មឹកគឺជាប្រភពនៃសារធាតុចិញ្ចឹមដ៏ល្អមួយដែលមនុស្សភាគច្រើនមិនបានចាប់អារម្មណ៍ដឹង។ មឹក គឺប្រភេទនៃអាហារគ្រឿងសមុទ្រដែលមិនត្រឹមតែមានរសជាតិឆ្ញាញ់ប៉ុណ្ណោះទេ ប៉ុន្តែមានផ្ទុកសម្បូរទៅដោយអាស៊ីតខ្លាញ់អូមេហ្គា ៣ ដែលចាំបាច់សម្រាប់រក្សាបាននូវសុខភាពល្អប្រសើរ ។ អត្ថប្រយោជន៍ដ៏ល្អប្រសើរមួយចំនួននៃការទទួលទានមឹកចំពោះសុខភាព ៖ ១….
មឹកគឺជាប្រភពនៃសារធាតុចិញ្ចឹមដ៏ល្អមួយដែលមនុស្សភាគច្រើនមិនបានចាប់អារម្មណ៍ដឹង។ មឹក គឺប្រភេទនៃអាហារគ្រឿងសមុទ្រដែលមិនត្រឹមតែមានរសជាតិឆ្ញាញ់ប៉ុណ្ណោះទេ ប៉ុន្តែមានផ្ទុកសម្បូរទៅដោយអាស៊ីតខ្លាញ់អូមេហ្គា ៣ ដែលចាំបាច់សម្រាប់រក្សាបាននូវសុខភាពល្អប្រសើរ ។ អត្ថប្រយោជន៍ដ៏ល្អប្រសើរមួយចំនួននៃការទទួលទានមឹកចំពោះសុខភាព ៖
១. បង្កើនកោសិកាគ្រាប់ឈាមក្រហម ៖ មឹកគឺមានផ្ទុកសម្បូរទៅដោយជាតិរ៉ែ សំខាន់ៗ និងសារធាតុចិញ្ចឹម ។ ប្រូតេអ៊ីន, វីតាមីន និងអាស៊ីតខ្លាញ់អូមេហ្គា៣ ក៏ដូចជាជាតិដែកដែលមានវត្តមានក្នុងមឹកធ្វើឲ្យការទទួលទានគ្រឿងសមុទ្រនេះ គឺល្អប្រសើរចំពោះសុខភាពរាងកាយក្នុងការបង្កើនបរិមាណនៃកោសិកាគ្រាប់ឈាមក្រហម ។ កោសិកាឈាមក្រហមដើរតួនាទីយ៉ាងសំខាន់ក្នុងរាងកាយមនុស្ស ។ ប្រូតេអ៊ីនអេម៉ូក្លូប៊ីននៅក្នុងកោសិកាឈាមក្រហមដើរតួនាទីចាំបាច់ក្នុងការដឹកនាំអុកស៊ីសែនទៅកាន់គ្រប់សរីរាង្គខាងក្នុងនៃរាងកាយ ហេតុនេះវា គឺសំខាន់ណាស់ក្នុងការទប់ស្កាត់ជំងឺបេះដូង ។
២. សុខភាពបេះដូង ៖ ត្រឹមបរិមាណ៨៥ក្រាមនៃមឹកធម្មតា គឺមានផ្ទុកប៉ូតាស្យូមដល់ទៅ២០៩ មីលីក្រាម ។ នេះប្រហែលជា៤ ភាគរយនៃ៤៧០០ មីលី្លក្រាមនៃជាតិប៉ូតាស្យូមដែលរាងកាយត្រូវការប្រចាំថ្ងៃ ។ ប៉ូតាស្យូមមានប្រសិទ្ធភាពបង្កើនសុខភាពបេះដូង និងរក្សាអត្រានៃចង្វាក់បេះដូង ហើយក៏ជួយកាត់បន្ថយសម្ពាធឈាមផងដែរ នេះបើយោងតាមវិទ្យាស្ថានសុខភាព Linus Pauling។ ការទទួលទានមឹកក៏ជួយរាងកាយក្នុងការប្រយុទ្ធប្រឆាំងនឹងជំងឺបេះដូង ហើយថែមទាំងជួយការពារកោសិកាមិនឲ្យទទួលរងការបំផ្លាញ តាមរយៈបរិមាណនៃវីតាមីន E ដែលវាមានផ្ទុក ។ ត្រឹម៨៥ក្រាមនៃមឹកមានផ្ទុកវីតាមីន E ដល់ទៅ៧ ភាគរយនៃវីតាមីន១៥ មីល្លីក្រាមដែលរាងកាយត្រូវការប្រចាំថ្ងៃ ។
៣.កាត់បន្ថយកម្រិតកូឡេស្តេរ៉ូល ៖ មិនដូចនឹងអាហារសមុទ្រផ្សេងទៀតដែលបង្កើនកម្រិតកូឡេស្តេរ៉ូលក្នុងឈាមនោះទេ មឹក គឺអាចកាត់បន្ថយកម្រិតនៃកូឡេស្តេរ៉ូលនៅពេលអ្នកទទួលទានវា ដោយសារមឹកឆៅមានផ្ទុកជាតិខ្លាញ់ទាប ។ វាត្រូវបានបង្ហាញឲ្យដឹងតាមវិទ្យាសាស្ត្រថាមឹកចំនួន១០០ក្រាម ផ្ទុកកាឡូរីទាបបំផុតប្រហែលជា១,៤ ក្រាមប៉ុណ្ណោះ ។
៤. កាត់បន្ថយការរលាក ៖ ការរលាករ៉ាំរ៉ៃអាចធ្វើឲ្យមានការរលាកដល់សរសៃឈាមដែលបង្កហានិភ័យនៃជំងឺដាច់សរសៃឈាមខួរក្បាល និងជំងឺគាំងបេះដូង គម្រាមកំហែងដល់អាយុជីវិត ។ ទោះជាយ៉ាងណាការទទួលទានមឹក អាចជួយដោះស្រាយបញ្ហានេះបាន ដោយសារវាជាអាហារមួយប្រភេទដែលប្រឆាំងនឹងការរលាក ហើយរារាំងរាងកាយមិនឲ្យបង្កការរលាកច្រើនពេក ។
៥.បង្ការជំងឺរលាកសន្លាក់ ៖ ការសិក្សាស្រាវជ្រាវជាច្រើនបានបង្ហាញថា អ្នកដែលមានជំងឺរលាកសន្លាក់រ៉ាំរ៉ៃ គឺមានផ្ទុកកម្រិតសេលេនីនតិចនៅក្នុងឈាមរបស់ពួកគេ។ សេលេនីន គឺត្រូវបានគេស្គាល់ថាជាសារធាតុប្រឆាំងអុកស៊ីតកម្មដែលជួយសម្រាលអាការនៃជំងឺរលាកសន្លាក់តាមរយៈការកម្ចាត់រ៉ាឌីកាល់សេរី ។ អ្វីដែលសំខាន់នោះ គឺមឹកមានផ្ទុកជាតិរ៉ែសេលេនីនដល់ទៅប្រមាណជា៦៣ភាគរយឯណោះ ។ ដូច្នេះអ្នកគួរបន្ថែមមឹកចូលក្នុងរបបអាហារប្រចាំថ្ងៃ ដើម្បីចៀសផុតពីបញ្ហានៃជំងឺរលាកសន្លាក់បានយ៉ាងមានប្រសិទ្ធភាព ។
ចំណុចគួរប្រុងប្រយ័ត្ន ៖ ដើម្បីចៀសវាងការពុលមឹក ខាងក្រោមជាអ្វីដែលអ្នកគួរធ្វើ និងមិនគួរ ៖
១- ជ្រើសរើសយកមឹក ស្រស់ៗ ហើយរក្សាទុកវានៅឲ្យបានត្រឹមត្រូវក្នុងសីតុណ្ហភាពពី 0 ទៅ៥ អង្សាសេ។
២-ទិញមឹកពីប្រភពដែលអាចជឿទុកចិត្តបាន ដើម្បីប្រាកដថាមិនមែនជាមឹកខូចគុណភាព ។
៣-លាងសម្អាតឲ្យបានត្រឹមត្រូវ ដោយប្រឡេះក្បាលចេញ, ហូតទ្រនុងចេញ ក៏ដូចជាទឹកមឹក ហើយលាងដុសសម្អាតសាច់មឹកឲ្យស្អាតសព្វជាមួយនឹងទឹកធម្មតា សឹមយកទៅចម្អិន (ប្រភពពី៖ Health.com.kh) ៕
ចែករំលែកព័តមាននេះ