រាជធានីភ្នំពេញ ៖ អគ្គិភ័យបានឆាបឆេះកម្ទេចជ័រដែលគេគរចោលនៅខាងមុខរោងចក្រផលិតស្បែកជើងយីហោ «សេងសាន់ស៊ូ» បង្កឲ្យមានការណ៍ភ្ញាក់ផ្អើលដល់សមត្ថកិច្ចមូលដ្ឋាន និងរថយន្តពន្លត់អគ្គិភ័យចុះមកអន្តរាគមន៍កាលពីវេលាម៉ោង១០និង២០នាទីយប់ថ្ងៃទី១៤ ខែវិច្ឆិកា ឆ្នាំ២០១៨ ត្រង់ចំណុចរោងចក្រផលិតស្បែកជើងខាងលើ តាមបណ្តោយផ្លូវសម្តេចជាស៊ីម…
រាជធានីភ្នំពេញ ៖ អគ្គិភ័យបានឆាបឆេះកម្ទេចជ័រដែលគេគរចោលនៅខាងមុខរោងចក្រផលិតស្បែកជើងយីហោ «សេងសាន់ស៊ូ» បង្កឲ្យមានការណ៍ភ្ញាក់ផ្អើលដល់សមត្ថកិច្ចមូលដ្ឋាន និងរថយន្តពន្លត់អគ្គិភ័យចុះមកអន្តរាគមន៍កាលពីវេលាម៉ោង១០និង២០នាទីយប់ថ្ងៃទី១៤ ខែវិច្ឆិកា ឆ្នាំ២០១៨ ត្រង់ចំណុចរោងចក្រផលិតស្បែកជើងខាងលើ តាមបណ្តោយផ្លូវសម្តេចជាស៊ីម ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
បើតាមសម្តីពីបុរសម្នាក់ឈ្មោះ គិត សីហា អាយុ៣៥ឆ្នាំ ជាសន្តិសុខយាមរោងចក្រ កើតហេតុខាងលើបានរៀបរាប់ប្រាប់ឲ្យដឹងថា នៅមុនពេលកើតហេតុគាត់កំពុងសម្រាកនៅក្នុងរោងចក្រខាងលើ ។ លុះដល់វេលាកើតហេតុគាត់ក៏បានធំក្លិនឈ្ងៀមចេញមកពីខាងក្រៅ ខណៈពេលនោះគាត់ក៏បានដើរទៅមើលឃើញមានអណ្ដាតភ្លើងបានកំពុងឆាបឆេះគំនរកម្ទេចជ័រដែលគេចាក់គរចោលនៅក្នុងរបងខាងមុខរោងចក្រ ។
ភ្លាមនោះគាត់ក៏ស្រែកឆោឡោបង្កឲ្យមានការភ្ញាក់ផ្អើលដល់បុគ្គលិកជាជនជាតិចិន ដែលស្នាក់នៅក្នុងនោះបាននាំគ្នាយកបំពង់ពន្លត់អគ្គិភ័យបាញ់ពន្លត់ និងបានរាយការណ៍ទៅសមត្ថកិច្ចមូលដ្ឋានរួមទាំងរថយន្តពន្លត់អគ្គិភ័យឲ្យចុះមកជួយអន្តរាគន៍ ។ បន្ទាប់មកក៏មានរថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញមកចំនួនពីរគ្រឿង បានធ្វើការបាញ់ពន្លត់អស់ទឹកមួយគ្រឿងក៏រលត់ទៅវិញជាស្ថាពរ ។
ចំពោះករណីខាងលើ គឺមិនបង្កឲ្យឆេះរាលដាលដល់ផ្ទះអ្នកជិតខាង ឬរោងចក្រខាងលើនោះទេ គឺគ្រាន់តែឆេះខូចខាតកម្ទេចជ័រដែលគេចាក់ចោលតែប៉ុណ្ណោះ ។ បើតាមការសន្និដ្ឋានជំហានដំបូងសមត្ថកិច្ចសន្និដ្ឋានថា មានអ្នកបោះកន្ទុយបារីចូលទៅក្នុងនោះ ទើបបង្កឲ្យឆេះតែម្ដង ៕
ចែករំលែកព័តមាននេះ