រាជធានីភ្នំពេញ ៖ ចាត់ទុកថា នួន ភារក្ស ជាកីឡាករដែលមានសំណាងមិនអន់នោះទេ បន្ទាប់ពីបានរៀបការជាមួយនារីស្រស់ស្អាត ដែលមានទ្រព្យសម្បត្តិគួរសម និងមានទាំងតួនាទីជាចៅសង្កាត់រងទី១នៅសង្កាត់កាកាប២ ដែលជាតួនាទីក្នុងជួរគណបក្សកាន់អំណាច។
យ៉ាងណាមិញ កីឡាករវ័យក្មេង នួន ភារក្ស បានអះអាងថា លោកមិនបោះបង់ការប្រដាល់នោះទេ បើទោះជាក្រោយរៀបការគ្រួសារខាងភរិយាបានរៀបគម្រោងឱ្យលោកធ្វើការ ឬបើកជំនួញដែលជួយឱ្យលោកមានមុខមានកិត្តិយសជាងតំណែងជាកីឡាករដែលមានបច្ចុប្បន្នក្តី ។
គ្មានអ្នកណាមិនភ្ញាក់ផ្អើលនោះទេ ដែលលោក នួន ភារក្ស ត្រូវគេស្គាល់គ្រាន់តែជាកីឡាករដែលមានជីវភាពសាមញ្ញ ស្រាប់តែមានសំណាងបានរៀបអាពាហ៍អាពាហ៍ជាមួយអ្នកនាង សាយ សុនីតា ដែលត្រូវគេស្គាល់ជាចៅសង្កាត់រងទី១ប្រចាំសង្កាត់កាកាប២ ក្នុងខណ្ឌពោធិសែនជ័យ កាលពីថ្ងៃទី១១ ខែវិច្ឆិកា ឆ្នាំ២០១៨ មុននេះ ដោយអាពាហ៍ពិពាហ៍របស់លោកត្រូវគេឃើញមានការចូលរួមយ៉ាងច្រើនកុះករពីសំណាក់មន្ត្រីជាន់ខ្ពស់ ក្នុងនោះអភិបាលខណ្ឌពោធិសែនជ័យបានទាំងធ្វើមេបាឱ្យលោកនោះផង ដើម្បីបំពេញមុខឱ្យខាងលោក និងខាងស្រី ក្នុងពេលដែលកីឡាករ នួន ភារក្ស ត្រូវគេដឹងថា មិនមែនជាកីឡាករដែលមានជីវភាព និងឋានៈសមនឹងចៅសង្កាត់រងទី១ ដែលជាភរិយា ។
ស្នេហារបស់អ្នកទាំងពីរមិនមែនទើបតែបានកើតឡើងនោះទេ គឺបានលេចឡើងយូរហើយ ហើយដោយសារតែគ្មានការបង្ខិតបង្ខំ ឬគំនាបពីចាស់ទុំទើបស្នេហាខុសឋានៈរវាងមន្ត្រីក្នុងជួររដ្ឋាភិបាល និងកីឡាករមួយនេះត្រូវបានកើតឡើង ។ អ្នកទាំងពីរបានដឹកដៃគ្នាចូលរោងការធ្វើឱ្យមានការកោតសរសើរពីសំណាងរបស់ខាងប្រុសនោះផង ជាពិសេសនៅពេលដែលគេធ្លាប់តែឃើញកីឡាកររូបនេះឡើងប្រដាល់យ៉ាងសាមញ្ញដើម្បីរកប្រាក់យ៉ាងលំបាក ស្រាប់តែអាចប្រារព្ធពិធីមង្គលការបានយ៉ាងធំដុំធ្វើឱ្យអ្នកប្រដាល់ដែលមានអាជីពដូចលោកសរសើរមិនដាច់ពីមាត់ ។
លោកត្រូវគេអះអាងថា នឹងមានឱកាសទទួលបានការងារដោយមិនលំបាកនោះទេ ដោយភាគីខាងមេបាខាងស្រីក៏មានគម្រោងឱ្យរកស៊ីបើលោកចង់រក ឬឱ្យធ្វើការតាមជំនាញដែលអាចរុញបាន ដើម្បីឱ្យលោកកាន់តែស័កិ្ដសមនឹងកិត្តិយសជាស្វាមីរបស់ចៅសង្កាត់រងទី១ផងដែរ ដើម្បីកុំឱ្យមានមុខរបរតែជាកីឡាករតែមួយមុខ ។ យ៉ាងណាមិញ កីឡាកររូបនេះ បានអះអាងថា លោកមិនបោះបង់ការប្រដាល់នោះទេ គឺនៅតែទទួលយកការប្រដាល់ ដោយសារតែភរិយារបស់លោក ក៏មិនបានស្អប់ខ្ពើមវិស័យកីឡានោះផង។
កីឡាករ នួន ភារក្ស និយាយថា លោកមិនអាចគ្រាន់តែមានភរិយាជាចៅសង្កាត់ដែលមានកិត្តិយស ហើយសម្រេចចិត្តបោះបង់ការប្រដាល់បានទេ ដោយសារតែការប្រដាល់គឺជាអ្វីដែលលោកស្រឡាញ់ និងតស៊ូ ដោយបានទាំងចាត់ទុកថា បើគ្មានការប្រដាល់ ក៏លោកមិនបានភ្ជាប់ស្នេហ៍ជាមួយភរិយាដូចការចង់បាន។
លោកថា សប្បាយចិត្តណាស់ដែលបានភរិយាមិនប្រកាន់ពីអាជីព និងស្ថានភាពរបស់ខ្លួន ដោយបានទាំងផ្ដល់ក្ដីស្រឡាញ់ និងភាពកក់ក្ដៅធ្វើឱ្យលោកមានសង្ឃឹមកាន់តែខ្ពស់ក្នុងការរស់នៅ។ ក្នុងនោះលោកក៏បានប្រកាសថា នឹងស្វែងយល់ចំណេះដឹងតាមការចង្អុលបង្ហាញរបស់ភរិយានិងគ្រួសារឪពុកម្ដាយក្មេក ដែលចង់ឱ្យលោកធ្វើការ ឬចង់បើកឱ្យរកស៊ីដើម្បីឱ្យកាន់តែអាចរឹងមាំនៅក្នុងការរស់នៅផងដែរ ។
លោកនៅតែមានគម្រោងប្រឡូកការប្រដាល់ឱ្យពេញទំហឹងដូចអ្វីដែលធ្លាប់បានធ្វើកាលពីពេលមុនការ ដោយក្នុងពេលខាងមុខលោកនឹងទទួលចេញប្រកួតតាមការផ្គូផ្គងគ្រប់ប៉ុស្ដិ៍ ក្នុងនោះលោកក៏នឹងរៀបចំផែនការចេញប្រកួតក្នុងព្រឹត្តិការណ៍ដណ្ដើមពាន ឬខ្សែក្រវាត់ ប្រសិនបើមានការជ្រើសរើសនោះផង ។ លោកថា ខ្លួននៅតែចំណាយពេលហ្វឹកហាត់ជាប្រចាំ ជាពិសេសឱ្យតែមានដំណឹងប្រកួតលេចឡើង គឺមិនសូវបានរយាលពីការហ្វឹកហាត់ទេ បើទោះជាមុនរៀបការ និងក្រោយរៀបការលោកក៏មមាញឹកខុសពីមុន ។ លោកមានគម្រោងយកកូនឆាប់ៗតែសម្រាប់គម្រោងបើកជំនួញនៅមិនទាន់ច្បាស់ទេ ដរាបណាលោកមិនទាន់មានការស្វែងយល់ពីការរកស៊ីដិតដល់ ។
យ៉ាងណាមិញ លោកថាក្រោយពីបានភរិយាជាចៅសង្កាត់រងទី១ លោកហាក់ទទួលបានឱកាសការងារ និងការរាប់អានជាងមុន ជាពិសេសសូម្បីតែមន្ត្រីមួយចំនួនក្នុងសង្កាត់ និងក្នុងខណ្ឌពោធិសែនជ័យ ក៏ហៅលោកឱ្យជួយធ្វើការដើម្បីទទួលបានថវិកាផងដែរ។
ជាមួយនឹងជំហរមិនព្រមបោះបង់ការប្រដាល់នេះ បានធ្វើឱ្យម្នាក់ៗសរសើរចំពោះកីឡាករ នួន ភារក្ស មិនដាច់ពីមាត់នោះទេ ជាពិសេសនៅពេលដែលលោកកំពុងឡើងកូដ និងទទួលបានការចាប់អារម្មណ៍ ប្រសិនបើបានភរិយាជាមនុស្សមានមុខមាត់ហើយឈប់ គឺពិតជារឿងគួរឱ្យស្ដាយ ។ លោកថា មិនបោះបង់ការប្រដាល់នោះទេ ផ្ទុយទៅវិញបើមានឱកាសលោកអាចនឹងបន្តដល់តំណែងជាគ្រូបង្វឹកផង ប្រសិនបើលោកមានពេល ដោយសារតែការស្រឡាញ់ និងដិតអារម្មណ៍ជាមួយនឹងវិស័យមួយនេះ៕
ចែករំលែកព័តមាននេះ