រាជធានីភ្នំពេញ ៖ បុរសវ័យចំណាស់ម្នាក់ជាប្រជាការពារភូមិ បានត្រូវជនដៃដល់ចាក់៣កាំបិតបណ្ដាលឲ្យរងរបួសធ្ងន់ និងក្រោយមកក៏បានស្លាប់់ ពេលក្រុមគ្រួសារបញ្ជូនទៅសង្គ្រោះនៅមន្ទីរពេទ្យមិត្តភាពខ្មែរ-សូវៀត ។ អំពើហិង្សានេះ បានកើតឡើងកាលពីវេលាម៉ោង១១យប់ថ្ងៃទី១៣ ខែវិច្ឆិកាកន្លងទៅ…
រាជធានីភ្នំពេញ ៖ បុរសវ័យចំណាស់ម្នាក់ជាប្រជាការពារភូមិ បានត្រូវជនដៃដល់ចាក់៣កាំបិតបណ្ដាលឲ្យរងរបួសធ្ងន់ និងក្រោយមកក៏បានស្លាប់់ ពេលក្រុមគ្រួសារបញ្ជូនទៅសង្គ្រោះនៅមន្ទីរពេទ្យមិត្តភាពខ្មែរ-សូវៀត ។ អំពើហិង្សានេះ បានកើតឡើងកាលពីវេលាម៉ោង១១យប់ថ្ងៃទី១៣ ខែវិច្ឆិកាកន្លងទៅ នៅភូមិជើងឯក សង្កាត់ជើងឯក ខណ្ឌដង្កោ ។ បុរសរងគ្រោះឈ្មោះ កេត ស៊ីថា អាយុ៥២ឆ្នាំ ជាប្រជាការពារភូមិតាឡី ស្នាក់នៅភូមិតាឡី សង្កាត់ដង្កោ ខណ្ឌដង្កោ ។ ចំណែកជនដៃដល់បានរត់គេចខ្លួន តែកំពុងស្ថិតក្នុងការតាមប្រមាញ់របស់នគរបាល ។
តាមប្រភពព័ត៌មាននៅកន្លែងកើតហេតុឱ្យដឹងថា ជនដៃដល់មានទំនាស់ជាមួយមិត្តភក្ដិរបស់ជាប្រជាការពាររូបនេះ ហើយត្រូវមិត្តភក្ដិរូបនោះវាយបែកក្បាល ។ ខណៈនោះ ជនរងគ្រោះបានទៅជួយធ្វើការសម្របសម្រួល ដោយឲ្យមិត្តភក្តិរបស់គាត់សងលុយទៅជនដៃដល់ចំនួន៧០០ដុល្លារ ដើម្បីបញ្ចប់រឿង ហើយក៏ស្ងប់ស្ងាត់ទៅវិញ ។
បន្ទាប់មក ជនរងគ្រោះនិងមិត្តភក្ដិរបស់ខ្លួន៣នាក់រួមទាំងជនដៃដល់ផងបាននាំគ្នាទៅផឹកស៊ីនៅភោជនីយដ្ឋានអាម៉ាហ្សូន ។ លុះផឹកសុីនៅទីនោះអស់ចិត្ត ជនរងគ្រោះក៏បបួលអ្នកទាំងនោះទៅផឹកសុីបន្តនៅផ្ទះប្រពន្ធចុងរបស់គាត់ទៀត ។ ប៉ុន្តែពេលជិះម៉ូតូដល់ពាក់កណ្តាលផ្លូវ នៅសង្កាត់ជើងឯក ស្រាប់តែជនដៃ
ដល់ឈប់ម៉ូតូ ហើយស្ទុះទៅចាក់ជនរងគ្រោះចំនួន៣កាំបិត បណ្ដាលឲ្យដេកដួលនៅក្នុងថ្លុកឈាម រួចជិះម៉ូតូរត់គេចខ្លួនបាត់ទៅ ។ ភ្លាមៗ ជនរងគ្រោះត្រូវបានក្រុមគ្រួសារដឹកបញ្ជូនទៅមន្ទីរពេទ្យមិត្តភាពខ្មែរ-
សូវៀត តែដោយរបួសធ្ងន់ពេកក៏ស្លាប់ទៅ ហើយក្រុមគ្រួសារបានដឹកសពយកមកផ្ទះ ដើម្បីធ្វើបុណ្យតាមប្រពៃណី ។
ទីបំផុត ជនដែលបានចាក់បុរសចំណាស់ ជាប្រជាការពារភូមិរហូតស្លាប់នោះ ត្រូវនគរបាលខណ្ឌដង្កោ ដឹកនាំដោយលោកវរសេនីយ៍ឯក ជឹម ស៊ីថា អធិការនគរបាលខណ្ឌ ក្រោមបញ្ជាយ៉ាងម៉ឺងម៉ាត់របស់លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ធ្វើការស្រាវជ្រាវ និងចាប់ខ្លួនបាន ។ ទោះបីជាបែបណា នៅមិនទាន់ដឹងពីមូលហេតុច្បាស់លាស់ ដែលនាំដល់ការចាក់សម្លាប់ជនរងគ្រោះនៅឡើយទេ ព្រោះចាក់សម្លាប់ផុយស្រួយពេក ។
ការចាប់ខ្លួនបានធ្វើឡើង កាលពីវេលាម៉ោង១១ និង១០នាទីព្រឹកថ្ងៃទី១៥ ខែវិច្ឆិកា នៅចំណុចផ្ទះលេខ៤៦E ភូមិសំបួរមាស សង្កាត់ដង្កោ ខណ្ឌដង្កោ ។ ជនសង្ស័យខាងលើនេះ ឈ្មោះ ថាច់ សួ ភេទប្រុស អាយុ៤៨ឆ្នាំ ស្នាក់នៅផ្ទះគ្មានលេខ ភូមិបុរីកម្មករ សង្កាត់ជើងឯក ខណ្ឌដង្កោ ។
លោកអធិការ ជឹម ស៊ីថា ថ្លែងថា ក្រោយពីមានអំពើឃាតកម្មនេះកើតឡើង កម្លាំងនគរបាលខណ្ឌ ក្រោមបញ្ជាផ្ទាល់របស់លោកស្នងការនគរបាលរាជធានីភ្នំពេញ បានធ្វើការស្រាវជ្រាវ និងកំណត់បានមុខសញ្ញាតាំងពីភ្លាមៗម្ល៉េះ ហើយក៏បានតាមចាប់ខ្លួនភ្លាមៗដែរ ប៉ុន្តែឃាតករដៃដល់បានគេចខ្លួនពីកន្លែងមួយទៅកន្លែងមួយ ។
លុះក្រោយមកទទួលដំណឹងថា ជនដៃដល់ជិះម៉ូតូហុងដាណៃហត១គ្រឿង ចេញពីផ្ទះជួលខាងលើ ទើបកងកម្លាំងដឹកនាំដោយលោកអធិការ តាមយ៉ាងប្រកិតរហូតដល់វេលាម៉ោង១១និង១០នាទីព្រឹកទើបចាប់ខ្លួនបាន ។ បន្ទាប់ពីចាប់ខ្លួន ជនសង្ស័យត្រូវបានបញ្ជូនទៅកាន់ស្នងការដ្ឋាននគរបាលរាជធានីភ្នំពេញ ដើម្បីសាកសួរនិងកសាងសំណុំរឿងចាត់ការតាមច្បាប់ជាបន្ត ។ តាមប្រភពព័ត៌មានបានឱ្យដឹងក្រៅផ្លូវការនៅឡើយថា មូលហេតុដែលការចាក់សម្លាប់នេះ ប្រហែលមកពីជម្លោះរឿងគួកជេរដី ៕
ចែករំលែកព័តមាននេះ