ខេត្តបន្ទាយមានជ័យ ៖ ជនសង្ស័យក្នុងករណីរំលោភប្អូនថ្លៃខ្លួនឯងបានសម្រេច កាលពីយប់ថ្ងៃទី១២ វិច្ឆិកា ហើយរត់គេចខ្លួន ត្រូវនគរបាលស្រុកថ្មពួក ដឹកនាំដោយលោកវរសេនីយ៍ទោ សៅ សារឿន អធិការនគរបាលស្រុក ស្រាវជ្រាវចាប់បានហើយ នៅចំណុចវត្តតេជោភ្នំឆត្រ ក្នុងស្រុកស្វាយចេក នារសៀលថ្ងៃទី១៥ ខែវិច្ឆិកា ។
ជនសង្ស័យឈ្មោះ កែវ វណ្ណឌី អាយុ២៦ឆ្នាំ ជាកម្មករ មានទីលំនៅក្នុងឃុំបន្ទាយឆ្មារ ស្រុកថ្មពួក ។ លោកអធិការប្រាប់ថា មុនឃាត់ខ្លួនជនសង្ស័យ សមត្ថកិច្ចបានទទួលពាក្យបណ្តឹងពីគ្រួសារមួយចោទជននេះ ពីបទរំលោភកូនស្រីគាត់អាយុ១៧ឆ្នាំ ដែលត្រូវជាប្អូនថ្លៃជនសង្ស័យ ខណៈពឹងឲ្យជូនទៅផ្ទះកាលពីវេលាម៉ោង៨និង៣០នាទីយប់ថ្ងៃទី១២ ខែវិច្ឆិកា ។
នាយប់នោះ ជនសង្ស័យបានពឹងប្អូនថ្លៃស្រីឲ្យជូនទៅផ្ទះដោយជិះម៉ូតូឌុបគ្នា ។ លុះទៅដល់កន្លែងស្ងាត់ចំណុចដីក្រុមហ៊ុនជាតិអភិវឌ្ឍន៍ ចម្ងាយពីផ្លូវជាតិលេខ៥៨ប្រហែល៥០០ម៉ែត្រ ក៏ឈប់ម៉ូតូចាប់បង្ខំប្អូនថ្លៃស្រីប៉ងរំលោភ ។ ប៉ុន្តែដោយនាងមិនព្រមជនសង្ស័យ ក៏ដាល់ពោះនាង២ដៃ បណ្តាលឲ្យចុករហូតសន្លប់ទើបរំលោភ ។
ក្រោយពីរំលោភរួចហើយ ជនរងគ្រោះដឹងខ្លួនវិញ ក៏ព្យាយាមអង្វរបងថ្លៃកំហូចឲ្យជូនទៅផ្ទះ ហើយនៅពេលជិះម៉ូតូដល់ពាក់កណ្តាលផ្លូវ នាងឃើញអ្នកឆ្លុះសត្វ ក៏លោតចុះស្រែកឲ្យជួយ ។ ប្រភពព័ត៌មានឲ្យដឹងទៀតថា ក្នុងហេតុការណ៍នោះ អ្នកឆ្លុះសត្វបានរត់ទៅជួយជនរងគ្រោះតាមសម្លេងស្រែកហៅ ព្រមទាំងចាប់ជនកំហូចវ៉ៃត្រូវ២ខ្សែក្រវាត់ទៀតផង ។ ចំណែកជនសង្ស័យ ក្រោយពីត្រូវអ្នកឆ្លុះសត្វវាយ ក៏បើកម៉ូតូគេច ខ្លួនបាត់តាំងពីយប់កើតហេតុនោះមក ។
លោកអធិការបញ្ជាក់ថា បន្ទាប់ពីមានការស្រាវជ្រាវយ៉ាងយកចិត្តទុកដាក់តាមបទបញ្ជារបស់លោកឧត្តមសេនីយ៍ទោ អាត់ ខែម ស្នងការនគរបាលខេត្ត ក៏ឈានដល់ការឃាត់ខ្លួនជនសង្ស័យបាននៅវេលាម៉ោង៣និង៣០នាទីរសៀលថ្ងៃទី១៥ ខែវិច្ឆិកា នៅក្នុងស្រុកស្វាយចេក ខណៈជនសង្ស័យគេចខ្លួនទៅសម្ងំនៅទីនោះ។
លោកអធិការបន្តថា ក្រោយពីឃាត់ខ្លួននិងសាកសួររួច សមត្ថកិច្ចក៏បានបញ្ជូនជនសង្ស័យទៅស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធី ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ