រាជធានីភ្នំពេញ ៖ ចម្រៀងមួយបទដែលតារាចម្រៀងតូចច្រម៉ក់ធ្លាប់តែក្រមិចក្រមើម ពេជ្រ ថៃ បានស្រែកច្រៀងរៀបរាប់ពីគុណលោកយាយថ្លៃ ដែលលះបង់ការងារជួយថែទាំចៅគ្រាម្តាយឪពុកបង្កើតនៅឆ្ងាយ។ ចម្រៀងមួយបទយ៉ាងមានអត្ថន័យនេះ ពិតជាស៊ីអារម្មណ៍អណ្តែងអណ្តូងណាស់ ស្ទើរតែទប់ទឹកភ្នែកមិនបាន ហើយអារម្មណ៍អ្នកស្រឡាញ់ជីដូនប្រាកដណាស់បានស្តាប់ហើយ ដឹងតែយំ ស្រួលមិនស្រួលរត់ទៅរកលោកយាយឱប ថើប សំពះអរគុណក៏ថាបាន។
ដោយសារតែភាពនឹករឭក និងចង់ថ្លែងអំណរគុណចំពោះជីដូនដែលបានទទួលមរណភាពកាលពីកន្លងនោះ នៅពេលនេះតារាចម្រៀងដែលជាម្ចាស់ពានខាងលើ បានចេញចម្រៀងថ្មីរបស់ខ្លួនមួយបទតាមរយៈផលិតកម្មរស្មីហង្សមាស ដែលមានចំណងជើង «អរគុណលោកយាយ» ។
ក្នុងមួយបទនេះ ពេជ្រ ថៃ បានរៀបរាប់ពីអនុស្សាវរីយ៍ និងជីវិតដ៏កម្សត់ដែលខ្លួនធ្លាប់មានរួមជាមួយជីដូន ដែលរូបគេនិយមហៅម៉ែចាស់ ព្រមទាំងការរលឹកនឹកគុណដល់លោកយាយខ្លួន ដែលបានបីបាច់ថែខ្លួនកន្លងមកផងដែរ ។
មួយរយៈចុងក្រោយនេះ ពុំសូវឃើញវត្តមានពេជ្រ ថៃ ឡើងច្រៀងសម្តែងដូចអំឡុងក្រោយលើកពាននោះទេ ដោយមានការបញ្ជាក់ថា ពេជ្រ ថៃ ទៅស្រុកកំណើតវិញ ដើម្បីបន្តមាគ៌ាលើការសិក្សា ហើយអាចឆ្លៀតពេលទំនេររូបគេវិលមកសម្តែងឆ្លើយតបការគាំទ្រវិញ។ ទស្សនិកជនមានការនឹករលឹកនឹងចង់ឃើញវត្តមានកុមារាប្រកបដោយភាពរួសរាយនេះសារជាថ្មី ជាពិសេសពេលបុណ្យអ៊ុំទូកដ៏ឆាប់ៗខាងមុខនេះ។
ចែករំលែកព័តមាននេះ