រាជធានីភ្នំពេញ ៖ រថយន្តកុងតឺន័រមួយគ្រឿងឈប់ចតអត់មានភ្លើងខាងក្រោយ ត្រូវបានម៉ូតូមួយគ្រឿងបុកពីក្រោយ បណ្តាលឱ្យរងរបួសធ្ងន់ម្នាក់ ដែលហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៩និង៥០នាទីយប់ថ្ងៃទី១៥ ខែវិច្ឆិកា ឆ្នាំ២០១៨ នៅតាមបណ្ដោយផ្លូវជាតិលេខ៤ ទល់មុខយានដ្ឋាន សុខហេងគង់១ ដែលស្ថិតនៅភូមិថ្នល់បំបែក សង្កាត់ចោមចៅ៣ ខណ្ឌពោធិ៍សែនជ័យ។
រថយន្តបង្ក ម៉ាក FRIGHTLINER ពណ៌សលាយស្លាទុំ ពាក់ស្លាកលេខ ភ្នំពេញ ៣O-៨០២១ កំពុងឈប់ចតតាមផ្លូវ ពីលិចទៅកើត។ ចំណែកម៉ូតូរងគ្រោះម៉ាកហុងដាឌ្រីម ស៊េរីឆ្នាំ២០០៦ ពណ៌ខ្មៅ គ្មានស្លាកលេខ បើកបរដោយបុរសម្នាក់ក្នុងទិសដៅពីលិចទៅកើត បានរងរបួសធ្ងន់ បាក់ដៃម្ខាងខាងស្តាំ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបាននិយាយប្រាប់ថា នៅមុនពេលកើតហេតុ គេឃើញរថយន្តកុងតឺន័រ២គ្រឿងឈប់ បន្តកន្ទុយគ្នា ដោយរថយន្តបង្កនៅខាងក្រោយមានភ្លើងសុំផ្លូវនៅក្បាលរថយន្តខាងមុខ ហើយចំណែកកន្ទុយសណ្តោងកុងតឺន័រខាងក្រោយពុំមានភ្លើងសញ្ញាសុំផ្លូវឡើយ ស្រាប់តែម៉ូតូរងគ្រោះខាងលើបើកបរក្នុងទិសដៅពីលិចទៅកើតស្របជាមួយរថយន្តដែលឈប់ចតតាមផ្លូវខាងលើ បុកចំពីក្រោយរថយន្តផ្នែកខាងឆ្វេង បណ្តាលឲ្យដួលបាក់ដៃខាងស្តាំម្ខាងតែម្តង។ បន្ទាប់មកជនរងគ្រោះត្រូវបានរថយន្តសាមុយឯកជនដឹកយកទៅសង្គ្រោះភ្លាមៗផងដែរ។
ក្រោយពេលកើតហេតុ ជំនាញចរាចរណ៍ខណ្ឌពោធិ៍សែនជ័យ មកវាស់វែងនិងយករថយន្តនឹង ម៉ូតូខាងលើ យកទៅរក្សាទុកដើម្បីរង់ចាំការដោះស្រាយនៅថ្ងៃក្រោយ ៕
ចែករំលែកព័តមាននេះ