ខេត្តត្បូងឃ្មុំ ៖ មានហេតុការណ៍ភ្ញាក់ផ្អើលមួយបានកើតឡើង ដោយសិស្សតូចៗប្រុស-ស្រីចំនួន៤០នាក់បានពុល ក្អួតចង្អោរចុកពោះ និងរាក កាលពីវេលាម៉ោង៩ និង៣០នាទីព្រឹកថ្ងៃទី១៦ ខែវិច្ឆិកា នៅសាលាបឋមសិក្សាទន្លេបិទ ស្ថិតក្នុងភូមិទន្លេបិទ ឃុំទន្លេបិទ ស្រុកត្បូងឃ្មុំ ។
ចំពោះការពុលនេះ ត្រូវបានគេដាក់ការសង្ស័យទៅលើចំណីអាហារ ដែលលក់ក្នុងសាលានៅតូបរបស់អ្នកគ្រូ អុឹប នី អាយុ៤០ឆ្នាំ ជាគ្រូថ្នាក់ទី៤«ក» ។ ភ្លាមៗ សិស្សដែលពុលទាំងអស់ ត្រូវបាននាំយកទៅសង្គ្រោះនៅមន្ទីរពេទ្យបង្អែកខេត្តកំពង់ចាម ។
លោកវរសេនីយ៍ត្រី ប៉ន់ ស៊ាងហុី នាយប៉ុស្តិ៍នគរបាលរដ្ឋបាលឃុំទន្លេបិទបានឱ្យដឹងថា ស្របពេលដែលសិស្សតូចៗចេញលេង ក៏នាំគ្នាទៅទិញបាយនិងផឹកភេសជ្ជៈ Samurai បន្តិចក្រោយមក ស្រាប់តែមានអ្នក ខ្លះក្អួតចង្អោរ ខ្លះចុកពោះ រាកបែកញើស និងទន់ដៃទន់ជើង ។ សិស្សពុលដំបូងមានចំនួន១០នាក់ តែជាបន្តបន្ទាប់ក៏ឡើងរហូតដល់៤០នាក់ ។
លោកនាយប៉ុស្តិ៍បន្តថា សិស្សភាគច្រើនផឹកភេសជ្ជៈ Samurai ផលិតនៅក្នុងប្រទេសយើង ដែលមានចំនួន២ពណ៌ គឺក្រហមនិងលឿង និងមួយចំនួនហូបបាយ ជ្រក់ល្ហុង និងប្រហិតគ្រប់ប្រភេទ ដែលដាក់លក់ ។ សិស្សដែលពុលទាំងអស់មានស្រី៨នាក់ ត្រូវបានអាណាព្យាបាលដឹកយកទៅសង្គ្រោះនៅមណ្ឌលសុខភាពទន្លេបិទ និងបញ្ជូនតាមរថយន្តមកសង្គ្រោះបន្ទាន់ទៅមន្ទីរពេទ្យបង្អែកខេត្តកំពង់ចាម ។
ក្រោយពីទទួលបានព័ត៌មាននេះ នគរបាលស្រុកត្បូងឃ្មុំ សហការជាមួយនគរបាលប៉ុស្តិ៍ទន្លេបិទ និងគ្រូ ពេទ្យមណ្ឌលសុខភាព បានទៅជួយអន្តរាគមន៌និងធ្វើការស្រាវជ្រាវរកមូលហេតុនៃការពុល ដោយយកសំណាកទៅវិភាគរកមូលហេតុឲ្យច្បាស់លាស់ ។
សូមបញ្ជាក់ថា កន្លងមក ករណីពុលបែបនេះមិនធ្លាប់មានទេនៅតាមសាលារៀន ។ ចំណែកលោកវេជ្ជបណ្ឌិត កែវ វណ្ណៈ ប្រធានមន្ទីរសុខាភិបាលខេត្ត មានប្រសាសន៍ថា រហូតមកដល់រសៀលថ្ងៃដដែល អ្នកដែលពុលចំណីអាហារទាំង៤០នាក់ ក្នុងនោះមានមនុស្សចាស់ម្នាក់ត្រូវបាននាំទៅសង្គ្រោះនៅមណ្ឌលសុខភាព និងបានយកសំណាកទៅពិនិត្យដើម្បីរកមូលហេតុពិតប្រាកដថាពុលដោយសារអ្វី ?
ភេសជ្ជៈ Samurai ជាប្រភេទភេសជ្ជៈប៉ូវកម្លាំងមានច្រើនរសជាតិ និងជាទីពេញនិយមសម្រាប់កុមារផងដែរ ទោះបីជាបែបណាវាគ្រាន់តែជាការសង្ស័យប៉ុណ្ណោះ ល្គឹកណាមិនទាន់មានការអះអាងជាផ្លូវការណា មួយនៅឡើយ ។ រហូតមកដល់រសៀលថ្ងៃដដែលនេះដែរ សិស្សានុសិស្សដែលពុលចំណីនេះ តាមគ្រូពេទ្យប្រាប់ថា បានធូរស្បើយវិញហើយ ៕
ចែករំលែកព័តមាននេះ