ខេត្តបន្ទាយមានជ័យ ៖ ដោយមានការសហការល្អ និងផ្តល់ព័ត៌មានពីគ្នាទៅវិញទៅមកទាន់ពេលវេលា ជនសង្ស័យចំនួន៣នាក់ដែលធ្លាប់ធ្វើសកម្មភាពយ៉ាងសកម្មនៅខេត្តសៀមរាប ត្រូវមកអស់លក្ខណ៍នៅខេត្តបន្ទាយមានជ័យ នៅថ្ងៃទី១៦ ខែវិច្ឆិកា ឆ្នាំ២០១៨ ។
លោកវរសេនីយ៍ឯក ខែម សុភ័ណ្ឌ នាយការិយាល័យនគរបាលព្រហ្មទណ្ឌកំរិតធ្ងន់បានប្រាប់ឲ្យដឹងថា ជនសង្ស័យទាំង៣នាក់នេះធ្លាប់ធ្វើសកម្មភាពឆក់យ៉ាងសកម្មនៅខេត្តសៀមរាប ដោយក្រោយពីទទួលបានព័ត៌មានពីនគរបាលជំនាញខេត្តសៀមរាប លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យបានដាក់បទបញ្ជាដល់ការិយាល័យជំនាញផែននគរបាលព្រហ្មទណ្ឌដឹកនាំដោយលោកឧត្តមសេនីយ៍ត្រី សិទ្ធ ឡោះ ស្នងការរងបើកការស៊ើបអង្កេតស្រាវជ្រាវ ឈានដល់ការបង្ក្រាប ចាប់ឃាត់ខ្លួនបានទាំង៣នាក់ ។
ជនសង្ស័យទី១មានឈ្មោះ ពៅ អីឆាយ ភេទប្រុស អាយុ១៧ឆ្នាំ រស់នៅខេត្តប៉ៃលិន, ទី២-ឈ្មោះ សាត ឈីឡាង ភេទប្រុស អាយុ១៧ឆ្នាំ រស់នៅខេត្តព្រះវិហារ ពីដើមរស់ភូមិអូរអិបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ បច្ចុប្បន្ននៅខេត្តព្រះវិហារ និងទី៣-ឈ្មោះ លាង ហាក់ ហៅ ញ៉ ភេទប្រុស អាយុ១៦ឆ្នាំ រស់នៅខេត្តសៀមរាប ពីដើមរស់នៅអូរអំបិល ក្រុងសិរីសោភ័ណ ខេត្តបន្ទាយមានជ័យ ។
ជនទាំង៣នាក់នេះធ្វើសកម្មភាពឆក់នៅសៀមរាបកាលពីថ្ងៃទី០៤ ខែវិច្ឆិកា ឆ្នាំ២០១៨ ដោយជនសង្ស័យបានប្រព្រឹត្តនៅខេត្តសៀមរាបនៅថ្ងៃដដែលគឺថ្ងៃទី១៦ ខែវិច្ឆិកា បានប្រគល់ជនសង្ស័យទាំង៣នាក់ឲ្យទៅនគរបាលការិយាល័យជំនាញខេត្តសៀមរាប ដើម្បីចាត់ការបន្តតាមនីតិវិធីច្បាប់ ៕
ចែករំលែកព័តមាននេះ