ខេត្តបាត់ដំបង ៖ ក្រុមអ្នកញៀននឹងល្បែងស៊ីសងគ្មានច្បាប់ទម្លាប់រាប់រយនាក់ បាននិងកំពុងប្រមូលផ្ដុំគ្នាសំងំប្រព្រឹត្តយ៉ាងសុខសាន្ត ជ្រោកក្រោមស្លាកកាស៊ីណូមួយកន្លែងក្នុងស្រុកសំពៅលូន ដោយមិនរំខានដល់អាជ្ញាធរ ឬសមត្ថកិច្ចនៅក្នុងស្រុកនេះឡើយ ។ នេះបើតាមការទម្លាយឱ្យដឹងពីមន្ត្រីមួយចំនួន ដែលមិនសប្បាយចិត្តនឹងការឃុបឃិតឱ្យមានល្បែងស៊ីសងយ៉ាងអាវ៉ាសែនេះ…
ខេត្តបាត់ដំបង ៖ ក្រុមអ្នកញៀននឹងល្បែងស៊ីសងគ្មានច្បាប់ទម្លាប់រាប់រយនាក់ បាននិងកំពុងប្រមូលផ្ដុំគ្នាសំងំប្រព្រឹត្តយ៉ាងសុខសាន្ត ជ្រោកក្រោមស្លាកកាស៊ីណូមួយកន្លែងក្នុងស្រុកសំពៅលូន ដោយមិនរំខានដល់អាជ្ញាធរ ឬសមត្ថកិច្ចនៅក្នុងស្រុកនេះឡើយ ។ នេះបើតាមការទម្លាយឱ្យដឹងពីមន្ត្រីមួយចំនួន ដែលមិនសប្បាយចិត្តនឹងការឃុបឃិតឱ្យមានល្បែងស៊ីសងយ៉ាងអាវ៉ាសែនេះ ។
ប្រភពបានឱ្យដឹងថា ល្បែងដែលកំពុងបើកដំណើរការយ៉ាងពពាក់ពពូន ជ្រោកក្រោមស្លាកកាស៊ីណូនៅក្នុងស្រុកសំពៅលូននេះ គឺបានដំណើរការជិត១ខែហើយ ដែលមានល្បែងអាប៉ោង បៀរ ហ្គេមបាញ់ត្រី និងសង្វៀនបញ្ជល់មាន់៘
មន្ត្រីមួយរូបបានទម្លាយឱ្យដឹងថា កាស៊ីណូនោះមានច្បាប់អនុញ្ញាត និងមានម្ចាស់ឈ្មោះនី កន តែបើកដំណើរការមិនទៀងទាត់ទេ ។ ប៉ុន្តែជិត១ខែកន្លងទៅនេះ ក្រុមអ្នកញៀនល្បែងខាងលើ បានជួលទីតាំងមួយផ្នែកខាងក្រោយនៃកាស៊ីណូ ដើម្បីបើកប្រព្រឹត្តល្បែងខុសច្បាប់នេះ ។
មន្ត្រីដដែលបានប្រាប់ថា ដំបូងឡើយក្រុមអ្នកលេងល្បែងនេះ តែងប្រមូលផ្ដុំគ្នាបើកលេងចល័ត នៅតាមផ្ទះ ឬតាមព្រៃចម្ការ ។ ប៉ុន្តែដោយសារមានការរំខានពីអ្នកសារព័ត៌មានខ្លាំងពេក ទើបសមត្ថកិច្ចណែនាំឲ្យមេល្បែងអាវ៉ាសែទាំងនេះ ចូលជ្រោកក្រោមស្លាកកាស៊ីណូ ដើម្បីបិទបាំងបទល្មើស ។
ប្រភពដដែលបញ្ជាក់ថា បើតាមផ្លូវច្បាប់ បនល្បែងនៅក្នុងកាស៊ីណូ មិនអនុញ្ញាតឱ្យពលរដ្ឋខ្មែរចូលលេងឡើយ ។ ប៉ុន្តែផ្ទុយទៅវិញ នៅក្នុងកាស៊ីណូខាងលើនេះ ស្ទើរ៩០% គេឃើញមានតែពលរដ្ឋខ្មែរប៉ុណ្ណោះ ដែលចូលលេង ដោយគ្មានមន្ត្រី ឬស្ថាប័នមានសមត្ថកិច្ចណាមួយចុះពិនិត្យឡើយ ។
បច្ចុប្បន្ន ល្បែងស៊ីសងគ្មានច្បាប់ស្ទើរគ្រប់ប្រភេទ កំពុងបើកដំណើរការជ្រោកក្រោមស្លាកកាស៊ីណូខាងលើនេះ រីឯសមត្ថកិច្ចគ្រប់ស្ថាប័ននៅក្នុងស្រុកនេះ ត្រូវគេសង្ស័យថា ទំនងអាចទទូលបានផលប្រយោជន៍ពីបទល្មើសល្បែងស៊ីសងនេះ ក្រាស់ក្រែលហើយទើបគ្មានការទប់ស្កាត់ ឬបង្ក្រាបបែបនេះ។
ជាមួយនឹងការរីករាលដាលនៃបនល្បែងស៊ីសងគ្មានច្បាប់ ដែលគ្មានការបង្ក្រាបនេះ សម្ដេចក្រឡាហោម
ស ខេង តែងបានចេញសេចក្ដីណែនាំ ឬក្រើនរំលឹកម្ដងហើយម្ដងទៀត ដល់សមត្ថកិច្ចគ្រប់ខេត្ត-រាជធានី ត្រូវមានវិធានការទប់ស្កាត់ និងបង្ក្រាបល្បែងស៊ីសងគ្មានច្បាប់គ្រប់ប្រភេទ ។
ប៉ុន្តែបទបញ្ជារបស់សម្ដេចនេះ ហាក់មិនត្រូវបានអាជ្ញាធរ ឬសមត្ថកិច្ចតាមបណ្ដាខេត្ត យកចិត្តទុកដាក់ស្ដាប់ឡើយ ។ ផ្ទុយទៅវិញ មានតែការឃុបឃិតគ្នាបើកឲ្យមានបទល្មើសនេះ ជាថ្នូរនឹងទទូលបាននូវផលប្រយោជន៍។
ដូច្នេះ ថ្នាក់ដឹកនាំខេត្តគួរតែមានវិធានការឱ្យបានតឹងរឹងបំផុត ចំពោះសមត្ថកិច្ចខិលខូចមួយចំនួន ដែលស្ថិតនៅពីក្រោយនៃបទល្មើសល្បែងស៊ីសងនេះ ៕
ចែករំលែកព័តមាននេះ