ខេត្តប៉ៃលិន ៖ ក្មេងស្រីតូចអាយុទើប១ខួប ដែលរលាកទឹកសម្លកំពុងពុះបណ្តាលឱ្យពងពេញខ្លួនស្ទើររលេះរលួយនោះ ពេលនេះបានធូរស្រាលបន្តិចវិញហើយ បន្ទាប់ពីក្រុមគ្រួសារបញ្ជូនយកទៅសង្គ្រោះនៅមន្ទីរពេទ្យសង្គ្រោះបន្ទាន់(Emergency) ខេត្តបាត់ដំបង និងត្រូវបានឪពុកម្តាយដឹកត្រឡប់មកផ្ទះវិញ កាលពីរសៀលថ្ងៃទី១៤ ខែវិច្ឆិកា ។ បច្ចុប្បន្ន ក្មេងស្រីតូចដ៏គួរឱ្យអាណិតរូបនេះ កំពុងត្រូវបានឪពុកម្តាយមើលថែទាំនិងលាងរបួសយ៉ាងយកចិត្តទុកដាក់ ។
សូមបញ្ជាក់ថា ហេតុការណ៍ក្មេងស្រីតូចរលាកទឹកសម្លក្តៅនេះ បានកើតឡើងកាលពីវេលាម៉ោង៤និង៤០នាទីរសៀលថ្ងៃទី១៣ ខែវិច្ឆិកា នៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ហើយបានយកទៅដល់មន្ទីរពេទ្យបង្អែកខេត្ត នាវេលាម៉ោង៤និង៤៥នាទីរសៀលថ្ងៃដដែល ។
ក្មេងស្រីរងគ្រោះឈ្មោះ ឆុំ រចនា អាយុ១ឆ្នាំ រងរបួសរលាកទឹកសម្លក្តៅស្ទើរពេញដងខ្លួន ។ ឪពុកក្មេងស្រីឈ្មោះ ជុំ សាន អាយុ៥០ឆ្នាំ ជាមន្ត្រីនគរបាលនៅអធិការដ្ឋានស្រុកសំឡូត ម្តាយឈ្មោះ លីម ស្រីម៉ៅ អាយុ៤០ឆ្នាំ ។
លោក ជុំ សាន បានឱ្យដឹងតាមទូរស័ព្ទកាលពីវេលាម៉ោង៩និង១០នាទីព្រឹកថ្ងៃទី១៥ ខែវិច្ឆិកាថា កូនស្រីតូចរបស់គាត់ឈ្មោះ ឆុំ រចនា ត្រូវបាននាំយកចេញពីមន្ទីរពេទ្យសង្គ្រោះបន្ទាន់ខេត្តបាត់ដំបងវិញហើយ ដោយសារតែរបួសធូរស្រាលជាងមុនបន្តិច ហើយណាមួយការចំណាយថ្លៃពេទ្យអស់ច្រើន លំបាកក្នុងការស្នាក់នៅមើលថែកូន ក៏ដឹកត្រឡប់ទៅលាងរបួសនៅឯផ្ទះរបស់គាត់ក្នុងខេត្តប៉ៃលិនវិញ ។
លោកបន្តថា លោកពិតជាភ័យបារម្ភនឹងកូនខ្លាំងណាស់ លុះឃើញគ្រូពេទ្យរដ្ឋមិនសូវយកចិត្តទុកដាក់ ក៏យកទៅគ្លីនិកឯកជន រួចបញ្ជូនបន្តទៅខេត្តបាត់ដំបង ។ លោកដឹងថា គ្រូពេទ្យរដ្ឋតែងតែយឺតយ៉ាវហើយ តែទោះបីជាយ៉ាងណាក្នុងនាមជាគ្រូពេទ្យ ត្រូវតែគោរពតាមវិជ្ជាជីវៈ ហើយសង្គ្រោះក្មេងឱ្យបានទាន់ពេលសិន រួចសិមឪពុកម្តាយរកទិញថ្នាំតាមក្រោយទៀត ។
ពាក់ព័ន្ធទៅនឹងបញ្ហានេះ លោកវេជ្ជបណ្ឌិត អាង នាង ប្រធានមន្ទីរសុខាភិបាលខេត្ត បានឱ្យដឹងថា ចំពោះបង់រុំរបួសនិងបង់កំប្រេស្សមិនខ្វះទេនៅមន្ទីរពេទ្យបង្អែកខេត្ត ដោយគ្រូពេទ្យប្រាប់ឱ្យឪពុកម្តាយក្មេងរងគ្រោះទៅរកទិញតែស្ប្រ៉ាយបាញ់ឱ្យត្រជាក់សាច់ប៉ុណ្ណោះ ដោយសារនៅក្នុងមន្ទីរពេទ្យអត់មាន ។
ស្ប្រ៉ាយដែលបាញ់ឱ្យត្រជាក់គេដាក់លក់នៅតាមឱសថស្ថាន មិនមែនជាស្ប្រ៉ាយសម្រាប់បាញ់ពេលធ្វើកម្មវិធីខួបកំណើតនោះដែរ ព្រោះស្ប្រ៉ាយបាញ់ឱ្យត្រជាក់នេះមានសារជាតិថ្នាំពេទ្យសម្រាប់ជួយដល់ស្បែកដែលរលាកនោះបានធូរស្រាល ឹ៕
ចែករំលែកព័តមាននេះ