រាជធានីភ្នំពេញ ៖ ស្ត្រីខ្មែរមួយរូបដែលចាត់ទុកជាស្ត្រីខ្មែរដំបូង បានបង្ហាញនូវការរំជួលចិត្តរហូតសរ
សេរលិខិតផ្ញើតាម Twitter ទៅកាន់លោក Syed Saddiq ជារដ្ឋមន្ត្រីក្រសួងយុវជន និងកីឡាម៉ាឡេស៊ី
ដែលមានវ័យក្មេងបំផុត អាយុទើបតែជាង២០ឆ្នាំប៉ុណ្ណោះ តែទទួលបានជោគជ័យ សម្រាប់ការងាររបស់លោក ។ ស្ត្រីខ្មែររូបនោះ គឺអ្នកនាងប្រាក់ មុនីរ័ត្ន ដោយប្រាប់អាស័យដ្ឋាន ជាអ្នករស់នៅរាជធានីភ្នំពេញ ប្រទេសកម្ពុជា ។
ជុំវិញការរំជួលចិត្តរបស់ ប្រាក់ មុនីរ័ត្ន ក្រៅពីការផ្ញើសំបុត្រ ក៏មានកាដូតុក្កតាHero គួរឱ្យស្រឡាញ់មួយ
ផ្ញើទៅកាន់រដ្ឋមន្ត្រីវ័យក្មេងរូបសង្ហាម៉ាឡេស៊ីផងដែរ ។ មុនីរ័ត្ន ដែលជាអ្នកតាមដានគ្រប់សកម្មភាពរបស់រដ្ឋមន្ត្រីក្រសួងយុវជន និងកីឡា ទើបតែឡើងកាន់តំណែងថ្មីៗនេះ បានរៀបរាប់ទាំងអារម្មណ៍រំភើបរបស់នាងមកកាន់គេហទំព័រ Sabayថា ក្រោយពេលលោក Syed Saddiq Abdul Rahman បានឆ្លើយតបយ៉ាងក្បោះក្បាយមកកាន់នាង គឺធ្វើឱ្យនាងរំភើបខ្លាំង ដែលពិបាកនិយាយឱ្យត្រូវថា នាងរំភើបកម្រិតណានោះ ព្រោះនាងបានសម្រេចចិត្តផ្ញើសំបុត្រ និងកាដូនេះទៅទាំងមិនបានរំពឹងទុកថា លោករដ្ឋមន្ត្រីនឹងឆ្លើយតបឡើយ ព្រោះដឹងស្រាប់ហើយថា លោកមានតួនាទីជាអ្វី ហើយភារកិច្ចលោករវល់ប៉ុណ្ណានោះ ។
តែអ្វីដែលនាងមិនរំពឹងទុក គឺស្រាប់តែក្លាយជាការពិត ដោយលោករដ្ឋមន្ត្រីរូបសង្ហារូបនេះ ឆ្លើយតបប្រកបដោយគុណធម៌ គួរឱ្យគោរពបំផុត ។ ត្រង់នេះ គឺកាន់តែធ្វើឲ្យមុនីរ័ត្ន ពេញចិត្តនឹងលោកកាន់តែខ្លាំងឡើងត្រង់ថា លោកមិនប្រកាន់ខ្លួនថា ជារដ្ឋមន្ត្រីតួនាទីខ្ពស់អ្វីនោះទេ ដោយបានទទួលកាដូនាងថែមទាំងអានខ្លឹមសារនៃសំបុត្ររបស់នាងទៀតផង ទាំងនាងជាមនុស្សសាមញ្ញ ចំណែកលោកមានឋានៈខ្ពង់ខ្ពស់ក្នុងជួររដ្ឋាភិបាលម៉ាឡេស៊ី ។
ចំណែកឯមូលហេតុ នាំឱ្យនាងសម្រេចផ្ញើសំបុត្រនេះ ទៅកាន់លោក Syed Saddiq Abdul Rahman ព្រោះនាងពេញចិត្តខ្លាំងបំផុត នូវអ្វីដែលលោកមានក្នុងនាមជាយុវជនម្នាក់ ដែលមានវ័យជាង២០ឆ្នាំសោះ បានខិតខំតស៊ូរហូតបានជោគជ័យ ខណៈដែលយុវជនខ្លះ ក្នុងវ័យស្របាលលោកកំពុងតែរីករាយសប្បាយនឹងជីវិតជាយុវវ័យនៅឡើយ ។ នាងប្រាក់ មុនីរ័ត្ន បន្តថា លោកបានបំពេញតួនាទីជារដ្ឋមន្ត្រីនេះ បានយ៉ាងល្អ ដូចអ្វីដែលលោកបានឃោសនាពេលបោះឆ្នោត គឺលោកពិតជាធ្វើបានដូចអ្វីដែលបាននិយាយមែន ។ លោកបានធ្វើជាគំរូដ៏ល្អដល់យុវជនតែងតែមានសារជំរុញលើកទឹកចិត្តដល់យុវជនដទៃទៀត ។ ជាក់ស្ដែងដូចជារូបនាងមានកម្លាំងចិត្ត និងទឹកចិត្តក៏ដោយសារមានរដ្ឋមន្ត្រីវ័យក្មេងនេះជាគំរូ ។
សូមបញ្ជាក់ថា កាលពីថ្ងៃទី២ កក្កដា ឆ្នាំ២០១៨ លោក Syed Saddiq Abdul Rahman បានស្បថចូលកាន់តំណែងជារដ្ឋមន្ត្រីក្រសួងយុវជន និងកីឡាថ្មីរបស់ម៉ាឡេស៊ី ។ បុរសវ័យ២៥ឆ្នាំរូបនេះ បានក្លាយជារដ្ឋមន្ត្រីក្មេងជាងគេបំផុត ក្នុងប្រទេសម៉ាឡេស៊ីដែលបានស្បថ ចូលកាន់តំណែងជាមួយអនុរដ្ឋមន្ត្រី២៣រូបទៀតនៅចំពោះព្រះភ័ក្ត្រព្រះមហាក្សត្រ Sultan Muhammad V ។ ក្នុងលិខិតរបស់នាងប្រាក់ មុនីរ័ត្ន បានសរសេរជាអាទិ៍ថា ហេតុផលដែលនាងខ្ញុំសរសេរលិខិតជូនមកលោក ពីព្រោះខ្ញុំគ្រាន់តែចង់អរគុណដែលលោកបានធ្វើជាអ្នកដឹកនាំដ៏ល្អមួយ ដើម្បីជំរុញយុវជន ។ ជាមួយគ្នានេះផងដែរ ក៏អរគុណដល់ឪពុកម្តាយរបស់អ្នក ដែលបានផ្តល់កំណើតអ្នកមកលើពិភពលោកនេះ ដើម្បីធ្វើរឿងដ៏អស្ចារ្យ ។
លើសពីនេះទៅទៀត ខ្ញុំចង់ឱ្យអ្នកដឹងថា អ្នកជាអ្នកបំផុសគំនិតខ្ញុំ ព្រោះខ្ញុំតែងតែស្តាប់អ្នកតាមរយៈអុីន
ស្តាក្រាម Twitter ហ្វេសប៊ុក និងតាមរយៈសារព័ត៌មានផ្សេងៗទៀត ។ យោងតាមនេះ ខ្ញុំទទួលបានដំបូន្មានល្អពីអ្នក ។ វាពិតជាមានអត្ថន័យ និងបំផុសគំនិតដល់យុវជន ។ ខ្ញុំមិនមែនជាជនជាតិម៉ាឡេស៊ីទេ ប៉ុន្តែខ្ញុំមានមោទនភាពចំពោះអ្នក ព្រោះអ្នកគឺជាអ្នកបំផុសគំនិត ហើយអ្នកធ្វើអ្វីមួយដោយបេះដូង ។ ខ្ញុំមានមោទនភាពដែលបានក្លាយជាអ្នកគាំទ្ររបស់អ្នក ។ សូមបន្តធ្វើនូវរឿងល្អៗ និមិត្តរូបរបស់ខ្ញុំ ។ ឆ្លៀតពេលនេះ ខ្ញុំសូមប្រាប់អ្នកថាខ្ញុំមានឱកាសមកលេងប្រទេសម៉ាឡេស៊ី (១៦-២០ ខែតុលា ឆ្នាំ២០១៨) ខ្ញុំបានយកអំណោយតូចមួយមកជូនអ្នក ។ វាគឺជាវីរបុរសដែលតំណាងឱ្យអ្នក ដើម្បីទប់ទល់ឧបសគ្គនានា ព្រោះខ្ញុំជាអ្នកគាំទ្រពិតប្រាកដរបស់អ្នក ដូច្នេះខ្ញុំបានកត់សម្គាល់ថា អ្នកមានការងារជាច្រើនដើម្បីបំពេញនិងគ្រប់គ្រងបញ្ហាជាច្រើន ។
ទោះយ៉ាងណាក៏ដោយ សូមថែរក្សាសុខភាពរបស់អ្នក ។ ខ្ញុំសង្ឃឹមថា អ្នកចូលចិត្តអំណោយរបស់ខ្ញុំ ។ ដោយស្មោះត្រង់ ខ្ញុំមានបំណងចង់ស្តាប់សុន្ទរកថារបស់អ្នកជំនួសឱ្យការស្តាប់តាម YouTube និងមធ្យោបាយផ្សេងៗទៀត ។ វាពិតជារំភើបណាស់ ប្រសិនបើខ្ញុំមានឱកាសល្អមួយ ដើម្បីមើលនិងស្តាប់អ្នក ។ ខ្ញុំពិតជាពេញចិត្តចំពោះសាររបស់អ្នក «យុវជនមិនគ្រាន់តែជាអ្នកដឹកនាំនៃថ្ងៃពេលអនាគតទេ ពួកគេគឺជាអ្នកដឹកនាំនៅថ្ងៃនេះផងដែរ» ៕
ចែករំលែកព័តមាននេះ