បន្ទាយមានជ័យ ៖ បើមិនគ្រោះថ្នាក់ធ្លាក់រថយន្តដឹកដីពីលើភ្នំ បណ្តាលឲ្យស្លាប់មនុស្សម្នាក់ក៏គ្មានការបង្ក្រាប និងបិតអាជីវកម្មក្រុមហ៊ុនដែលកាយបំផ្លាញភ្នំ២កន្លែងល្មើសច្បាប់ ដែលប៉ះពាល់ដល់ធនធានធម្មជាតិដែលសមាជិកក្រុមប្រឹក្សាខេត្ត លើកឡើងកិច្ចប្រជុំនៅថ្ងៃទី១៥ ខែវិច្ឆិកា ឆ្នាំ២០១៨ នៅសាលប្រជុំក្រុមប្រឹក្សាខេត្តបន្ទាយមានជ័យ ។
កិច្ចប្រជុំសាមញ្ញលើកទី៥២ របស់ក្រុមប្រឹក្សាខេត្តបន្ទាយមានជ័យ និងរបាយការប្រចាំខែតុលា ឆ្នាំ២០១៨ ស្តីពីការអនុវត្តការងាររបស់រដ្ឋបាលខេត្តលោក ពឹង ប៉ូឡូ សមាជិកក្រុមប្រឹក្សាខេត្តបន្ទាយមានជ័យបានមានប្រសាសន៍ថ្លែងអំណគុណចំពោះកម្លាំងកងរាជអាវុធហត្ថ ខេត្តបន្ទាយមានជ័យ និងស្រុកបានសហការគ្នាបង្ក្រាបបទល្មើសធនធានធម្មជាតិ ដែលកាយបំផ្លាញភ្នំល្មើសនឹងច្បាប់ និងត្រូវបានបិតក្រុមហ៊ុនមួយចំនួនដែលធ្វើអាជីវកម្មល្មើសច្បាប់ ។
លោកបានបញ្ជាក់ថា ការបំផ្លាញធនធានធម្មជាតិការកាយបំផ្លាញភ្នំនេះ គឺសកម្មភាពកាយមានរយៈពេលយូរមកហើយ តែអាជ្ញាធខេត្ត ស្រុក ក្រុង និងមន្ទីពាក់ព័ន្ធដូចគ្មានសកម្មភាពទប់ស្កាត់ឡើយ រហូតដល់មានគ្រោះថ្នាក់កើតឡើងដោយជនរងគ្រោះម្នាក់បានស្លាប់ ដោយរថយន្តឡើងដឹកដីលើភ្នំទ្រយោង បណ្តាលឲ្យរអិលធ្លាក់ស្លាប់ ទើបកម្លាំងកងរាជអាវុធហត្ថខេត្តស្រុកក្រុងបានចុះបង្ក្រាបបទល្មើសធនធានធម្មជាតិជាបន្តបន្ទាប់ និងបិតអាជីវកម្មក្រុមហ៊ុនដែលកាយភ្នំល្មើសច្បាប់ ដូចជា ក្រុមហ៊ុនដែលបានធ្វើសកម្មភាពកាយភ្នំកងវ៉ា ក្រុងសិរីសោភ័ណ និងកាយភ្នំតាដុង្គ ស្រុកស្វាយចេក ដែលប្រជាពលរដ្ឋធ្លាប់បានប្តឹងឲ្យជួយធ្វើអន្តរាគមន៍ដែលកាយបំផ្លាញភ្នំប៉ះពាល់ធនធានធម្មជាតិ និងប៉ះពាល់វត្ថុបូរាណដែលសេសសល់ពីសម័យដើម ។
លោក អ៊ុង អឿន ប្រធានក្រុមប្រឹក្សាខេត្តបន្ទាយមានជ័យមានប្រសាសន៍សំណូមពរសុំឲ្យអភិបាលនៃគណៈអភិបាលខេត្ត និងស្រុក ក្រុងមន្ទីពាក់ព័ន្ធត្រូវយកចិត្តទុកដាក់ចំពោះធនធានធម្មជាតិដូចជា ភ្នំមិនត្រូវកាយបំផ្លាញដោយល្មើសច្បាប់ត្រូវទប់ស្កាត់ឲ្យបាន ។
ហើយថ្លែងអំណគុណចំពោះកងកម្លាំងកងរាជអាវុធហត្ថខេត្ត និងស្រុក ក្រុងដែលបានបង្ក្រាប និងអាជីវកម្មកាយបំផ្លាញភ្នំដោយគ្មានច្បាប់ទប់ស្កាត់បានទាន់ពេល ដោយមិនបំផ្លាញអស់ទើបស្កាត់ ៕
ចែករំលែកព័តមាននេះ