រាជធានីភ្នំពេញ ៖ បើសិនជាគ្រូពេទ្យយើងមានសមត្ថភាពគ្រប់គ្រាន់ ប៉ុន្តែខ្វះក្រមសីលធម៌វិជ្ជាជីវៈក៏មិនអាចផ្តល់សេវាដល់ប្រជាជនត្រឹមត្រូវ អាចបង្កនូវគ្រោះថ្នាក់ដល់ប្រជាជនបាន ដូច្នេះត្រូវតែរឹងប៉ឹងសមត្ថភាពជាបន្តបន្ទាប់ ហើយជាមួយសមត្ថភាពត្រូវតែភ្ជាប់ជាមួយក្រមសីលធម៌ជានិច្ច មិនអាចមានសមត្ថភាពអត់ក្រមសីលធម៌ អាចផ្តល់សេវាបានល្អបានត្រឹមត្រូវទេ ឬបើយើងអត់សមត្ថភាព តែមានក្រមសីលធម៌ក៏មិនអាចផ្តល់សេវាបានល្អ បានត្រឹមត្រូវជូនប្រជាជននោះទេ ។
នេះជាការថ្លែងរបស់លោកសាស្ត្រាចារ្យ យិត ស៊ុណ្ណារ៉ា អនុរដ្ឋលេខាធិការក្រសួងសុខាភិបាលក្នុងទិវា សល្យសាស្ត្រកម្ពុជាលើកទី២៤ កាលព្រឹកថ្ងៃទី១៦ ខែវិចិ្ឆកា ឆ្នាំ២០១៨ ដែលរៀបចំឡើងសណ្ឋាគារភ្នំពេញ ។ លោកសាស្ត្រាចារ្យ យិត ស៊ុណ្ណារ៉ា បានថ្លែងទៀតថា ក្រសួងសុខាភិបាលបានបេ្តជ្ញាជាមួយអង្គការសុខភាពពិភពលោក ដើម្បីសម្រេចបាននូវការគ្របដណ្តប់សុខាភិបាលជាសកលបានន័យថា កន្លែងណាក៏ដោយគ្រប់ប្រជាជនអាចទទួលនូវសេវាបានត្រឹមត្រូវ ទោះបីជាប្រជាជននៅទីណាក៏ដោយ ។ ដូច្នេះគ្រូពេទ្យត្រូវមានសមត្ថភាព ជំនាញ និងសីលធម៌វិជ្ជាជីវៈទើបធានាបាននូវសុខុមាលភាពពលរដ្ឋល្អប្រសើរ ។
ទិវាសល្យសាស្ត្រកម្ពុជាលើកទី២៤នេះ មានសារសំខាន់ណាស់ ចំពោះមន្រី្តសុខាភិបាលទាំងអស់សម្រាប់ទទួលបាននូវចំណេះដឹងថ្មីៗ សមស្របតាមបច្ចេកទេសទំនើបដែលបណ្តាប្រទេសលើពិភពលោកក៏ដូចជា ប្រទេសជិតខាងកំពុងប្រើប្រាស់ ។ ទិវានេះបានពង្រឹងការសង្គ្រោះ ការថែទាំ និងការព្យាបាលប្រកបដោយបច្ចេកទេសនឹងគុណធម៌ គឺនាំមកនូវការកាត់បន្ថយអត្រាមរណៈភាព និងការបង្ករោគនៅក្នុងមនី្ទរពេទ្យ ។ ក្នុងទិវានោះដែរលោកសាស្ត្រាចារ្យវេជ្ជបណ្ឌិត សុខ ប៊ុនថា ប្រធានសមាគមសល្យសាស្ត្រកម្ពុជាបានឲ្យដឹងថា ទិវានេះមានការចូលរួមពីសាស្ត្រាចារ្យវេជ្ជបណ្ឌិតផ្នែកសល្យសាស្ត្រមកពីប្រទេសមួយចំនួនដូចជា បារាំង អូស្ត្រាលី អាមេរិក និងបណ្តាប្រទេសផ្សេងទៀត ហើយក៏ជាឱកាសមួយដ៏ល្អសម្រាប់គ្រូពេទ្យកម្ពុជាទទួលបាននូវចំណេះដឹងថ្មីៗ ។
លោកសាស្ត្រាចារ្យ បញ្ជាក់ទៀតថា សមាគមមានកិច្ចសហប្រតិបត្តិការយ៉ាងជិតស្និទ្ធជាមួយបណ្ឌិតសភាសល្យសាស្ត្រជាតិបារាំងបានរួមគ្នាប្រារព្ធទិវាសល្យសាស្ត្រកម្ពុជាលើកទី២៤ ដើម្បីធ្វើបច្ចុប្បន្នភាព ចំណេះដឹងបទពិសោធន៍ និងបច្ចេកទេសផ្នែកវះកាត់ថ្មី ចែករំលែកគ្នាទៅវិញទៅមក ក្នុងគោលបំណងជំរុញឲ្យមានការយកចិត្តទុកដាក់ និងពង្រឹងលើកស្ទួយបច្ចេកទេសជាប់ជាប្រចាំ ដើម្បីឲ្យការផ្តល់សេវាព្យាបាល និងថែទាំប្រកបដោយគុណភាព និងប្រសិទ្ធភាពខ្ពស់ជូនប្រជាពលរដ្ឋទៅតាមក្រមសីលធម៌វិជ្ជាជីវៈត្រឹមត្រូវ ។
លោកសាស្ត្រាចារ្យ យិត ស៊ុណ្ណារ៉ា អនុរដ្ឋលេខាធិការក្រសួងសុខាភិបាលបានថ្លែងអំណរគុណយ៉ាងជ្រាលជ្រៅដល់លោក Laurent Triponey តំណាងស្ថានទូតបារាំងប្រចាំកម្ពុជា ដែលតែងតែឧបត្ថម្ភគាំទ្រដល់គម្រោងសិក្សាស្រាវជ្រាវ និងសុំឱ្យបន្តជួយដល់ការអភិវឌ្ឍន៍ធនធានមនុស្សលើវិស័យសុខាភិបាល ៕
ចែករំលែកព័តមាននេះ