ព្រឹទ្ធាចារ្យល្ខោនបាសាក់ អ៊ុំ សាមិត្ត ទទួលមរណភាពហើយ
- ភ្នំពេញ
រាជធានីភ្នំពេញ ៖ ព្រឹទ្ធាចារ្យនាដភក្តីនិម្មិត អ៊ុំ សាមិត្ត ដែលមានជំនាញផ្នែកល្ខោនបាសាក់បានទទួលមរណភាពហើយ នាព្រឹកថ្ងៃទី១៥ ខែវិច្ឆិកា ឆ្នាំ២០១៨ នេះ…
រាជធានីភ្នំពេញ ៖ ព្រឹទ្ធាចារ្យនាដភក្តីនិម្មិត អ៊ុំ សាមិត្ត ដែលមានជំនាញផ្នែកល្ខោនបាសាក់បានទទួលមរណភាពហើយ នាព្រឹកថ្ងៃទី១៥ ខែវិច្ឆិកា ឆ្នាំ២០១៨ នេះ…
រាជធានីភ្នំពេញ ៖ ព្រឹទ្ធាចារ្យនាដភក្តីនិម្មិត អ៊ុំ សាមិត្ត ដែលមានជំនាញផ្នែកល្ខោនបាសាក់បានទទួលមរណភាពហើយ នាព្រឹកថ្ងៃទី១៥ ខែវិច្ឆិកា ឆ្នាំ២០១៨ នេះ ក្នុងជន្មាយុ៨២ឆ្នាំ បន្ទាប់ពីលោកបានតស៊ូជាមួយនឹងជំងឺសួត និងបេះដូងអស់ជាច្រើនឆ្នាំមកនេះ។
ពិធីបុណ្យសពរបស់លោកព្រឹទ្ធាចារ្យអ៊ុំ សាមិត្ត បានប្រារព្ធធ្វើឡើងនៅគេហដ្ឋានរបស់លោក ស្ថិតក្នុងសង្កាត់វាលវង់ ខណ្ឌ៧មករា (ជិតសាលាបាក់ទូក) ខណៈពេលដែលសពរបស់លោកនឹងត្រូវបូជានៅវត្តទឹកថ្លា នៅថ្ងៃទី១៦ ខែវិច្ឆិកា នេះ។ ដំណឹងស្តីពីមរណភាពរបស់លោកត្រូវបានគេផ្សព្វផ្សាយពេញបណ្តាញសង្គមហ្វេសប៊ុក។
បើតាមកូនប្រុសរបស់លោកឈ្មោះ អ៊ុំ នីមល បានបង្ហោះសារស្តីពីការទទួលមរណភាពឪពុករបស់លោកថា លោកឪពុកដ៏កម្សត់របស់ពួកខ្ញុំបានទៅចោលពួកខ្ញុំហើយ លោកតែងប្រដៅ ដាស់តឿនឲ្យយោបល់ លើកទឹកចិត្តដល់កូនចៅគ្រប់ៗគ្នា តែចាប់ពីពេលនេះទៅពួកខ្ញុំលែងបានស្តាប់ បានឮ បានឃើញរូបលោកទៀតហើយ គឺលោកលារហូតគ្មាថ្ងៃវិលវិញ។ សូមវិញ្ញាណក្ខន្ធលោកពុកទៅកាន់ឋានសុខ ផុតទុក្ខ។
អ្នកសិល្បៈដែលស្គាល់ព្រឹទ្ធាចារ្យនាដភក្តីនិម្មិត អ៊ុំ សាមិត្ត ច្បាស់បានសម្តែងការសោកស្តាយជាទីបំផុត និងបានចាត់ទុកមរណភាពរបស់លោក គឺជាការបាត់បង់ធនធានមនុស្សមួយយ៉ាងសំខាន់។
គួររំលឹកថា ព្រឹទ្ធាចារ្យនាដភក្តីនិម្មិត អ៊ំ សាមិត អតីតតួ «តេជោមាស» ឯកទេសល្ខោនបាសាក់តាំងពីសម័យសង្គមរាស្ត្រនិយម ខណៈពេលព្រឹទ្ធាចារ្យក៏បានទទួលគោរម្យងារប្រទានដោយព្រះមហាក្សត្រផងដែរ។ លោកចូលប្រឡូកក្នុងវិស័យនេះតាំងពីឆ្នាំ១៩៤២ កាលដែលល្ខោននេះនៅមានឈ្មោះជា «ល្ខោនទ្រើងឃ្លោក» នៅឡើយ ហើយបន្តជាប់ជាតួឯកកាលពី ទ.វ.ទី៦០ ជំនាន់លោកតា សាំង សារុន។ ក្រោយឆ្នាំ១៩៧៩ លោកជាគ្រូល្ខោនបាសាក់ដ៏ល្បីជាងគេប្រចាំប្រទេស។
សូមបញ្ជាក់ថា លោកតា អុំ សាមិត្ត ជាសិល្បករជើងចាស់មួយរូបដ៏ល្បីតាំងពីទសវត្សទី ៦០ ដែលធ្លាប់បានព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ប្រោសព្រះរាជទានគោរមងារជា នាដភក្តីនិម្មិត អ៊ុំ សាមិត្ត មរតកមនុស្សរស់ផ្នែកល្ខោនបាសាក់ ក្នុងចំណោមសាស្ត្រាចារ្យ១៧រូបផ្សេងទៀត។
លោកមានជំងឺជាយូរឆ្នាំណាស់មកហើយ ទោះបីយ៉ាងនេះក្តីលោកនៅតែខិតខំប្រមែប្រមូលបទពិសោធន៍ដែលខ្លួនគាត់មាន ដើម្បីចែករំលែកចំណេះដឹងដល់សិស្សនៅតាមបណ្តាញស្ថានីយទូរទស្សន៍ ធ្វើជាគណៈកម្មការផ្តល់ពិន្ទុ និងជាអ្នកណែនាំផ្នែកជំនាញល្ខោនបាសាក់ទៀតផង៕
ចែករំលែកព័តមាននេះ