ខេត្តប៉ៃលិន ៖ ក្មេងស្រីតូចរងគ្រោះ អាយុទើប១ខួប ដែលបានរលាកទឹកក្តៅឆ្នាំងសម្លកំពុងពុះ បណ្តាលឱ្យលាកពេញខ្លួនស្ទើររលេះរលួយ បានធូរស្រាលបន្តិចឡើងវិញហើយ បន្ទាប់ពីក្រុមគ្រួសារបញ្ជូនយកទៅសង្គ្រោះនៅឯមន្ទីរពេទ្យសង្គ្រោះខេត្តបាត់ដំបង ក៏ត្រូវបានឪពុកម្តាយដឹកយកត្រឡប់ទៅផ្ទះកាលពីវេលារសៀលថ្ងៃទី១៤ ខែវិច្ឆិកា…
ខេត្តប៉ៃលិន ៖ ក្មេងស្រីតូចរងគ្រោះ អាយុទើប១ខួប ដែលបានរលាកទឹកក្តៅឆ្នាំងសម្លកំពុងពុះ បណ្តាលឱ្យលាកពេញខ្លួនស្ទើររលេះរលួយ បានធូរស្រាលបន្តិចឡើងវិញហើយ បន្ទាប់ពីក្រុមគ្រួសារបញ្ជូនយកទៅសង្គ្រោះនៅឯមន្ទីរពេទ្យសង្គ្រោះខេត្តបាត់ដំបង ក៏ត្រូវបានឪពុកម្តាយដឹកយកត្រឡប់ទៅផ្ទះកាលពីវេលារសៀលថ្ងៃទី១៤ ខែវិច្ឆិកា ឆ្នាំ២០១៨ ។
ទោះបីជាយ៉ាងណា ក្មេងស្រីតូចដ៏គួរឱ្យអាណិតកំពុងត្រូវបានឪពុកម្តាយមើលថែទាំ និងលាងរបួសយ៉ាងយកចិត្តទុកដាក់ ។
សូមបញ្ជាក់ថា ហេតុការណ៍ក្មេងស្រីតូចរលាកទឹកសម្លក្តៅនេះ បានកើតឡើងកាលពីវេលាម៉ោង៤ និង៤០នាទីរសៀលថ្ងៃទី១៣ ខែវិច្ឆិកា ឆ្នាំ២០១៨ ស្ថិតនៅក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ដោយយកទៅដល់មន្ទីរពេទ្យបង្អែកខេត្ត កាលពីវេលាម៉ោង៤ និង៤៥នាទីរសៀលថ្ងៃដដែល ហើយក្មេងស្រីរងគ្រោះ ឈ្មោះ ឆុំ រចនា អាយុ១ឆ្នាំ រងរបួសរលាកទឹក សម្លក្តៅស្ទើរពេញដងខ្លួន មានឪពុក ឈ្មោះ ជុំ សាន អាយុ៥០ឆ្នាំ ជាមន្ត្រីនគរបាលអធិការដ្ឋាននគរបាលស្រុកសំឡូត និងម្តាយឈ្មោះ លីម ស្រីម៉ៅ អាយុ៤០ឆ្នាំ ។
លោក ជុំ សាន ត្រូវជាឪពុកក្មេងស្រីរងគ្រោះបានឱ្យដឹងតាមទូរស័ព្ទកាលពីវេលាម៉ោង៩ និង១០នាទីព្រឹកថ្ងៃទី១៥ ខែវិច្ឆិកា នេះថា កូនស្រីតូចរងគ្រោះត្រូវបាននាំយកចេញពីមន្ទីរពេទ្យសង្គ្រោះបន្ទាន់ខេត្តបាត់ដំបងវិញហើយ ដោយសារតែរបួសធូរស្រាលជាងមុនបន្តិច ហើយណាមួយការចំណាយ ថ្លៃពេទ្យអស់ច្រើន លំបាកក្នុងការស្នាក់នៅមើលថែកូន ក៏ដឹកកូនស្រីតូចត្រឡប់ទៅលាងរបួសនៅឯផ្ទះរបស់ខ្លួនក្នុងខេត្តប៉ៃលិន ។
លោកបន្តទៀតថា លោកពិតជាភ័យបារម្ភនឹងកូនខ្លាំង លុះឃើញគ្រូពេទ្យរដ្ឋ មិនសូវយកចិត្តទុកដាក់ ក៏យកចេញទៅតាមគ្លីនិកឯកជន រួចបញ្ជូនបន្តទៅខេត្តបាត់ដំបង ។ លោកដឹង ថា គ្រូពេទ្យរដ្ឋតែងតែយឺតយ៉ាវហើយ តែទោះបីជាយ៉ាងណា ក្នុងនាមជាគ្រូពេទ្យ ត្រូវតែគោរពតាមវិជ្ជាជីវៈ ហើយសង្គ្រោះក្មេងឱ្យបានទាន់ពេលសិន រួចចាំឱ្យឪពុកម្តាយរកទិញថ្នាំតាមក្រោយទៀត ។
ពាក់ព័ន្ធទៅនឹងបញ្ហានេះ លោកវេជ្ជបណ្ឌិត អាង នាង ប្រធានមន្ទីរសុខាភិបាលខេត្តប៉ៃលិន បានឱ្យដឹងថា ចំពោះបង់រុំរបួស និងបង់កំប្រេស មិនខ្វះនោះទេ នៅក្នុងមន្ទីរពេទ្យបង្អែកខេត្តប៉ៃលិន ដោយគ្រូពេទ្យប្រាប់ឱ្យឪពុកម្តាយក្មេងរងគ្រោះនោះ ទៅរកទិញតែស្ព្រៃយ៍បាញ់ឱ្យត្រជាក់សាច់ប៉ុណ្ណោះ ដោយសារនៅក្នុងមន្ទីរពេទ្យអត់មាន ព្រោះស្ព្រៃយ៍ដែលបាញ់ឱ្យត្រជាក់ គេដាក់លក់នៅតាមឱសថស្ថានកន្លែងលក់ថ្នាំពេទ្យ គឺមិនមែនជាស្ព្រៃយ៍សម្រាប់បាញ់ពេលធ្វើកម្មវិធីខួបកំណើតអីនោះដែរ ព្រោះស្ព្រៃយ៍បាញ់ឱ្យត្រជាក់នេះ មានសារជាតិថ្នាំពេទ្យសម្រាប់ជួយដល់ស្បែក ដែលរលាកនោះបានធូរស្រាលផង ដែរ ៕
ចែករំលែកព័តមាននេះ