ទីក្រុងវ៉ាស៊ីនតោន ៖ ស្រីលង្កាទិញសណ្តែកសៀងពីសហរដ្ឋអាមេរិកប្រមាណ៣ពាន់តោនកាលពីឆ្នាំមុន ខណៈដែលប្រទេសចិនបានទិញប្រមាណ៣២លានតោន ប៉ុន្តែបច្ចុប្បន្ន សហរដ្ឋអាមេរិកស្ទើរតែមិនបានលក់សណ្តែកសៀងឲ្យទៅប្រទេសចិនទេ បន្ទាប់ពីមានការដាក់ពន្ធ២៥% កាលពីខែកក្កដាកន្លងមកនេះ ។
ការសម្រេចនេះកើតមានឡើងក្នុងការឆ្លើយតបទៅនឹងការដាក់ពន្ធរបស់អាមេរិកលើផលិតផលចិនដោយលោកប្រធានាធិបតី ដូណាល់ ត្រាំ (Donald Trump) ។
កសិករអាមេរិកត្រូវការទីផ្សារទំហំស្មើស្រីលង្កាដល់ទៅ១១.០០០ដងដើម្បីអាចជំនួសទីផ្សារចិនបាន ។ កសិករមួយចំនួនតូចបានបោះបង់ការរង់ចាំដំណោះស្រាយផ្នែកការទូត និងបានចាប់ផ្តើមស្វែងរកទីផ្សារថ្មីៗ ។ ពួកគេកំពុងតែដាក់សម្ពាធលើតំណាងរាស្ត្រ ចូលរួមការតាំងពិព័រណ៍ពាណិជ្ជកម្មនៅបរទេស ខណៈដែលបោះបង់ការងារក្នុងកសិដ្ឋានរបស់ខ្លួន ។
យោងតាមក្រសួងកសិកម្មរបស់សហរដ្ឋអាមេរិកបានឲ្យដឹងថា ប្រាក់ចំណូលពីកសិកម្មរបស់សហរដ្ឋអាមេរិកនឹងធ្លាក់ចុះដល់៦៥,៧ប៊ីលានដុល្លារក្នុងឆ្នាំនេះ ឬទាបជាង៥ឆ្នាំមុនដល់ទៅ៤៧% ។
ដោយប្រទេសចិនតែងតែទិញប្រមាណ៦០%នៃការនាំចេញសណ្តែកសៀងសរុបរបស់សហរដ្ឋអាមេរិក កសិករទាំងនេះដឹងថាពួកគេនឹងជួបឧបសគ្គ ហើយការព្យាយាមកសាងទំនាក់ទំនងពាណិជ្ជកម្មថ្មីៗនឹងត្រូវការពេលជាច្រើនឆ្នាំ ។
លោក Doug Schroeder កសិករម្នាក់នៅ Bellflower នៃរដ្ឋ Illinois បានឲ្យដឹងថា ៖« ប្រសិនបើពួកយើងអាចធ្វើឲ្យអតិថិជនងាកចេញពីនយោបាយ ពួកយើងអាចធ្វើឲ្យពួកគេជឿជាក់យើងបាន បើទោះជាពួកគេមិនជឿជាក់លើរដ្ឋាភិបាលអាមេរិកក៏ដោយ ។
ប្រសិនបើពួកយើងអាចធ្វើដូច្នេះ ពួកគេនឹងនៅតែចង់ទិញពីពួកយើងដដែលពេលដែលសង្គ្រាមពាណិជ្ជកម្មត្រូវបានបញ្ចប់ »៕
ចែករំលែកព័តមាននេះ