រាជធានីភ្នំពេញ ៖ យុវជនម្នាក់បានស្លាប់ភ្លាមៗនៅនឹងកន្លែងកើតហេតុ និងម្នាក់ទៀតរងរបួសធ្ងន់ធ្ងរ ពេលជិះម៉ូតូមួយគ្រឿងទៅបុករថយន្តយ៉ាងពេញទំហឹង ហេតុការណ៍នេះកើតឡើងនៅវេលាម៉ោង១និង១៥នាទីរំលងអាធ្រាត្រឈានចូលថ្ងៃទី១៨ ខែវិច្ឆិកា ឆ្នាំ២០១៨ ស្ថិតនៅតាមបណ្តោយផ្លូវព្រះស៊ីសុវត្ថិ កែងផ្លូវលេខ១៣…
រាជធានីភ្នំពេញ ៖ យុវជនម្នាក់បានស្លាប់ភ្លាមៗនៅនឹងកន្លែងកើតហេតុ និងម្នាក់ទៀតរងរបួសធ្ងន់ធ្ងរ ពេលជិះម៉ូតូមួយគ្រឿងទៅបុករថយន្តយ៉ាងពេញទំហឹង ហេតុការណ៍នេះកើតឡើងនៅវេលាម៉ោង១និង១៥នាទីរំលងអាធ្រាត្រឈានចូលថ្ងៃទី១៨ ខែវិច្ឆិកា ឆ្នាំ២០១៨ ស្ថិតនៅតាមបណ្តោយផ្លូវព្រះស៊ីសុវត្ថិ កែងផ្លូវលេខ១៣ សង្កាត់វត្តភ្នំ ខណ្ឌដូនពេញ ។
ជនរងគ្រោះដែលស្លាប់ឈ្មោះ ពន្លឺ ភេទប្រុស អាយុ២៤ឆ្នាំ មុខរបរជាងដែក ជាអ្នកបើកបរម៉ូតូ មានទីលំនៅក្រុងតាខ្មៅ ខេត្តកណ្ដាល។ ចំណែកអ្នករួមដំណើរម្នាក់ទៀតមិនត្រូវបានស្គាល់ឈ្មោះទេ បានរងរបួសធ្ងន់ត្រូវគេដឹកយកទៅសង្គ្រោះនៅគ្លីនិកឯកជនមួយកន្លែង។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេឃើញយុវជនពីរនាក់ជិះម៉ូតូមួយគ្រឿងម៉ាកស៊ុយហ្សុ៊យគីនិច ពណ៌ប្រផេះ ពាក់ស្លាកលេខ កណ្ដាល ១Y-៧៧៤៤ តាមបណ្តោយផ្លូវលេខ១៣ ក្នុងទិសដៅពីត្បួងទៅជើងក្នុងល្បឿនយ៉ាងលឿនដោយមិនបានប្រុងប្រយត្ន័ក៏ជ្រុលទៅបុកពីមុខរថយន្តដឹកឥវ៉ាន់មួយគ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ ៣A-១៣៦៧ បើកបរតាមបណ្តោយផ្លូវព្រះស៊ីសុវត្ថិ ក្នុងទិសដៅបញ្ច្រាសគ្នាយ៉ាងពេញទំហឹង បណ្តាលឱ្យអ្នករួមដំណើរម្នាក់រងរបួសធ្ងន់ និងអ្នកបើកបរម៉ូតូបាន បោកក្បាលស្លាប់ភ្លាមៗនៅកន្លែងកើតហេតុ ចំណែកម្ចាស់រថយន្តបានរត់គេចខ្លួនពីកន្លែងកើតហេតុបាត់ស្រមោល។
ក្រោយកើតហេតុសមត្ថកិច្ចមូលដ្ឋានបានទំនាក់ទំនងទៅខាងសមត្ថកិច្ចជំនាញមកធ្វើការវាស់វែងរួច សមត្ថកិច្ចបានយករថយន្តនិងម៉ូតូទៅរក្សាទុកនៅការិល័យចរាចរណ៍ជើងគោករង់ចាំដោះស្រាយគ្នានៅពេលក្រោយ។ចំណែកសពជនរងគ្រោះត្រូវបានសមត្ថកិច្ចប្រគល់ឲ្យ ក្រុមគ្រួសារដឹកយកទៅស្រុកកំណើតដើម្បីរៀបចំធ្វើបុណ្យតាមប្រពៃណី៕
ចែករំលែកព័តមាននេះ