ខេត្តក្រចេះ ៖ រោងសិប្បកម្មកកែច្នៃគ្រឿងសង្ហារិមចំនួនជាង១០ទីតាំងសុទ្ធសឹងជារបស់ជនជាតិវៀតណាម ដែលបានដំណើរការអាជីវកម្មដោយគ្មានច្បាប់ទម្លាប់និងរំខានដល់ប្រជាពលរដ្ឋដែលរស់នៅតំបន់ជុំវិញ អស់រយៈពេលជាច្រើនឆ្នាំមកហើយនោះ ពេលនេះបានត្រូវអាជ្ញាធរមានវិធានការបោសសម្អាតហើយ ។
ការបង្ក្រាបអាជីវកម្មកែច្នៃគ្រឿងសង្ហារិម ដុះស្លែគ្មានច្បាប់របស់ក្រុមជនជាតិវៀតណាមនេះគឺនៅតំបន់ជាប់មាត់ទន្លេមេគង្គ ក្នុងសង្កាត់ក្រគរ ក្រុងក្រចេះ ដែលដឹកនាំដោយលោក ជា សុភ័ក្ត្រ ព្រះរាជអាជ្ញារងអមសាលាដំបូងខេត្ត ។ ប្រតិបត្តិការរបស់សមត្ថកិច្ច បានធ្វើឡើងពេញមួយថ្ងៃទី១៤ ខែវិច្ឆិកា និងមានសិប្បកម្មកែច្នៃគ្រឿងសង្ហារិមជិត១០ទីតាំងធំៗត្រូវបានបង្ក្រាបនិងរឹបអូស ។
មន្ត្រីរដ្ឋបាលព្រៃឈើក្រចេះនិយាយថា ទីតាំងសិប្បកម្មដែលត្រូវវបានបង្ក្រាប គឺសុទ្ធសឹងតែគ្មានច្បាប់ក្នុងការធ្វើអាជីវកម្ម ។ ជាមួយនឹងការចុះបង្ក្រាបនេះ ក្រុមជំនាញក៏បានរឹបអូសឈើប្រណីតរាប់រយកំណាត់ ព្រមទាំងសម្ភារសម្រាប់កែច្នៃបម្រើឲ្យសិប្បកម្មទាំងនោះមួយចំនួនទៀត ។
ការដែលអាជ្ញាធរមានសមត្ថកិច្ចចុះបង្ក្រាបទីតាំងសិប្បកម្មខាងលើនេះ ក៏ទទួលបានការសាទរពីសំណាក់ពលរដ្ឋដែលរស់នៅតំបន់ជុំវិញសិប្បកម្មខាងលើផងដែរ ។ ពួកគាត់និយាយថា សិប្បកម្មកែច្នៃគ្រឿងសង្ហារិមទាំងនេះតែងតែបង្កការរំខានដល់ការរស់នៅរបស់ពួកគាត់ដោយសារសំឡេងចេញពីការអារច្រៀកឈើរបស់ក្រុមជាង ដែលនធ្វើសកម្មភាពទាំងយប់ទាំងថ្ងៃ ។ លើសពីនេះទៀត សិប្បកម្មទាំងនេះបានបង្កឲ្យប៉ះពាល់ដល់បរិស្ថានយ៉ាងធ្ងន់ធ្ងរទៀតផង ដូចជាការហុយកម្ទេចរណារ និងការចោល កម្ទេចរណារ កម្ទេចឈើចូលទៅក្នុងទន្លេមេគង្គជាដើម ។
ទន្ទឹមគ្នានេះ ប្រជាពលរដ្ឋស្នើឲ្យអាជ្ញាធរបិទទីតាំងសិប្បកម្មកែច្នៃឈើប្រណីតទាំងនោះទាំងស្រុងតែម្តង ។ ពួកគាត់និយាថា សិប្បកម្មមានម្ចាស់សុទ្ធតែជនជាតិវៀតណាម ។
ទោះបីជាបែបណា ក្រុមមន្ត្រីដែលបានចុះទៅ
បោសសម្អាតសិប្បកម្មកែច្នៃគ្រឿងសង្ហារិមអត់ច្បាប់នៅតំបន់ខាងលើ នៅមិនទាន់បានបង្ហាញចំនួនឈើនិងចំនួនសម្ភារដែលបានរឹបអូសថាមានចំនួនប៉ុន្មាននៅឡើយទេ ដោយគ្រាន់តែបញ្ជាក់ថា ឈើដែលត្រូវបានរកឃើញមានឈើប្រណីតនិងឈើលេខ២ ត្រូវបានរឹបអូសយកទាំងស្រុង ៕
ចែករំលែកព័តមាននេះ