ខេត្តកំពង់ឆ្នាំង ៖ ជុំវិញករណីបោះបង្គោលរបង និងរាយលួសបន្លាចំកណ្តាលទ្រូងផ្លូវធ្វើដំណើរ ដែលបានធ្វើឱ្យភ្ញាក់ផ្អើលពេញបណ្ដាញសង្គមហ្វេសប៊ុកថ្មីៗកន្លងទៅនេះ នៅរសៀលថ្ងៃទី១៧ ខែវិច្ឆិកា ឆ្នាំ២០១៨ ភ្នាក់ងារកោះសន្តិភាព រួមទាំងអ្នកសារព័ត៌មានជាច្រើនទៀត បានទៅដល់កន្លែងកើតហេតុ ស្ថិតក្នុងភូមិគក ឃុំខុនរ៉ាង ស្រុកបរិបូរណ៍ ខេត្តកំពងឆ្នាំង ដើម្បីពិនិត្យ និងចង់ដឹងការពិត។
នៅក្នុងបទសម្ភាសន៍នៅកន្លែងកើតហេតុ ម្ចាស់ដីដែលបានបោះបង្គោលនៅកណ្ដាលផ្លូវ ប្រជាពលរដ្ឋធ្លាប់ធ្វើដំណើរ គឺស្ត្រីឈ្មោះឡេង ចាន់រី និងឪពុកឈ្មោះឡេង ទ្រី បានប្រតិកម្មទៅនឹងអ្នកបង្ហោះរូបភាព ដែលគ្រួសារគាត់បោះបង្គោលរបងលើផ្លូវ ហើយសរសេរចោទគាត់ថា រំលោភយកដីផ្លូវធ្វើឱ្យមានប្រតិកម្មទៅនឹងអ្នកបានឃើញ ដោយរិះគន់គ្រួសារគាត់ទាំងបំពាន ។ ពីរនាក់ឪពុកនិងកូនស្រី ដែលជាម្ចាស់ស្រែបាននិយាយដូចគ្នានេះដែរថា៖ កាលពី៣ឆ្នាំមុនអាជ្ញាធរភូមិ-ឃុំបានសុំស្រែរបស់គាត់ ដើម្បីពង្រីកផ្លូវឲ្យបានធំទួលាយអាចជិះម៉ូតូ បានស្រួល ព្រោះតែអ្នកធ្វើដំណើរកាលណោះដើរតែលើភ្លឺស្រែប៉ុណ្ណោះ។
គ្រួសារគាត់ ហេតុតែជាអ្នកធ្វើបុណ្យបានបរិច្ចាគដីទទឹង1ម៉ែត្រកន្លះ បូកភ្លឺស្រែមាន ស្រាប់កន្លះម៉ែត្រទៀតសរុប គឺមានតែពីរម៉ែត្រ ដែលអាចឱ្យបើកម៉ូតូបាន ចំណែកឯភាគីម្ចាស់ដីស្រែម្ខាងទៀតគេនឹងអនុញ្ញាតឲ្យឡើយ។
គ្រួសារម្ចាស់ដីស្រែខាងលើបានបន្តថា ប៉ុន្តែនៅពេលដែលមេភូមិធ្វើការចាក់ដី គឺបានរំលោភបំពានចូលដីស្រែរបស់គាត់បន្ថែមទៀត រហូតទៅដល់កន្លែងខ្លះ៣ម៉ែត្រ និងខ្លះទៀតដល់៤ម៉ែត្រ តាមបណ្ដោយភ្លឺស្រែពីត្បូងទៅជើង ។ កាលណោះក្រុមគ្រួសាររបស់គាត់ក៏ប្រាប់ទៅអាជ្ញាធរភូមិ-ឃុំ ដើម្បីឲ្យការយកដីនោះចេញវិញដែរ ប៉ុន្តែពីមួយខែទៅមួយខែ អាជ្ញាធរភូមិ-ឃុំចេះតែថា ជាប់រវល់រហូត ហើយអ្នកធ្វើដំណើរក៏ចេះតែដើរលើផ្លូវដែលការចាក់ដីរំលោភយកចូលដីស្រែរបស់គ្រួសារគាត់ លើសការកំណត់គ្រួសារគាត់បរិច្ចាគឱ្យ ។
អ្វីដែលធ្វើឲ្យគ្រួសារគាត់កាន់តែមួរម៉ៅទៅទៀតនោះ ថ្មីៗនេះក៏ស្រាប់តែមានអ្នកលួចដឹកដីមួយរថយន្តទៀតទៅចាក់នៅកែងដីក្បាលស្រែរបស់គាត់បណ្តាលឱ្យជាន់លើស្រូវរបស់គាត់ដែលកំពុងដាក់គ្រាប់ថែមទៀត ។ ដោយសារតែហេតុនេះហើយទើបគ្រួសារគាត់ទ្រាំមិនបាន ហើយក៏បានធ្វើរបងព័ទ្ធយកដីដើមរបស់គាត់វិញតែម្តងទៅ។
នៅថ្ងៃនោះផងដែរ លោក ឡាយ សារ៉ន មេភូមិគក ឃុំខុនរ៉ង ក៏និយាយឲ្យដឹងដែរថា កាលមុនផ្លូវនៅចំណុចនេះ គ្រាន់តែជាភ្លឺស្រែមួយប៉ុណ្ណោះ ប៉ុន្តែដោយសារតម្រូវការចាំបាច់របស់ប្រជាពលរដ្ឋ 4 ភូមិ ដែលធ្វើដំណើរទៅមក ជាពិសេសសិស្សទៅសាលារៀន ទើបលោកក្នុងនាមជាអជ្ញាធ ឬភូមិក៏បានស្នើសុំចាក់ដីបំពេញលើភ្លឺស្រែពង្រីកឱ្យធំជាមុនដែលអាចឱ្យអ្នកធ្វើដំណើរ លទ្ធភាពជិះម៉ូតូបាន ពិតជាបានចាក់រំលោភកាន់តែធំ ទៅលើដីស្រែគេមែន។
ចែករំលែកព័តមាននេះ