រាជធានីភ្នំពេញ ៖ កម្មករ-កម្មការិនីរោងចក្រកាត់ដេរយីហោ«ខ្វាន់ទុម ក្លូស៊ីង»ជាង២ពាន់នាក់បានប្រមូលផ្ដុំគ្នាធ្វើការតវ៉ាទាមទារសុំឲ្យទូទាត់ប្រាក់អតីតភាពការងារ ប្រាក់ឈ្នួល និងប្រាក់បំណាច់ផ្សេងៗ ជូនពួកគាត់ បន្ទាប់ពីពួកគាត់បានដឹងថា រោងចក្រខាងលើបានផ្លាស់ប្ដូរថៅកែថ្មី ហើយបើតាមច្បាប់ការងារត្រូវតែទូទាត់ប្រាក់ខាងលើជូនពួកគាត់ជាមុនសិនទើបអាចផ្លាស់ប្ដូរបាន ។
ប៉ុន្តែផ្ទុយទៅវិញរោងចក្រមួយនេះមិនបានគោរពច្បាប់ការងារហើយថែមទាំងប្រើប្រាស់អំណាចមេធាវីមកធ្វើការគំរាមកំហែងដល់កម្មករទៀតទើបពួកគាត់នាំគ្នាផ្ទុះការតវ៉ាបែបនេះ។
ការតវ៉ានេះបានផ្ទុះឡើងកាលពីវេលាម៉ោង១១ព្រឹកថ្ងៃទី១៦ ខែវិច្ឆិកា ឆ្នាំ២០១៨ នៅរោងចក្រកាត់ដេរយីហោ«ខ្វាន់ទុម ក្លូស៊ីង» ដែលមានទីតាំងស្ថិតនៅក្នុងភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។
កម្មករបាននិយាយថា ពួកគាត់មានគ្នាចំនួនសរុប២៤៨៣នាក់ ហើយបានបម្រើការងារនៅក្នុងរោងចក្រខាងលើនោះអស់រយៈពេលជាច្រើនឆ្នាំមកហើយដែលមានថៅកែជាជនជាតិចិន ដោយកន្លងមកមិនដែលមានបញ្ហាអ្វីកើតឡើងឡើយ ពួកគាត់ខិតខំធ្វើការទៅតាមមុខព្រួញរៀងៗខ្លួនដើម្បីជួយដល់ថៅកែក្នុងទិសដៅមួយមិនចង់ឲ្យរោងចក្រជួបការការលំបាកឈានដល់ការក្ស័យធុននាំឲ្យបាត់បង់ការងារនោះឡើយ ។
ប្រភពដដែលបានបន្តទៀតថា រហូតមកដល់ពេលថ្មីៗនេះពួកគាត់ទទួលដំណឹងថា រោងចក្រត្រូវផ្លាស់ប្ដូរថៅកែថ្មីដោយស្ងាត់ៗមិនបានជូនដំណឹងឲ្យពួកគាត់បានដឹងជាមុនឡើយ ព្រោះបើតាមច្បាប់មុននឹងដូរថៅកែឬអ្នកគ្រប់គ្រងថ្មីរោងចក្រត្រូវជូនដំណឹងដល់កម្មករមុន មិនតែប៉ុណ្ណោះត្រូវតែទូទាត់ប្រាក់អតីតភាពការងារ ប្រាក់ឈ្នួល និងប្រាក់បំណាច់ផ្សេងៗជូនកម្មករសិនទើបដូរបាន ។
ចំណែករោងចក្រនេះមិនគោរពច្បាប់ការងារទើបនៅថ្ងៃទី១១ ខែវិច្ឆិកា ពួកគាត់បានផ្ទុះការតវ៉ាទាមទារប្រាក់ទាំងអស់ខាងលើ ប៉ុន្តែដោយសារតែគ្មានដំណោះស្រាយទើបការតវ៉ាអូសបន្លាយពេលរហូតមក ។
កម្មករបានបន្តឲ្យដឹងទៀតថា មិនតែប៉ុណ្ណោះរោងចក្រមិនត្រឹមតែគ្មានដំណោះស្រាយជាមួយពួកគាត់នោះទេថែមទាំងបានប្រើប្រាស់អំណាចមេធាវីមកគាបសង្កត់ និងគំរាមកំហែងកម្មករថែមទៀតផង ។
ដូច្នេះហើយទើបពួកគាត់មិនអាចសម្ងំស្ងៀមបាននាំគ្នាតវ៉ាដើម្បីសេរីភាព និងផលប្រយោជន៍ដែលត្រូវទទួលបានតាមច្បាប់ការងារ ហើយក៏ប្រឆាំងដាច់ខាតទៅនឹងសកម្មភាពរបស់មេធាវីដែលខាងរោងចក្រជួលមកគាបសង្កត់ និងគំរាមកំហែងកម្មករផងដែរ ។
ទាន់ទិនទៅនឹងហេតុការណ៍ខាងលើនៅមិនទាន់មានដំណោះស្រាយណាមួយនៅឡើយទេហើយកម្មករកំពុងស្វែងរកដំណោះស្រាយពីអាជ្ញាធរ និងស្ថាប័នពាក់ព័ន្ធណាមួយនៅឡើយ ៕
ចែករំលែកព័តមាននេះ