ខេត្តព្រៃវែង ៖ ប្រជាពលរដ្ឋក៏ដូចជាអ្នកដំណើរជាច្រើនបាននាំគ្នាកោតសរសើរដល់មន្ទីរសាធារណៈការ និងដឹកជញ្ជូនខេត្តព្រៃវែងដែលបានយកគ្រឿងចក្រចុះទៅធ្វើការជួសជុលស្ពានដែកបាឡេ១កន្លែងភ្លាមៗ ក្រោយពីបាក់ស្រុតមិនដល់១ម៉ោងផងនោះដោយសារ តែរថយន្តធន់ធ្ងន់បើកឆ្លងកាត់ ។
ស្ពានដែកបាឡេខាងលើនេះស្ថិតនៅតាមបណ្តោយផ្លូវជាតិលេខ៣៨៤ ស្ថិតក្នុងភូមិខ្ចោក ឃុំពពឺស ស្រុកស្វាយអន្ទរ ខេត្តព្រៃវែង ត្រូវបានរថយន្តធន់ធំដែលគេមិនស្គាល់ម៉ាក និងផ្ទុកទម្ងន់ធ្ងន់បើកឆ្លងកាត់បណ្តាលឲ្យបាក់បន្ទះដែកបាតស្ពានអស់មួយផ្ទាំង ទំហំទទឹង១ម៉ែត្រ បណ្តោយ២ម៉ែត្រ នៅចន្លោះម៉ោង១០ទៅ១១ព្រឹកថ្ងៃទី១៥ វិច្ឆិកានេះ ហើយរថយន្តបង្កបានបើករត់គេចខ្លួនបាត់ភ្លាមៗ ដោយមិនបាននៅទទួលខុសត្រូវនោះទេ ។
ទោះជាយ៉ាងណាក៏ដោយ ក្រោយពីកើតហេតុភ្លាមៗក៏មានអ្នកស្រុកបានរាយការណ៍ប្រាប់ទៅអាជ្ញាធរ និងមន្ទីរជំនាញភ្លាមៗ ហើយបន្ទាប់ពីទទួលបានព័ត៌មាននេះភ្លាម លោក អ៊ុន សុធា ប្រធានមន្ទីរសាធារណៈការ និងដឹកជញ្ចូនខេត្តព្រៃវែងបានចាត់ឲ្យមន្ត្រីជំនាញនាំយកគ្រឿងចក្រចុះទៅធ្វើការជួសជុលស្ពាននេះភ្លាម ដើម្បីបង្កលក្ខណៈងាយស្រួលដល់បងប្អួនប្រជាពលរដ្ឋដែលធ្វើដំណើរឆ្លងកាត់ទៅវិញទៅមក និងបង្ការកុំឲ្យកកស្ទះចរាចរណ៍ផងដែរ ។
ដោយឡែកខាងសមត្ថកិច្ចវិញបានឲ្យដឹងថា បើទោះបីជារថយន្តដែលធ្វើឲ្យបាក់ស្ពាននេះ បានរត់គេចខ្លួនបាត់ហើយក្តី ប៉ុន្តែកម្លាំងសមត្ថកិច្ច និងតាមស្រាវជ្រាវរករថយន្តបង្កនេះឲ្យទាល់តែឃើញ ដើម្បីបង្ខំឲ្យម្ចាស់រថយន្តធ្វើការទទួលខុសត្រូវចំពោះការខូចខាត និងជាការព្រមានសម្រាប់ថ្ងៃក្រោយកុំឲ្យធ្វើការដឹកជញ្ជូនលើសទម្ងន់ដែលច្បាប់អនុញ្ញាតិបែបនេះទៀត ៕
ចែករំលែកព័តមាននេះ