រាជធានីភ្នំពេញ ៖ អ្នកនាំពាក្យក្រសួងការពា រជាតិ បានចេញសេចក្តីប្រកាសព័ត៌មានចុះ ថ្ងៃទី១៤ ខែវិច្ឆិកា ឲ្យដឹងថា នៅវេលាម៉ោង១៩និង១២នាទីថ្ងៃទី១២ ខែវិច្ឆិកា (ម៉ោងនៅ
ប្រទេសម៉ាលី) ត្រូវនឹងព្រឹកថ្ងៃទី១៣ ខែវិច្ឆិកា (ម៉ោងនៅកម្ពុជា) មានករណីបំផ្ទុះ គ្រាប់ បែកអត្តឃាតមួយ បង្កឡើងដោយក្រុមភេរវករបើករថយន្ត១គ្រឿងចូលទៅបំផ្ទុះក្នុងទីតាំងស្នាក់នៅរបស់អង្គការសហប្រជាជាតិ(អ.ស.ប) នៅតំបន់ហ្កាវ ប្រទេសម៉ាលី ។
តាមសេចក្តីប្រកាសព័ត៌មានឲ្យដឹងទៀតថា ហេតុការណ៍នេះ បណ្តាលឲ្យភេរវករម្នាក់ដែលធ្វើសកម្មភាពបំផ្ទុះគ្រាប់បែកស្លាប់នៅនឹងកន្លែងនិងបាត់បង់ជីវិតជនជាតិម៉ាលី២នាក់ ព្រមទាំងមានអ្នករបួស១៤នាក់ ក្នុងនោះក៏មានពលរដ្ឋខ្មែរដែលជាមន្ត្រីបម្រើការងារជាមួយអង្គការសហប្រជាជាតិចំនួន៤នាក់ផងដែរ ដោយក្នុងនោះម្នាក់របួសធ្ងន់ និង៣នាក់របួសស្រាល ។
អ្នកនាំពាក្យក្រសួងការពារជាតិ ក៏បានបញ្ជាក់សម្រាប់សាធារណមតិផងដែរថា ចំណែកកងកម្លាំងរក្សាសន្តិភាពរបស់កម្ពុជា (ទាហានមួកខៀវ) ដែលបំពេញបេសកកម្មនៅតំបន់នេះ មិនមានគ្រោះថ្នាក់ដោយហេតុការណ៍ខាងលើនោះទេ ។
រហូតមកដល់ពេលនេះ ជនរងគ្រោះជាជនជាតិខ្មែរដែលរងរបួសធ្ងន់នោះ ត្រូវបានបញ្ជូនទៅព្យាបាលនៅមន្ទីរពេទ្យកម្រិត២របស់ចិននៅក្នុងប្រទេសម៉ាលី ចំណែកឯអ្នករបួសស្រាលត្រូវបានបញ្ជូនទៅព្យាបាលនៅមន្ទីរពេទ្យក្បែរនោះ។
ជុំវិញព័ត៌មានពីការវាយប្រហារដោយជនអត្តឃាតនេះ ត្រូវបានដឹងថា ក្រុមអ្នកបំផ្ទុះគ្រាប់បែកជាក្រុមភេរវករ JNIM បានប្រើប្រាស់រថយន្តបើកបំបុកទម្លុះរបងចូលសំដៅទីស្នាក់ការ និងចុចបំផ្ទុះខ្លួនឯងនៅក្នុងរថយន្ត ។ មិនមានបន្សល់ទុកវត្ថុតាងណាមួយនៅកន្លែងកើតហេតុនោះទេ ក្រៅតែគ្រោងឆ្អឹងរថយន្តដែលរហែកខ្ទេចខ្ទីសល់តែដុំម៉ាស៊ីនរថយន្តប៉ុណ្ណោះ ។
ទីស្នាក់ការដែលរងការវាយប្រហារនេះ ជាការិយាល័យរបស់ក្រុមការងារTDI ស្ថិតនៅក្នុងក្រុងហ្កាវ ចម្ងាយប្រហែល៣គីឡូម៉ែត្រពីទីបញ្ជាការប្រចាំតំបន់របស់ក្រុមរក្សាសន្តិសុខរបស់ អ.ស.ប ។ ការវាយប្រហារនេះ បណ្តាលឲ្យអគារទីស្នាក់ការរបស់ក្រុមការងារ TDI ត្រូវខូចខាតទាំងស្រុង ៕
ចែករំលែកព័តមាននេះ