រាជធានីភ្នំពេញ ៖ បញ្ហាសុខភាពអ្នកទោសជាពិសេសអ្នកទោស និងទណ្ឌិតដែលមានវ័យចាស់ជរា និងមានជម្ងឺកំពុងជាប់ឃុំត្រូវបានមន្ត្រីរាជរដ្ឋាភិបាល និងអ្នកជំនាញផ្នែកសុខភាពក្នុងពន្ធនាគារបានលើកយកមកពិភាក្សាដេញដោលគ្នា នៅក្នុងសន្និសីទថ្នាក់អន្តរជាតិរយៈពេលបីថ្ងៃពីថ្ងៃទី១៤ ដល់ទី១៦ ខែវិច្ឆិកានេះ នៅសណ្ឋាគារកាំបូឌីយ៉ាណា ដែលមានអ្នកចូលរួមមកពីប្រទេសអាស៊ី ប៉ាស៊ីហ្វិក ដែលរៀបចំដោយគណៈកម្មាធិការកាកបាទក្រហមអន្តរជាតិ(ICRC) សន្និសីទអាស៊ីប៉ាស៊ីហ្វិកនេះ បានលើកឡើងពីការគ្រប់គ្រងមកជាការផ្តល់សេវាសុខភាពនិងសុខភាពផ្លូវចិត្តដល់អ្នកទោសក្នុងពន្ធនាគារ(APCPH)វិញ ។
សន្និសីទនេះបានចាប់ផ្តើមនៅថ្ងៃនេះដែលនឹងលើកឡើងរាល់ប្រធានបទទាំងឡាយណាដែលទាក់ទងនឹងគោលនយោបាយសុខភាពទិន្និន័យសុខភាព ការស្រាវជ្រាវ និងការអនុវត្តល្អៗជុំវិញការផ្តល់សេវាសុខភាពនៅក្នុងពន្ធនាគារក៏ដូចជា អត្ថប្រយោជន៍ដែលបានផ្តល់ទៅក្នុងសង្គម ។
យោងតាមលោកឡូ រិនហ្សូ ខារ៉ាហ្វី អ្នកសម្របសម្រួលផ្នែកច្បាប់របស់គណៈកម្មាធិការកាកបាទក្រហមអន្តរជាតិប្រចាំតំបន់បានលើកឡើងថា គណៈកម្មាធិការមានបទពិសោធន៍ច្រើនឆ្នាំ ក្នុងការដោះស្រាយជាមួយការប្រឈមដែលពាក់ព័ន្ធនឹងការធានាឲ្យបាននូវការព្យាបាល និងលក្ខខណ្ឌសមស្របរបស់ជនជាប់ឃុំ (អ្នកទោស ឬទណ្ឌិត) ជុំវិញពិភពលោក ។ លោកថា ការរៀបចំសន្និសីទនេះជាឱកាសមួយដែលអ្នកចូលរួមទាំងអស់គ្នាអាចបង្កើតបរិយាកាសចែករំលែកក៏ដូចជា ការបង្កើនការសហការដៃគូជាអន្តរជាតិលើការផ្តល់សុខមាលភាព ក្នុងតំបន់ និងលើសពីនេះផងដែរ ។
ក្នុងសន្និសីទនៃថ្ងៃចាប់ផ្តើមបានឲ្យដឹងថា មន្ត្រីគ្រប់គ្រងមណ្ឌលអប់រំកែប្រែបុគ្គលផ្តល់សេវាសុខាភិបាលក្នុងពន្ធនាគារ មន្ត្រីតំណាងពីក្រសួងស្ថាប័ននានា និងបណ្ឌិតមកពីតំបន់អាស៊ីប៉ាស៊ីហ្វិកអឺរ៉ុប និងអាមេរិកខាងត្បូងនឹងផ្តោតលើការពិភាក្សាដេញដោលចំនួនបីថ្ងៃ ។ នៅក្នុងនោះការពិភាក្សាលើគោលនយោបាយក្នុងពន្ធនាគារ នីតិវិធីប្រតិបត្តិការជាស្តង់ដា និងការសម្របសម្រួលតាមអន្តរវិស័យប្រព័ន្ធគ្រប់គ្រងព័ត៌មានសុខភាព និងការផ្តល់សេវាសុខាភិបាលនៅក្នុងតំបន់ដែលមានភាពមិនប្រក្រតីលើការប្រើប្រាស់សារធាតុញៀន សុខភាពផ្លូវចិត្ត និងជម្ងឺឆ្លងនានា ។ លោកបានលើកឡើងថា គណៈកម្មាធិការកាកបាទក្រហមអន្តរជាតិ (ICHC)បានលើកឡើងថា គណៈកម្មាធិការមានគោលបំណងក្នុងការពង្រីកការថែទាំបែបមនុស្សធម៌ និងលក្ខខ័ណ្ឌរស់នៅរបស់ជនជាប់ឃុំទាំងអស់មិនថា ពួកគេត្រូវបានឃុំខ្លួនដោយសារមូលហេតុអ្វីនោះទេ ។ លោកថា«ពួកយើងស្វែងរកនូវវិធី ដើម្បីសម្រួលទុក្ខលំបាកដល់គ្រួសាររបស់ពួកគេផងដែរ ។
តាមរយៈការផ្សារភ្ជាប់ទំនាក់ទំនងរវាងជនជាប់ឃុំ និងសាច់ញាតិរបស់គេ » ។ គណៈកម្មាធិការកាកបាទក្រហមអន្តរជាតិធ្វើការងារ ដើម្បីប្រាកដថា ជនរងគ្រោះពីជម្លោះប្រដាប់អាវុធអាចទទួលបានការថែទាំសុខភាពជាមូលដ្ឋានស្របតាមស្តង់ដាដែលបានទទួលស្គាល់ជាសកល ។ លោកប៉ាវ ហមផាន រដ្ឋលេខាធិការក្រសួងមហាផ្ទៃដែលបានអញ្ជើញចូលរួមតំណាងសម្តេចក្រឡាហោមស ខេង បានថ្លែងថា សន្និសីទប្រចាំតំបន់អាស៊ីប៉ាស៊ីហ្វិកលើកទី២នេះមានសារៈសំខាន់ណាស់ដែលប្រព្រឹត្តទៅក្រោមប្រធានបទ«ការធ្វើការរួមគ្នា ដើម្បីសុខមាលភាពក្នុងពន្ធនាគារ » ។ លោកថា បញ្ហាសុខមាលភាពជនជាប់ឃុំនៅក្នុងពន្ធនាគារ គឺជាបញ្ហាចម្បងមួយក្នុងចំណោមបញ្ហាផ្សេងៗដែលបាននឹងកំពុងជាបញ្ហាប្រឈមក្នុងពន្ធនាគារតាមទិន្និន័យរបស់គណៈកម្មាធិការកាកបាទក្រហមអន្តរជាតិ បានបង្ហាញថា មានជនជាប់ឃុំប្រហែល៤លាននាក់ បានជាប់ពន្ធនាគារក្នុង១ឆ្នាំៗ នៅក្នុងតំបន់អាស៊ីប៉ាស៊ីហ្វិក ហើយភាគច្រើននៃជនជាប់ឃុំទាំងនោះ គឺមកពីសហគមន៍ដែលងាយរងគ្រោះ ហើយទទួលបានការអប់រំតិចតួចនិងមានលក្ខខ័ណ្ឌរស់នៅមិនសូវមានអនាម័យ ។ លោករដ្ឋលេខាធិការបានលើកឡើងទៀតថា ក្នុងចំណោមជនជាប់ឃុំទាំងនោះចន្លោះពី៥០ដល់៧០% គឺជាជនជាប់ឃុំដែលពាក់ព័ន្ធនឹងគ្រឿងញៀន និងស្ថិតនៅក្រោមឥទ្ធិពលគ្រឿងញៀនមិនតែប៉ុណ្ណោះភាពចង្អៀតណែនក្នុងពន្ធនាគារបាននាំឲ្យមានជម្ងឺឆ្លង ព្រមជាមួយបញ្ហាជម្ងឺផ្លូវចិត្តដែលមានអត្រារហូតដល់៧៥%។
លោកថា បញ្ហាដែលគួរកត់សម្គាល់បន្ថែម«ការដោះស្រាយបញ្ហាសុខភាពនៅក្នុងពន្ធនាគារយន្តការរបស់យើងនៅមានកម្រិតនៅឡើយ» ។ តាមរយៈសន្និសីទនេះ គឺជាឱកាសដែលយើងអាចចែករំលែកនូវបទពិសោធន៍ចំណេះដឹង បច្ចេកទេស ការពង្រឹងភាពជាអ្នកដឹកនាំ និងអភិបាលកិច្ចល្អ ព្រមទាំងពង្រឹងភាពជាដៃគូកិច្ចសហប្រតិបត្តិការប្រកបដោយទទួលខុសត្រូវ » ធ្វើការរួមគ្នា ដើម្បីសុខមាលភាពក្នុងពន្ធនាគារ » ។
គួរបញ្ជាក់ថា កាលពីពេលថ្មីនេះលោកអង្គវង្ស វឌ្ឍានារដ្ឋមន្ត្រីក្រសួងយុត្តិធម៌បានដឹកនាំកិច្ចប្រជុំពិនិត្យពន្ធនាគារចំនួន២៤ខេត្ត និងមណ្ឌលអប់រំកែប្រែចំនួន៤ បានស្នើមកក្រសួងយុត្តិធម៌ចំនួន៥២៣នាក់ ស្រី៣៧នាក់ សម្រាប់ពិនិត្យក្នុងការបន្ធូរបន្ថយទោស និងលើកលែងទោសក្នុងព្រះរាជពិធីបុណ្យអុំទូក សំពះព្រះខែអកអំបុកឆ្នាំនេះ ៕
ចែករំលែកព័តមាននេះ