រាជធានីភ្នំពេញ ៖ បុរសម្នាក់ទៅលេងផ្ទះបងប្អូនមានហូបស្រាបន្តិចបន្តួច លុះពេលជិះម៉ូតូត្រឡប់មកផ្ទះវិញក៏រេចង្កូតជ្រុលទៅបុករបាំងថ្មពុះចែកទ្រូងផ្លូវបណ្តាលអោយបោកក្បាលបាក់កស្លាប់នៅនឹងកន្លែងតែម្តង ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១១និង៣០នាទីយប់ ថ្ងៃទី១៧ វិច្ឆិកា ២០១៨ នៅចំណុចផ្លូវជាតិលេខ៤…
រាជធានីភ្នំពេញ ៖ បុរសម្នាក់ទៅលេងផ្ទះបងប្អូនមានហូបស្រាបន្តិចបន្តួច លុះពេលជិះម៉ូតូត្រឡប់មកផ្ទះវិញក៏រេចង្កូតជ្រុលទៅបុករបាំងថ្មពុះចែកទ្រូងផ្លូវបណ្តាលអោយបោកក្បាលបាក់កស្លាប់នៅនឹងកន្លែងតែម្តង ។
ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១១និង៣០នាទីយប់ ថ្ងៃទី១៧ វិច្ឆិកា ២០១៨ នៅចំណុចផ្លូវជាតិលេខ៤ មុខវត្តជម្ពូវន្ត័ ភូមិជម្ពូវន្ត័២ សង្កាត់ចោមចៅ៣ ខណ្ឌពោធិ៍សែនជ័យ ។
ជនរងគ្រោះដែលស្លាប់ឈ្មោះ ភឿន ឌុល ភេទប្រុស អាយុ២៨ឆ្នាំ មុខរបរលក់ដូរ ស្នាក់នៅផ្ទះជួល ភូមិឫស្សី សង្កាត់ស្ទឹងមានជ័យ ខណ្ឌមានជ័យ មានស្រុកកំណើតនៅភូមិច្រកស្វាយ ឃុំ ស្ដៅកោង ស្រុកបាភ្នំ ខេត្តព្រៃវែង ។
តាមការរៀបរាប់របស់បងប្អូនជនរងគ្រោះបានឲ្យដឹងថា មុនកើតហេតុ ប្អូនប្រុសរបស់គាត់ (ជនរងគ្រោះ) បានជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ កណ្តាល១H-២១១៥ ទៅលេងផ្ទះបងប្អូននៅសង្កាត់កំបូលក្រោយពីជួបជុំបងប្អូនក៏បានផឹកស៊ីបន្តិចបន្តួចលុះដល់ម៉ោងខាងលើប្អូនគាត់បានជិះម៉ូតូត្រឡប់មកផ្ទះវិញតែម្នាក់ឯង ។
ទោះបីបងប្អូនឃាត់ជនរងគ្រោះអោយសម្រាកនៅទីនោះមួយយប់សិន ក៏ជនរងគ្រោះមិនព្រមដែរ ដោយឃាត់មិនឈ្នះក៍បណ្តោយអោយជិះម៉ូតូមកតែឯងទៅ លុះមួយសន្ទុះក្រោយមានគេទូរស័ព្ទប្រាប់ថា ប្អូនប្រុសរបស់គាត់បានជិះម៉ូតូទៅបុករបាំងថ្មពុះចែកទ្រូងផ្លូវ បណ្តាលអោយបោកក្បាលបាក់កស្លាប់ទៅហើយ ពេលនោះគាត់មិនសឹងជឿទេ លុះមកមើលជាក់ស្តែងគឺពិតជាប្អូនប្រុសរបស់គាត់បានស្លាប់ពិតប្រាកដមែន។
ពាក់ព័ន្ធករណីខាងលើនេះក្រោយពីសមត្ថកិច្ចចុះវាស់វែងហើយបានប្រគល់សពអោយទៅបងប្អូនយកទៅធ្វើបុណ្យនៅស្រុកកំណើត ដោយឡែកម៉ូតូរបស់ជនរងគ្រោះត្រូវបានសមត្ថកិច្ចបានយករក្សាទុកបណ្តោះអាសន្នសិននៅអធិការដ្ឋាននគរបាលខណ្ឌពោធិ៍សែនជ័យ៕
ចែករំលែកព័តមាននេះ