាមផ្លូវនេះដែរ។
លោកទួន ថាំង មេឃុំភ្លុកស្រុកសេសានបានកក់សំគាល់ថា វត្តមានផ្លូវមួយខ្សែនេះពិតជាល្អ ព្រោះងាយស្រួលសំរាប់ប្រជាពលរដ្ឋយើងក្នុងការប្រាស្រ័យទាក់ទងគ្នាចេញចូលទៅទីរួមខេត្ត ជាពិសេសនាំយកផលដំណាំដាំដុះបន្លែ បង្កាទៅលក់នៅទីផ្សារ។
លោកបញ្ជាក់ថាប្រជាពលរដ្ឋនៅតំបន់នេះគាត់តែងសំដែងការសាទរណាស់ហើយក៍ស្នើសុំទៅរាជរដ្ឋាភិបាមឱ្យចាក់កៅស៊ីផងដែរ ព្រោះផ្លូវដែលចេញពីខេត្តតភ្ជាប់មកផ្លូវនេះមន្ទីរសាធារណៈចាក់កៅស៊ូបាន១២គីឡូម៉ែត្រហើយនៅតែជាង២០គីឡូម៉ែត្រ តែប៉ុណ្ណោះ។
លោកពេង ឯម ប្រជាពលរដ្ឋនៅភូមិ ឃុំភ្លុកនេះបានបញ្ជាក់ថា ការរៀបចំផ្លូវ បានល្អនៅក្នុងភូមិឃុំមិនមែនមានផលប្រយោជន៍មួយមុខសំរាប់ប្រជាពលរដ្ឋធ្វើចរាចរណ៍នោះទេ គឺភូមិយើងក៏ស្អាត ឃុំស្រុកក៏មានសោភណ័ភាពការរស់នៅរបស់ប្រជាពលរដ្ឋក៏មានផាសុកភាពល្អផងដែរ។
លោកថាកត្តាខាងលើនេះប្រជាពលរដ្ឋប្រឹងប្រែងចូលរួមខិតខំថែរក្សាដើម្បីទុកជាប្រយោជន៍សំរាប់ប្រើប្រាស់បានយូរអង្វែងពីព្រោះនៅពេលមានបុណ្យទានភ្ញៀវជាតិនិងអន្តរជាតិអាចធ្វើដំណើរបានស្រួលមកលេងរមណីយដ្ឋានជួរចាប បុប្ផាភ្លុក ប្រាសាទបាគូ និងឆ្ពោះទៅមើលកំសាន្តទំនប់វារីអគ្គិសនីថែមទៀត ។
សូមបញ្ជាក់ថាផ្លូវនេះមានប្រវែង១២គីឡូម៉ែត្រ តភ្ជាប់ពីផ្លូវលេខ ៣៧៦ ចេញពីឃុំភ្លុក- ទៅកាន់តំបន់វារីអគ្គិសនីសេសានក្រោម២តែម្តង៕
ចែករំលែកព័តមាននេះ