ខេត្តកំពង់ធំ ៖ កាលពីវេលាម៉ោង៤និង១០នាទី ទៀបភ្លឺថ្ងៃទី១៥ ខែវិច្ឆិកា ឆ្នាំ២០១៨ មានហេតុការណ៍គួរឲ្យភ្ញាក់ផ្អើលបានកើតឡើង ដែលបុរសម្នាក់បានចងកសម្លាប់ខ្លួនទៅនឹងធ្នឹមក្រោមផ្ទះ របស់ខ្លួន ស្ថិតក្នុងភូមិជាយស្បៃ ឃុំកកោះ ស្រុកសន្ទុក ខេត្តកំពង់ធំ។ នគរបាលប្រាប់ថា សពជនរងគ្រោះឈ្មោះ វ៉ាន់ ធេន ភេទប្រុស អាយុ៣៦ឆ្នាំ ជនជាតិខ្មែរ មុខរបរកសិករ រស់នៅភូមិកើតហេតុ តាមការឲ្យដឹងពីឈ្មោះ ម៉ៅ រ៉េន ភេទស្រី អាយុ៤២ឆ្នាំ ត្រូវជាប្រពន្ធជនរងគ្រោះ បានរៀបរាប់ប្រាប់សមត្ថកិច្ចថា៖ កន្លងមកប្តីរបស់គាត់ជាមនុស្សផឹកស្រាញៀនស្រាជាច្រើនឆ្នាំមកហើយ ឲ្យតែពេលស្រវឹងម្តងៗតែងតែរករឿងវាយប្រពន្ធ និងកូន។ គាត់បានប្តឹងរដ្ឋអំណាច និងសមត្ថកិច្ចឲ្យជួយអប់រំ និងធ្វើកិច្ចសន្យាជាច្រើនលើកច្រើនសារមកហើយ គាត់មិនកែខ្លួនសោះ។
ទើបកាលពីថ្ងៃទី១២ ខែវិច្ឆិកា រូបគាត់ និងប្តីមានការឈ្លោះប្រកែកគ្នាជាខ្លាំង ពេលនោះគាត់ក៏ចុះចេញ ពីផ្ទះទៅជ្រកនៅផ្ទះបងប្អូន មិនចូលផ្ទះពីរបីថ្ងៃ លុះនៅថ្ងៃទី១៤ ខែវិច្ឆិកា ប្តីគាត់បានទៅហៅគាត់ឲ្យទៅផ្ទះវិញដែរ តែខ្លួនគាត់មិនទៅទេ ដោយខឹងនឹងគាត់មិនកែខ្លួន។ ចំណែកកូនស្រីបង្កើតរបស់ជនរងគ្រោះឈ្មោះ សាម ស្រីរ៉ាន់ អាយុ២៣ឆ្នាំប្រាប់ថា ឪពុករបស់នាងជាមនុស្សញៀនស្រាតែងតែរករឿង និងប្រើហិង្សាក្នុងគ្រួសារ រហូតធ្វើឲ្យម្តាយនាងទ្រាំនៅជាមួយលែងបាន កាលពីយប់ថ្ងៃទី១៤ ឪពុកបានដេកនៅលើផ្ទះជាមួយនាង។
លុះម៉ោង៣ទៀបភ្លឺគាត់ក្រោកពីដំណេក ប្រាប់ថា ទៅនោម ខ្លួនក៏ដេកលក់ទៀត ទៅលុះម៉ោង៤និង១០នាទីទៀបភ្លឺ នាងភ្ញាក់ពីដេកដើរចុះទៅដីក្រោមផ្ទះ ក៏ប្រទះឃើញឪពុកខ្លួនបានចងកទៅនឹងធ្នឹមជាមួយខ្សែភ្លើង ខ្លួនក៏បានដើរប្រាប់បងប្អូនជិតខាង និងម្តាយឲ្យមកមើលឃើញគាត់ស្លាប់បាត់ហើយ ក៏បានរាយការណ៍ទៅប៉ុស្តិ៍រដ្ឋបាលកកោះ។ ក្រោយដឹងព័ត័មានជំនាញនៃអធិការដ្ឋាននគរបាលស្រុកសន្ទុកបានសហការណ៍ជាមួយលោកនាយរងប៉ុស្តិ៍កកោះចុះដល់ទីកន្លែងកើតហេតុ ដើម្បីពិនិត្យទីកន្លែងកើតហេតុ និងសាសព ពុំឃើញមានស្លាកស្នាមអ្វីគួរឲ្យកត់សុម្គាល់ឡើយ ក្រោយពិនិត្យចប់ក៏ប្រគល់សាកសពជូនក្រុមគ្រួសារយកធ្វើបុណ្យតាមប្រពៃណី៕
ចែករំលែកព័តមាននេះ