ប្រទេសមីយ៉ាន់ម៉ា ៖ អនុប្រធានាធិបតីអាមេរិក លោកMIKE PENCEកាលពីថ្ងៃទី១៤វិច្ឆិកា អះអាងទៅកាន់មេដឹកនាំមីយ៉ាន់ម៉ាលោកស្រីអ៊ួងសាន់ស៊ូជីថា អំពើហិង្សាដែលរុញច្រានពួករ៉ូហ៊ីងយ៉ាច្រើនរយពាន់នាក់ រត់ភៀសខ្លួនចេញពីមីយ៉ាន់ម៉ា មិនអាចទទួលយកបានឡើយ។ លោកPENCEបានថ្កោលទោសអំពើហិង្សានិងការធ្វើទុកបុកម្នេញលើពួកជនជាតិភាគតិចអ៊ិស្លាមនោះនៅមីយ៉ាន់ម៉ា…
ប្រទេសមីយ៉ាន់ម៉ា ៖ អនុប្រធានាធិបតីអាមេរិក លោកMIKE PENCEកាលពីថ្ងៃទី១៤វិច្ឆិកា អះអាងទៅកាន់មេដឹកនាំមីយ៉ាន់ម៉ាលោកស្រីអ៊ួងសាន់ស៊ូជីថា អំពើហិង្សាដែលរុញច្រានពួករ៉ូហ៊ីងយ៉ាច្រើនរយពាន់នាក់ រត់ភៀសខ្លួនចេញពីមីយ៉ាន់ម៉ា មិនអាចទទួលយកបានឡើយ។
លោកPENCEបានថ្កោលទោសអំពើហិង្សានិងការធ្វើទុកបុកម្នេញលើពួកជនជាតិភាគតិចអ៊ិស្លាមនោះនៅមីយ៉ាន់ម៉ា ពេលលោកជួបពិភាក្សាជាមួយលោកស្រីស៊ូជី ដែលមានបណ្ដាអ្នកកាសែតចូលរួមផងដែរ។លោកបញ្ជាក់ប្រាប់លោកស្រីស៊ូជីថា យើងចង់ឃើញការរីកចម្រើន ដើម្បីឲ្យពួកអ្នកទទួលខុសត្រូវ លើឧក្រិដ្ឋកម្មទាំងនោះ ផ្ដល់ចម្លើយចំពោះអំពើរបស់ពួកគេ។
ក្រោមការគំរាមកំហែងរបស់កងទ័ពនិងរបស់ពួកជីវពលពុទ្ធនិយម ពួករ៉ូហ៊ីងយ៉ាជាង៧២០.០០០នាក់ បានរត់ភៀសខ្លួនចេញពីមីយ៉ាន់ម៉ា ទៅកាន់បង់ក្លាដែសជិតខាង ចាប់តាំងពីខែសីហាឆ្នាំ២០១៧មក។
ការរិះគន់របស់លោកPENCEនាឱកាសនៃកិច្ចប្រជុំកំពូលអាស៊ាននៅសិង្ហបុរី បង្កើនការគាបសង្កត់ប្រឆាំងលោកស្រីស៊ូជី ខណៈអង្គការAMNESTY INTERNATIONALទើបដកងារលោកស្រីជាឯកអគ្គរដ្ឋទូតសម្បជញ្ញៈរបស់ខ្លួន។
មុននេះនាយករដ្ឋមន្ត្រីម៉ាឡេសីុ លោកមហាធៀរមហាម៉ាដ ចាត់ទុកជំហររបស់លោកស្រីស៊ូជីថា មិនអាចជួយការពារកើត។ មេដឹកនាំវ័យចំណាស់ជាងគេបំផុតនៃពិភពលោកនោះ និយាយថា លោកមានការខកចិត្តខ្លាំងណាស់ចំពោះបរាជ័យរបស់លោកស្រីស៊ូជីក្នុងកិច្ចការពារពួករ៉ូហ៊ីងយ៉ា។
វិបត្តិពួករ៉ូហ៊ីងយ៉ាដាក់ទម្ងន់លើកិច្ចប្រជុំកំពូលអាស៊ាន ដែលបណ្ដាសមាជិកជាទូទៅរមែងចៀសវាងការរិះគន់គ្នាដោយផ្ទាល់។ ពិសេសម៉ាឡេស៊ីនិងឥណ្ឌូណេស៊ី ដែលប្រជាជនភាគច្រើនជាសាសនិកអ៊ិស្លាម ពុំនិយាយយោងពីការរិះគន់របស់ពួកគេចំពោះមីយ៉ាន់ម៉ាឡើយ។
អ.ស.បបានស្នើកាលពីថ្ងៃទី១៣វិច្ឆិកាដល់បង់ក្លាដែស កុំឲ្យធ្វើមាតុភូមិនិវត្តន៍នាសប្ដាហ៍នេះ ពួករ៉ូហ៊ីងយ៉ាជាង២២០០នាក់មកកាន់មីយ៉ាន់ម៉ាវិញ ខណៈទស្សនៈវិស័យនៃការធ្វើមាតុភូមិនិវត្តន៍នោះ សាបព្រោះការជ្រួលច្របល់ក្នុងបណ្ដាជំរំជនភៀសខ្លួន។
លោកស្រីស៊ូជីក៏រងការរិះគន់ពីសំណាក់សហគមន៍អន្តរជាតិថា ពុំបានជួយដល់អ្នកកាសែតរបស់រ៉យទ័រ២នាក់ ដែលជាប់ឃុំឃាំងក្រោយពួកគេធ្វើការអង្កេត លើការធ្វើឃាតពួករ៉ូហ៊ីងយ៉ា។
លោកMIKE PENCEហៅរឿងនោះថាជារឿងខ្វាយខ្វល់ខ្លាំង ដោយលោករំឭកពីជំហរ សារព័ត៌មានសេរីនិងឯករាជ្យរបស់អាមេរិក។លោកបញ្ជាក់ថាលោកលើកពិរឿងនោះពេលជួបពិភាក្សាគ្នាជាសម្ងាត់ជាមួយលោកស្រីស៊ូជី។ កាលពីខែកញ្ញាលោកស្រីស៊ូជីលើកពីការឃុំឃាំង អ្នកកាសែតទាំង២នាក់នោះថាមិនមែនមកពីហេតុផលវិជ្ចាជីវៈរបស់ពួកគេឡើយ ប៉ុន្តែមកពីពួកគេបំពានច្បាប់៕
ចែករំលែកព័តមាននេះ