ខេត្តកំពត ៖ មានករណីគ្រោះថ្នាក់ចរាចរណ៍មួយបានកើតឡើង កាលពីវេលាម៉ោង១១និង១០នាទីថ្ងៃទី១៧ ខែវិច្ឆិកា ឆ្នាំ២០១៨ លើផ្លូវជាតិលេខ៣ កំពតភ្នំពេញត្រង់ចំណុចស្ថិតក្នុងភូមិបឹងតារោង ឃុំព្រៃឃ្មុំ ស្រុកទឹកឈូ ខេត្តកំពត បង្កឡើងរវាងរថយន្ត និងម៉ូតូ បណ្តាលឲ្យស្ត្រីម្នាក់រងរបួសធ្ងន់ធ្ងរបាក់ជើងពីរកំណាត់ ។
សមត្ថកិច្ចនគរបាលចរារាចរណ៍ខេត្តបានឲ្យដឹងថា ហេតុការនេះកើតឡើងនៅខាងជើងផ្លូវចូលវត្តទឹកវិល ចម្ងាយប្រហែលជា២០០ម៉ែត្រ ស្ថិតនៅភូមិឃុំខាងលើ ។ មូលហេតុនៃការគ្រោះថ្នាក់នេះកើតឡើង គឺបង្កដោយរថយន្តម៉ាសាំយ៉ុង ពណ៌លឿង គ្មានផ្លាកលេខ មកដល់កន្លែងកើតហេតុបានគេចជង្ហុកផ្លូវ រួចបានរេចង្កូតទៅខាងឆ្វេងដៃបុកម៉ូតូដែលកំពុងបើកបរក្នុងទិសដៅបញ្ជ្រាសគ្នា ។
សមត្ថកិច្ចបានឲ្យដឹងទៀតថា ក្រោយពីកើតហេតុជនបើកបរខាងរថយន្តបង្កបានចុះរត់គេចខ្លួនមុនសមត្ថកិច្ចទៅដល់ ហើយបន្សល់ទុកជនរងគ្រោះ និងរថយន្តបង្កនៅកន្លែងកើតហេតុ ។
ជនរងគ្រោះខាងម៉ូតូមានឈ្មោះ យន សុគន្ធា ភេទស្រី អាយុ២៥ឆ្នាំ រស់នៅភូមិច្បារអំពៅ ឃុំព្រៃថ្នង ស្រុកទឹកឈូ ខេត្តកំពត បានរងរបួសបាក់ជើងជាពីរកំណាត់ (ត្រង់ភ្លៅ និងស្មងជើង) ម៉ូតូជនរងគ្រោះម៉ាកសេ១២៥ ពណ៌ខ្មៅ ពាក់ផ្លាកលេខភ្នំពេញ 1FW- 8099 ម៉ូតូ និងរថយន្តខូចខាតក្រពឹតតិច ។ រីឯជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យសម្ភពបូកគោ (មន្ទីរពេទ្យឯកជន) ។
ចំណែកយានយន្តទាំងពីរគ្រឿងសមត្ថកិច្ចបាននាំទៅការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តរង់ចាំដោះស្រាយតាមច្បាប់នៅពេលក្រោយ ៕
ចែករំលែកព័តមាននេះ