ខេត្តកំពង់ឆ្នាំង ៖ រហូតមកដល់ពេលនេះ ផ្ទះបណ្តែតទឹកដែលភាគច្រើនជាជនជាតិវៀតណាមរស់នៅ ស្ថិតនៅក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង បានចាកចេញផុតពីទន្លេឡើងមកលើគោកជាបណ្ដើរៗហើយ ។ នេះជាការបញ្ជាក់របស់លោក យិន សាវ៉េន អភិបាលក្រុងកំពង់ឆ្នាំង ប្រាប់ភ្នាក់ងារកោះសន្តិភាព
កាលពីរសៀលថ្ងៃទី១៥ ខែវិច្ឆិកា ។
លោកអភិបាលក្រុងថ្លែងថា មកដល់ពេលនេះផ្ទះបណ្ដែតទឹកនៅភូមិចុងកោះ សង្កាត់ផ្សារឆ្នាំង បានឡើងមកលើគោកជាបណ្ដើរៗហើយ ដែលផ្ទះខ្លះទឹកនៅមានជម្រៅត្រឹមចង្កេះ និងកន្លែងខ្លះទៀតទឹករាក់ត្រឹមស្មងជើង ។ បញ្ហាប្រឈមចំពោះមុខ ដែលអាជ្ញាធរត្រូវដោះស្រាយជាបន្ទាន់នោះ មាន៤សំខាន់ៗ ៖ទី១-ទឹកស្អាត គឺត្រូវតែដោះស្រាយឲ្យបានលឿនបំផុត ដោយឲ្យក្រុមហ៊ុនប្រញាប់រៀបប្រព័ន្ធទឹកស្អាតទៅដល់ពួកគាត់បានប្រើប្រាស់ ។ ទី២-ភ្លើង ទី៣-ផ្លូវ នៅមិនទាន់អាចធ្វើបាននៅឡើយទេ លុះត្រាណាតែទឹកស្រកអស់ទើបធ្វើទៅបាន ។ ទី៤-បង្គន់អនាម័យក៏ត្រូវតែបន្ទាន់ដែរ ព្រោះថាពួកគាត់មិនទាន់មានកន្លែងបន្ទោបង់នៅឡើយ តែអាជ្ញាធរបានណែនាំឲ្យគាត់រៀបចំបង្គន់អនាម័យនៅលើគោក មិនឲ្យបន្ទោបង់នៅក្នុងទឹកនោះទេ ។
លោកអភិបាលក្រុងកំពង់ឆ្នាំងថ្លែងទៀតថា ផ្ទះមួយចំនួនទៀតដែលនៅសេសសល់មិនទាន់ចេញពីទន្លេមកលើគោកនៅឡើយ គឺដោយសារតែផ្ទះពួកគាត់ទាំងនោះជាផ្ទះនៅពីលើបែចិញ្ចឹមត្រី។ នៅពេលពួកគាត់ចាប់ត្រីអស់ ក៏ត្រូវរុះរើទៅនៅលើគោកដូចគ្នាដែរ ។ សូមបញ្ជាក់ថា ប្រជាពលរដ្ឋរស់នៅលើផ្ទះបណ្តែតទឹកទូទាំងខេត្តកំពង់ឆ្នាំងមានចំនួន២.៣៩៥ខ្នងផ្ទះ ហើយស្ទើរតែទាំងអស់ជាជនជាតិវៀតណាមដែលមានចំនួន១ម៉ឺន៨៧នាក់ រស់នៅតាមបណ្តាស្រុកមានដូចជា ក្រុងកំពង់ឆ្នាំង ឃុំតាជេស ស្រុកកំពងត្រឡាច ស្រុកជលគិរី ស្រុកកំពង់លែង និងឃុំឆ្នុកទ្រូ ស្រុកបរិបូណ៌។ ផ្ទះទាំងអស់នេះកំពុងឡើងគោកជាបណ្តើរៗហើយ ។
ថ្លែងនៅក្នុងពិធីផ្ទេរតំណែងអភិបាលខេត្តត្បូងឃ្មុំ លោក ជាម ច័ន្ទសោភ័ណ្ឌ ដែលឡើងកាន់តំណែងជំនួសលោក លី ឡេង នាព្រឹកថ្ងៃទី១៥ ខែវិច្ឆិកា សម្តេចក្រឡាហោម ស ខេង ក្នុងនាមនាយករដ្ឋមន្ត្រីស្តីទី និងជាឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍ទាក់ទិននឹងបំលាស់ទីអ្នករស់នៅលើទឹកនៅបឹងទន្លេសាបក្នុងខេត្តកំពង់ឆ្នាំងថា រហូតមកដល់ពេលនេះនៅសល់តែជនជាតិវៀតណាមមួយចំនួនប៉ុណ្ណោះ ហើយទៅអនាគតយើងនឹងរៀបចំឲ្យពួកគាត់ឡើងលើគោកទាំងអស់ ។
សម្តេចក្រឡាហោម ស ខេង បន្តថា ចាប់តាំងថ្ងៃទី១ ខែតុលា ឆ្នាំ២០១៨មក ខេត្តកំពង់ឆ្នាំងជាខេត្តដែលចាប់ផ្តើមធ្វើមុនគេក្នុងការរៀបចំបំលាស់ទីអ្នករស់នៅលើទឹកឲ្យឡើងលើគោក ។ ពេលធ្វើទៅមានការប្រឈម ហើយដំណាក់កាលអន្តរកាលនេះ ចៀសមិនផុតពីបញ្ហាទេ ។ សំខាន់យើងធ្វើដើម្បីលើកស្ទួយបរិស្ថានទឹកទន្លេសាបឡើងវិញ ។ សម្តេចក្រឡាហោម ស ខេង បានប្រកាសថា «យើងធ្វើដោយស្ម័គ្រចិត្តទេ ។ នៅទីនោះមានខ្មែរ ខ្មែរអ៊ិស្លាម និងមានអាណិកជន ឬជនអន្តោប្រវេសន៍វៀតណាម ។ ខ្មែរនិងខ្មែរអ៊ិស្លាម
ចេញអស់ហើយ នៅមួយចំនួនទៀតជាជនជាតិវៀតណាមដែលជាអ្នកមានមុខរបរធ្វើបែត្រី ។ សម្តេចក្រឡាហោមបានបញ្ជាក់ថា ទី១-យើងដាច់ខាតមិនធ្វើទុក្ខបុកម្នេញលើជនជាតិបរទេស ដែលមករស់នៅកម្ពុជា និងទី២-យើងក៏មិនចាប់បញ្ជូនជនបរទេសទាំងនោះចេញទៅវិញទេលើកលែងតែជនបរទេសនោះ ប្រព្រឹត្តល្មើសឬក៏រស់នៅខុសច្បាប់ ទើបយើងចាប់បញ្ជូនចេញពីកម្ពុជា ។
ទាក់ទិននឹងនិគមជនវៀតណាមរស់នៅលើបឹងទន្លេសាបនេះដែរ ប្រមុខការទូតកម្ពុជា លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ បានគូសបញ្ជាក់ប្រាប់សមភាគីវៀតណាមថា រាជរដ្ឋាភិបាលកម្ពុជានឹងជួយសហគមន៍វៀតណាមដែលរស់នៅលើបឹងទន្លេសាប ដើម្បីពួកគេឡើងមករស់នៅលើគោកឱ្យបានត្រឹមត្រូវ ។ ការអះអាងនេះ បានធ្វើឡើងកាលពីថ្ងៃទី១៣ ខែវិច្ឆិកាកន្លងទៅ ក្នុងកិច្ចប្រជុំក្រៅក្របខណ្ឌ ៅប្រទេសសិង្ហបុរី រវាងលោកឧបនាយករដ្ឋមន្ត្រី ប្រាក់ សុខុន និងរដ្ឋមន្ដ្រីការបរទេសវៀតណាម លោក ផាម ប៊ិញមិញ ។
លោក ផាម ប៊ិញមិញ បានទទួលស្គាល់នូវកិច្ចខិតខំប្រឹងប្រែងរបស់អាជ្ញាធរកម្ពុជា ដែលបានជួយដល់ការផ្លាស់ទីលំនៅរបស់សហគមន៍ជនជាតិវៀតណាមនៅលើបឹងទន្លេសាប ។ ជុំវិញការតាំងទីលំនៅថ្មីរបស់ជនជាតិវៀតណាមនៅលើគោកនេះ លោក ផាម ប៊ិញមិញ ប្រមុខការទូតវៀតណាម បានសម្ដែងក្ដីបារម្ភចំពោះការប្រឈមនានាក្នុងការរស់នៅរបស់គ្រួសារជនជាតិវៀតណាមនៅទីតាំងថ្មី ។ មន្ដ្រីការទូតវៀតណាម បានរំឭកឡើងវិញពីសំណើរបស់នាយករដ្ឋមន្ដ្រីវៀតណាម ទៅកាន់នាយករដ្ឋមន្ដ្រីកម្ពុជា ដែលជាសំណើផ្ដាំផ្ញើឲ្យមើលថែសហគមន៍ជនជាតិវៀតណាមដែលផ្លាស់ពីបឹងទន្លេសាបទៅនៅលើគោក ធ្វើយ៉ាងណាបង្កភាពងាយស្រួលក្នុងជីវភាពរស់នៅប្រចាំថ្ងៃរបស់អ្នកទាំងនោះ ។
ជាការឆ្លើយតប ប្រមុខការទូតកម្ពុជា លោកឧបនាយករដ្ឋមន្ត្រី ប្រាក់ សុខុន បានគូសបញ្ជាក់ថា រាជរដ្ឋាភិបាលកម្ពុជានឹងបង្កើតនូវលក្ខខណ្ឌល្អប្រសើរសម្រាប់សហគមន៍វៀតណាម ដែលចាកចេញពីបឹងទន្លេសាបទៅរស់នៅលើគោក ។គួរជម្រាបថា ការផ្លាស់ទីជនជាតិវៀតណាមចេញពីបឹងទន្លេសាប ស្ថិតនៅក្នុងផែនការរបស់អាជ្ញាធរតាំងពីឆ្នាំ២០១៥មកម្ល៉េះ ។ ជនជាតិវៀតណាមដែលរស់នៅលើបឹងទន្លេសាប ធ្លាប់តវ៉ាជំទាស់នឹងផែនការនេះ ប៉ុន្តែនៅទីបំផុតក្រោមការអនុវត្តវិធានការរដ្ឋបាលយ៉ាងម៉ឺងម៉ាត់ ដោយ
សហការជាមួយសមាគមវៀតណាមនៅកម្ពុជា គ្រួសារជនជាតិវៀតណាមជាង២.០០០គ្រួសារបានយល់ព្រមផ្លាស់ទៅនៅលើគោក ។ អាជ្ញាធរខេត្តកំពង់ឆ្នាំងបានអះអាងថា កំពុងបន្តសហការជាមួយសមាគមវៀតណាមនៅកម្ពុជា រៀបចំរចនាសម្ព័ន្ធបណ្ដើរៗនៅកន្លែងរស់នៅថ្មី រួមមាន សាលារៀន មន្ទីរពេទ្យ ប្រព័ន្ធទឹកស្អាត បណ្ដាញអគ្គិសនី និងផ្លូវថ្នល់ តែពេលនេះអ្វីៗហាក់មិនទាន់បានធ្វើនៅឡើយ
ទេ ៕
ចែករំលែកព័តមាននេះ