ទស្សនកិច្ចសិក្សា ស្តីពីការងារកសាងពង្រឹងអង្គភាព
- បាត់ដំបង
ខេត្តបាត់ដំបង ៖ នៅព្រឹកថ្ងៃទី១៥ ខែវិច្ឆិកា ឆ្នាំ២០១៨ លោកឧត្តមសេនីយ៍ទោ ឈុន ម៉ៅ មេបញ្ជាការរងយោធភូមិភាគទី៥ មេបញ្ជាការរងតំបន់ទី១…
ខេត្តបាត់ដំបង ៖ នៅព្រឹកថ្ងៃទី១៥ ខែវិច្ឆិកា ឆ្នាំ២០១៨ លោកឧត្តមសេនីយ៍ទោ ឈុន ម៉ៅ មេបញ្ជាការរងយោធភូមិភាគទី៥ មេបញ្ជាការរងតំបន់ទី១ បានដឹកនាំជាគណៈអធិបតីក្នុងពិធីទស្សនកិច្ចសិក្សា ស្តីពីការងារកសាងពង្រឹងអង្គភាពរឹងមាំលើគ្រប់វិស័យ នៅវរសេនាតូចលេខ៥១១ ចំណុះឲ្យកងពលលេខ៥១ ស្ថិតក្នុងឃុំអូរស្រឡៅ ស្រុកម៉ាឡៃ ខេត្តបន្ទាយមានជ័យ។ ដោយមានការចូលរួមពី លោកមេបញ្ជាការរង កងពលតូចថ្មើរជើងលេង៥១ កងការពារព្រំដែនលេខ៥០៣ ប៉ូលិសការពារព្រំដែនលេខ៨១៥ ផ្នែកសឹករងស្រុកម៉ាឡៃ អធិការស្រុកម៉ាឡៃ វរសេនាតូចលេ៥១៣ និងសប្បុរសជន សរុបរួមចំនួន១៦៦នាក់។
បន្ទាប់ពីប្រតិភូអញ្ជើញចុះត្រួតពិនិត្យជាក់ស្តែងតាមបណ្តាគោលដៅនានាក្នុង វរសេនាតូចលេខ៥១១ រួចមក គណៈអធិបតី និងប្រតិភូក៏បានចូលរួមមតិវាយតម្លៃនូវចំណុចវិជ្ជមាន និងអវិជ្ជមានដែលអង្គភាពទាំងមូលធ្វើបាន។ ក្នុងនោះសរុបវាយតម្លៃក្នុងអង្គពិធី ជាបឋម អស់លោក មេបញ្ជាការតាមបណ្តអង្គភាពផ្សេងៗ ជាអធិបតីបានធ្វើការ កោតសរសើរ និងថ្លែងអំណរគុណយ៉ាងជ្រាលជ្រៅ ចំពោះវត្តមាន នៃការអញ្ជើញចូលរួមដ៏កុះករពីសំណាក់ អស់លោក ពីគ្រប់បណ្តាអង្គភាពជិតឆ្ងាយទាំងអស់ដែលបានចូលរួមធ្វើទស្សនកិច្ចសិក្សា ដើម្បីចែករំលែក បទពិសោធន៍រកការរីកចម្រើនផ្លាស់ប្តូរពីគ្នាទៅវិញទៅមកផងដែរ។
បន្តមកលោកឧត្តមសេនីយ៍ទោ ឈុន ម៉ៅ បានថ្លែងអំណរគុណ លោកជំទាវ ម៉ៅ ម៉ាល័យ កែ គឺមយ៉ាន តែងតែជួយផ្តល់ការខ្វះខាតក្នុងអង្គភាពនេះ កន្លងមកមាន ជីកអណ្តូងទឹក តភ្លើងអគ្គិសនីចូលក្នុងអង្គភាព ផ្តល់ធុងចម្រោះទឹក និងពូជដំណាំយុទ្ធសាស្ត្រ សម្រាប់ផ្គត់ផ្គង់ក្នុងអង្គភាពឲ្យកាន់តែមានជីវភាពល្អប្រសើរឡើងបន្ថែមទៀត។ ហើយបានធ្វើការកោតសរសើរ ការរីកចម្រើន មានការវិវត្តន៍ឈានឡើងច្រើន បើប្រៀបធៀបទៅនឹងរយ:ពេល៣ឆ្នាំមុន(២០១៥) កន្លងមកនេះ តាមទិសដៅលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ តែងតែដាស់តឿនជាប្រចាំ សំខាន់ការធានាជីវភាពកងទ័ព កសាងជំរំជម្រកស្នាក់នៅ កសាងទីបញ្ជាការសម្រាប់ការងារក្នុងអង្គភាពបន្ថែមទៀតបានយ៉ាងល្អប្រសើរ។
លោកឧត្តមសេនីយ៍ទោបានបន្តទៀតថា នេះសបញ្ជាក់ពីប្រសិទ្ធភាពនៃការដឹកនាំរបស់ថ្នាក់ដឹកនាំ របស់មេបញ្ជាការអង្គភាពគ្រប់ថ្នាក់ មានការសាមគ្គី ឯកភាពផ្ទៃក្នុងល្អ និងដោយអាស្រ័យមានការចូលរួម ដ៏សស្រាក់សស្រាំពីនាយ-ពលទាហានគ្រប់ៗរូប និងដោយអាស្រ័យលើការយកចិត្តទុកដាក់ពី មេបញ្ជាការ មេបញ្ជាការរងក្នុងអង្គភាព ជួយជំរុញផងដែរ។ តាមរយៈនេះដែរលោកឧត្តមសេនីយ៍ទោ បានជំរុញ និងធ្វើការផ្តាំផ្ញើ ដល់អង្គពិធីទាំងមូល ជាពិសេសអង្គភាពវរសេនាតូចលេខ៥១១ ត្រូវបន្តអនុវត្តន៍ការងារកសាងពង្រឹងអង្គភាព រឹងមាំលើគ្រប់ វិស័យ ដូចដែលមានចែងនៅក្នុងផែនការកសាង ពង្រឹងអង្គភាពរឹងមាំលើគ្រប់វិស័យ របស់យោធភូមិភាគទី៥ ទាំង៤ខ្លឹមសារ ដោយស្មារតី ទទួលខុសត្រូវខ្ពស់ ស្មារតីច្នៃប្រឌិតគំនិតផ្តើម តទៅមុខទៀតឲ្យដូចភ្លៀងរលឹម។
ព្រមជាមួយនេះ លោកឧត្តមសេនីយ៍ទោ ក៏បានក្រើនរំលឹកគ្រប់អង្គភាព អនុវត្តឲ្យរឹងមាំភារកិច្ចនៃកង យោធពលខេមរភូមិន្ទ ការពារជាតិបូរណភាពទឹកដី ការពាររដ្ឋធម្មនុញ្ញ ការពារព្រះមហាក្សត្រ ការពាររាជរដ្ឋាភិបាលស្របច្បាប់ ការពារសុខសន្តិភាព ស្ថិរភាពសង្គមជាតិកម្ពុជានៃយើងឲ្យបានដាច់ខាត ទោះជាតម្លៃណាក៏ដោយ ហើយក៏បានផ្តល់ថវិកាសប្បុរសជន ចំនួនប្រមាណជិត២ពាន់ដុល្លា និងថវិកាផ្ទាល់ខ្លួនចំនួន៥០០ដុល្លា ដើម្បីចូរួមចំណែកកសាងផ្ទះបាយ និងបន្តជួយអាគារស្នាក់នៅបន្ថែមទៀត៕
ចែករំលែកព័តមាននេះ